ახალი ამბები

შოთა რუსთაველის ეროვნული სამეცნიერო ფონდის 2014 წლის სამეცნიერო გრანტების და დოქტურანტურის საგანმანათლებლო პროგრამების კონკურსში გამარჯვებული პროექტების ხელმძღვანელებთან და დოქტორანტებთან შეხვედრა გაიმართა. ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელმა, ასოცირებულმა პროფესორმა მერაბ ხალვაშმა და რექტორის მოადგილემ, პროფესორმა ნათია წიკლაშვილმა კონკურსანტებს გამარჯვება მიულოცეს და წარმატებები უსურვეს. წელს საგრანტო კონკურსში გამარჯვება მოიპოვა ბსუ-ს პროფესორ-მასწავლებლების, მკვლევარებისა და დოქტორანტების ცხრა სამეცნიერო პროექტმა და სამმა სადოქტორო საგანმანათლებლო პროგრამამ.

ბილკენტის უნივერსიტეტის პროფესორმა, ბათუმის შოთა რუსთაველის სახელმწიფო უნივერსიტეტის საპატიო დოქტორმა დომენიკ კასაბ-თეზგორმა საჯარო ლექცია წაიკითხა თემაზე: „მუზეუმების ისტორია საუკუნეების მანძილზე“. მომხსენებელმა სტუდენტებსა და პროფესორ-მასწავლებლებს მუზეუმისა და მუზეოლოგიის კონცეფცია გააცნო. ისაუბრა მესოპოტამიაში პირველი მუზეუმის შექმნის, პირველი საზოგადოებრივი ვატიკანისა და რენესანსის პერიოდის კაპიტოლიუმის, XVI-XVII საუკუნეების საოცრებათა კაბინეტისა და განმანათლებლობის ხანის ენციკლოპედიის მუზეუმების ისტორიაზე. ცნობილმა მეცნიერმა ყურადღება გაამახვილა ასევე პოსტმოდერნული მუზეუმებისათვის დამახასიათებელ მეწარმეობისა და მარკეტინგის იდეაზე. საჯარო ლექცია აჭარის ა.რ. განათლების, კულტურისა და სპორტის სამინისტროს ,,უმაღლესი განათლების ხელშეწყობა“ ქვეპროგრამების ფარგლებში ჩატარდა.

ბათუმის შოთა რუსთაველის სახელმწიფო უნივერსიტეტსა და იუსტიციის უმაღლეს სკოლას შორის თანამშრომლობის მემორანდუმი გაფორმდა. დოკუმენტი მიზნად ისახავს, ხელი შეუწყოს სამართალმცოდნეობის სპეციალობის სტუდენტთა სამართლებრივი ცნობიერების ზრდასა და პრაქტიკული უნარ-ჩვევების გაღრმავებას. თანამშრომლობის ფარგლებში ჩატარდება საჯარო ლექციები, განხორციელდება ერთობლივი სასწავლო-საგანმანათლებლო პროექტები და პროგრამები. მემორანდუმს ხელი უნივერსიტეტის რექტორის მოვალეობის შემსრულებელმა, ასოცირებულმა პროფესორმა მერაბ ხალვაშმა და იუსტიციის უმაღლეს სკოლის დირექტორმა ლაშა მაღრაძემ მოაწერეს.

გერმანიის ფედერაციული რესპუბლიკის ბრანდენბურგის მიწის პარლამენტის პრეზიდენტი ბრიტა სტარკი, ვიცეპრეზიდენტი დიტერ დომბროვსკი, ევროპულ საკითხთა კომიტეტის თავმჯდომარე კერსტინ კაიზერი, დეპუტატები: იან რედმანი, აქსელ ფოგელი, ელიზაბეტ ალტერი, იზაბელ ვანდრე, ფრანც ვიზე, იენს ულმანი და ბრანდენბურგ-საქართველოს საზოგადოების თავმჯდომარე პავლე შპეტიშვილი უნივერსიტეტს ეწვივნენ. ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელთან, ასოცირებულ პროფესორ მერაბ ხალვაშთან, ფაკულტეტების დეკანებთან და ადმინსტრაციის წარმომადგენლებთან გამართულ შეხვედრაზე დელეგაციის წევრებმა თანამშრომლობის მიმართულებებსა და სამომავლო გეგმებზე ისაუბრეს. ყურადღება გაამახვილეს ასევე გაცვლითი პროგრამების განხორციელებაზე, პროფესორ-მასწავლებელთა კვალიფიკაციის ამაღლებაზე, და გადამზადებისა და სტაჟირების პროექტების ამოქმედების აუცილებლობაზე.

დასრულდა ერაზმუს მუნდუსის გაცვლითი პროექტის „ELECTRA“-ს მესამე ეტაპის მონაწილეთა შესარჩევი კონკურსი. ბათუმის შოთა რუსთაველის სახელმწიფო უნივერსიტეტი ულოცავს უმაღლესი საგანმანათლებლო დაწესებულების სტუდენტებსა და პროფესორ-მასწავლებლებს გამარჯვებას და წარმატებებს უსურვებს.