ახალი ამბები

22 იანვარს, ბათუმის შოთა რუსთაველის სახელმწიფო უნივერსიტეტში განათლების საერთაშორისო ცენტრმა ფრანგულ ინსტიტუტთან ერთად, ახალი სასტიპენდიო პროგრამების პრეზენტაცია გამართა.
შეხვედრის ფარგლებში, საფრანგეთში სწავლის გაგრძელების მსურველმა სტუდენტებმა დაწვრილებითი ინფორმაცია მიიღეს საგრანტო კონკურსის პირობებსა და პროცედურებზე.
განათლების საერთაშორისო ცენტრის ახალი სასტიპენდიო პროგრამა „სამაგისტრო პროგრამები საფრანგეთში 2016-2017“ - ის კონკურსის ფარგლებში გამარჯვებულ საქართველოს ოცამდე მოქალაქის სწავლას საფრანგეთში, საქართველოსა და საფრანგეთის მთავრობები ერთობლივად დააფინანსებენ. პროგრამის მიზნობრივ ჯგუფს ბაკალავრიატის დამამთავრებელი კურსისა და მაგისტრატურის სტუდენტები წარმოადგენენ.

ბათუმის შოთა რუსთაველის სახელმწიფო უნივერსიტეტის იურიდიულ ფაკულტეტს, ორმხრივი მემორანდუმის ფარგლებში, ყაზახეთის სახელმწიფოდან, ასტანის იურიდიული უნივერსიტეტის სამართლის მაგისტრატურის სტუდენტთა 7 კაციანი ჯგუფი სტუმრობდა. ყაზახი სტუდენტები ერთი კვირის განმავლობაში ბათუმის შოთა რუსთაველის სახელმწიფო უნივერსიტეტის სწავლების მეთოდებსა და ქართული სამართლის აქტუალურ საკითხებზე წაკითხულ ლექციებს ეცნობოდნენ. აგრეთვე, მათ კონსულტაციები გაეწიათ სამაგისტრო ნაშრომების კვლევა-ძიების შედარებით სამართლებრივ ანალიზსა და ქართული სამართლის განვითარების ამჟამინდელ ტენდენციებზე.

#NBAVote Zaza Pachulia - ბათუმის შოთა რუსთაველის სახელმწიფო უნივერსიტეტი მხარს უჭერს საქართველოს კალათბურთელთა ნაკრების კაპიტანს ზაზა ფაჩულიას All Star-ის მატჩზე მოსახვედრად. მხარი დავუჭიროთ ქართველ სპორტსმენს და მივავლინოთ ვარსკვლავთა მატჩზე. ხმის მიცემა 18 იანვარს სრულდება.

ბათუმის შოთა რუსთაველის სახელმწიფო უნივერსიტეტში სტუდენტების ნახატების გამოფენა გაიხსნა. დამთვალიერებელს ერთი კვირის განმავლობაში შესაძლებლობა ექნება გაეცნოს სხვადასხვა უმაღლესი საგანმანათლებლო დაწესებულების ხუთი სტუდენტის 30-მდე ნამუშევარს. ღონისძიება მიზნად ისახავს თვითნასწავლი მხატვრების პროფესიული განვითარების ხელშეწყობასა და მათი შემოქმედების პოპულარიზაციას. გამოფენა უმაღლესი საგანმანათლებლო დაწესებულების სტუდენტთა მომსახურებისა და მხარდაჭერის სამსახურისა და სტუდენტური ასოციაციის ორგანიზებით იმართება.

ბათუმის შოთა რუსთაველის სახელმწიფო უნივერსიტეტის ფოლკორულმა ანსამბლმა “თირინმა“ საერთაშორისო საშობაო ფესტივალის „ჩვენ ერთად“ გრანპრი მოიპოვა. ფესტივალი ბელორუსიის რესპუბლიკის ქალაქ ბრესტში ახალგაზრდა შემოქმედთა ბრესტის სახელმწიფო საოლქო ცენტრის ორგანიზებით გაიმართა და მასში სხვადასხვა ქვეყნის უმაღლესი საგანმანათლებლო დაწესებულების შემოქმედებითი ჯგუფები ღებულობდნენ მონაწილეობას. უნივერსიტეტი ულოცავს ფოლკორულ ანსამბლს გამარჯვებას და უსურვებს წარმატებებს.