ახალი ამბები

ბათუმის შოთა რუსთაველის სახელმწიფო უნივერსიტეტის, საქართველოს შრომის, ჯანმრთელობისა და სოციალური დაცვის სამინისტროს, აჭარის ჯანმრთელობისა და სოციალური დაცვის სამინისტროს, ლ. საყვარელიძის სახელობის დაავადებათა კონტროლისა და საზოგადოებრივი ჯანმრთელობის ეროვნული ცენტრის, აჭარის ავტონომიური რესპუბლიკის საზოგადოებრივი ჯანდაცვის ცენტრის ორგანიზებითა და ჯანმრთელობის მსოფლიო ორგანიზაციის ევროპის რეგიონული ოფისის ( WHO/Euro) ეგიდით ევროპის გარემოს და ჯანმრთელობის პროცესის სპეციალური სამუშაო ჯგუფის მე-8 შეხვედრა გაიმართა. ფორუმი 2017 წელს დაგეგმილ ევროპის გარემოს და ჯანმრთელობის დაცვის მინისტრთა მე-6 მაღალი რანგის შეხვედრის მომზადებას მიეძღვნა. ფორუმის მონაწილეებს ბსუ-ს რექტორის მოვალეობის შემსრულებელი მერაბ ხალვაში მიესალმა, უნივერსიტეტი გააცნო და 2017 წელს დაგეგმილი მინისტერიალის უმაღლეს საგანმანათლებლო დაწესებულებაში ჩატარება შესთავაზა.

ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელმა მერაბ ხალვაშმა და აფხაზეთის მეცნიერებათა ეროვნული აკადემიის პრეზიდენტმა ზაურ ლომთათიძემ თანამშრომლობის მემორანდუმს მოაწერეს ხელი. ხელშეკრულება მხარეთა შორის მჭიდრო თანამშრომლობის დამყარებას, ქვეყნისათვის მნიშვნელოვანი სამეცნიერო საქმიანობის განვითარებას და ახალი სამეცნიერო პროექტების შექმნას ითვალისწინებს.

უნივერსიტეტში საერთაშორისო საზაფხულო სკოლა "მედია და ნაციონალიზმი“ დასრულდა.საზაფხულო სკოლის მონაწილეებს რექტორის მოადგილემ ინგა შამილიშვილმა, სოციალურ და პოლიტიკურ მეცნიერებათა ფაკულტეტის დეკანმა ქეთი ბერიძემ და საგარეო ურთიერთობათა სამსახურის უფროსმა ნანა ყურშუბაძემ სერტიფიკატები გადასცეს. 5-დღიანი ვორქშოფი პარიზის პოლიტიკურ მეცნიერებათა ინსტიტუტის (Sciences Po) საინიციატივო ჯგუფის ‘’Broader Perspective’’ ინიციატივით გაიმართა და მასში უცხოელ სტუდენტებთან ერთად ბსუ-ს სხვადასხა ფაკულტეტის სტუდენტები მონაწილეობდნენ. ერთობლივი საზაფხულო სკოლის ფარგლებში ახალგაზრდებმა იმსჯელეს მედიის აქტუალურ საკითხებსა და ომისა და მშვიდობის დროს მედიისა და პროპაგანდის როლზე.

ბელარუსიის სახელმწიფო საერთაშორისო ეკოლოგიის ინსტიტუტის დირექტორი პროფესორი სერგეი მასკევიჩი ბათუმის შოთა რუსთაველის სახელმწიფო უნივერსიტეტს ეწვია. ვიზიტის ფარგლებში ორ უმაღლეს სასწავლო დაწესებულებას შორის თანამშრომლობის მემორანდუმი გაფორმდა. თანამშრომლობის სფეროები ეკოლოგიისა და ბუნებრივი რესურსების დაცვის მიმართულებით განისაზღვრა. ორი ქვეყნის ბუნებრივი რესურსების სამინისტროების ჩართვით დაიგეგმა საზაფხულო სკოლების ამოქმედება, ერთობლივი საგანმანათლებლო პროგრამებისა და პროექტების განხორციელება.

იტალიის საგანგებო და სრულუფლებიანი ელჩი საქართველოში ანტონიო ენრიკო ბარტოლი ბსუ-ს საერთაშორისო ურთიერთობების სტუდენტებს შეხვდა. დიპლომატიური კორპუსის წარმომადგენელმა ორ ქვეყანას შორის არსებულ კულტურულ, საგანმანათლებლო და პოლიტიკურ ურთიერთობებზე ისაუბრა და სამომავლო პერსპექტივები განიხილა.
საჯარო შეხვედრაზე ელჩმა იტალიის, როგორც ევროპის წამყვანი სახელმწიფოს როლზე და მნიშვნელობაზე გაამახვილა ყურადღება მსოფლიო მასშტაბით მშვიდობის დაცვისა და სიღარიბის დაძლევის საქმეში. აგრეთვე, ბარტოლიმ ხაზი გაუსვა იტალიაში ინდუსტრიის, ტექნოლოგიებისა და მეცნიერების მაღალი განვითარების დონეს და ამ გამოცდილების საქართველოსთვის გაზიარებას.