ახალი ამბები

ორგანიზაციის „შეზღუდული შესაძლებლობების მქონე პირთა უფლებებისათვის” ორი წლის იუბილესადმი მიძღვნილი ღონისძიება გაიმართა ბათუმის შოთა რუსთაველის სახელმწიფო უნივერსიტეტის სააქტო დარბაზში. ორგანიზაციის წევრებს მნიშვნელოვანი თარიღი ბსუ-ს რექტორის მოადგილემ ნათია წიკლაშვილმა, ქალაქ ბათუმის მერმა გიორგი ერმაკოვმა, სტუდენტებმა, პროფესორ-მასწავლებლებმა, საზოგადოების წარმომადგენლებმა მიულოცეს და მათი მიღწევები შეაფასეს. ღონისძიების დასასრულს სხვადასხვა შემოქმედებითი ჯგუფის მონაწილეობით კონცერტი გაიმართა. „შეზღუდული შესაძლებლობების მქონე პირთა უფლებებისათვის” იუბილე უნივერსიტეტის სტუდენტური თვითმმართველობის მხარდაჭერით ჩატარდა.

საქართველოს განათლებისა და მეცნიერების მინისტრი თამარ სანიკიძე და აჭარის ა.რ. განათლების, კულტურისა და სპორტის მინისტრი გიორგი თავამაიშვილი ბათუმის შოთა რუსთაველის სახელმწიფო უნივერსიტეტს ეწვივნენ. თამარ სანიკიძე უნივერსიტეტის რექტორის მოვალეობის შემსრულებელ, ასოცირებულ პროფესორ მერაბ ხალვაშთან და ადმინისტრაციის ხელმძღვანელ ჯემალ ანანიძესთან ერთად, უმაღლესი სასწავლებლის აგრარული და მემბრანული ტექნოლოგიების ინსტიტუტში მიმდინარე სარემონტო სამუშაოებს გაეცნო და მკვლევრებს შეხვდა. ვიზიტის ფარგლებში მინისტრს მეცნიერებმა განხორციელებული პროექტები და სამომავლო გეგმები წარუდგინეს. ინსტიტუტში სარემონტო სამუშაოები საქართველოს განათლებისა და მეცნიერების სამინისტროს დაფინანსებით ტარდება.

საქართველოში რუმინეთის საელჩოს ხელმძღვანელის თანაშემწე რადუ გორინჩიო ვიზიტით ბათუმის შოთა რუსთაველის სახელმწიფო უნივერსიტეტში იმყოფებოდა. დიპლომატიური კორპუსის წარმომადგენელმა რექტორის მოადგილესთან ნათია წიკლაშვილთან და საგარეო ურთიერთობათა და სტრატეგიული განვითარების სამსახურის უფროსთან ნანა ყურშუბაძესთან გამართულ შეხვედრაზე რუმინეთის წამყვან უნივერსიტეტებთან თანამშრომლობის შესაძლებლობებზე და სამომავლო გეგმებზე ისაუბრა. დაიგეგმა სხვადასხვა უმაღლეს სასწავლებელთან მემორანდუმის გაფორმება, გაცვლითი პროგრამების ამოქმედება და ერთობლივი პროექტების განხორციელება.

„ბათუმობის“ სახალხო დღესასწაულს მიეძღვნა VI საერთაშორისო კონფერენცია „ბათუმი - წარსული და თანამედროვეობა“. სამეცნიერო სესიაზე მეცნიერები 60-მდე მოხსენებას წარმოადგენენ ზღვისპირა ქალაქის ისტორიაზე, თანამედროვეობაზე, ტურიზმისა და ურბანული განვითარების ტენდენციებზე. მკვლევარები ორი დღის განმავლობაში ისეთ მნიშვნელოვან საკითხებს განიხილავენ, როგორიცაა: „ბათუმის ეკოლოგიური პრობლემები და მისი გადაჭრის გზები“, „ოსმალთა მიერ ბათუმის ოკუპაცია და ქართველი მწერლები“, „ტურიზმის განვითარების სახელმწიფო პოლიტიკის ფორმირების თავისებურებანი“, „არქეოლოგიური გათხრები და აღმოჩენები ფიჭვნარის ნაქალაქარზე“, „ქართველ მუჰაჯირთა სოფლები თურქეთის შავიზღვისპირეთში“ და სხვ. საერთაშორისო კონფერენცია ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის კვლევითი ინსტიტუტის ორგანიზებითა და ქალაქ ბათუმის მერიის მხარდაჭერით ტარდება.

ბათუმის შოთა რუსთაველის სახელმწიფო უნივერსიტეტის დაარსებიდან 80 წელს მიეძღვნა საერთაშორისო კონფერენცია თემაზე: „ქრისტიანობა და ეკონომიკა“. კონფერენცია ივანე ჯავახიშვილის სახელობის თბილისის სახელმწიფო უნივერსიტეტის ეკონომიკისა და ბიზნესის ფაკულტეტისა და ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის ორგანიზებით ტარდება. ერთობლივ საერთაშორისო კონფერენციაში კვლევის შედეგებს ხუთი ქვეყნის 80-მდე მეცნიერი წარმოადგენს. ქართველი, გერმანელი, უკრაინელი, ლიტველი და ბელორუსელი მომხსენებლები ეკონომიკაში რელიგიური ფაქტორების მნიშვნელობაზე, თეორიულ-მეთოდოლოგიურ ასპექტებსა და სოციალურ-ეკონომიკურ რეფორმებზე იმსჯელებენ.