ახალი ამბები

ბსუ-ში საქართველოს განათლებისა და მეცნიერების მინისტრი თამარ სანიკიძე, მინისტრის მოადგილეები, ბათუმის შოთა რუსთაველის სახელმწიფო უნივერსიტეტის პროფესორებს, აჭარის რეგიონის საგანმანათლებლო რესურსცენტრების ხელმძღვანელებსა და სკოლის დირექტორებს შეხვდნენ. სამინისტროს წარმომადგენლებმა აუდიტორიას მასწავლებელთა პროფესიული განვითარებისა და პროფესიაში შესვლის ახალი სქემა და უმაღლესი განათლების საუნივერსიტეტო პროგრამა წარუდგინეს. დეტალური ინფორმაცია მიაწოდეს მასწავლებლის საქმიანობის დაწყების, პროფესიული განვითარებისა და კარიერული წინსვლის სქემასთან დაკავშირებით, ასევე იმსჯელეს ახალი სისტემის დანიშნულებასა და სამომავლო შედეგებზე. სამინისტროს პროექტები ახალგაზრდების პედაგოგიური სფეროთი დაინტერესებას, მასწავლებლის პრესტიჟის ამაღლებას, კადრების პროფესიულ გადამზადებას და სახელფასო ანაზღაურების განსაზღვრას ითვალისწინებს. შეხვედრის დასასრულს საქართველოს განათლებისა და მეცნიერების მინისტრმა თამარ სანიკიძემ პროფესორებისა და სკოლის დირექტორების აქტუალურ შეკითხვებს უპასუხა.

სტუდენტური თვითმმართველობის თავმჯდომარის რიგით მეშვიდე არჩევნები გაიმართა ბათუმის შოთა რუსთაველის სახელმწიფო უნივერსიტეტში. არჩევნებში მონაწილეობას ორი კანდიდატი: ბექა მაკარაძე და გიორგი ბაგრატიონი ღებულობდა. სტუდენტური თვითმმართველობის 94 წევრიდან არჩევანი 85-მა გააკეთა. წინასწარი შედეგების მიხედვით, ჰუმანიტარულ მეცნიერებათა ფაკულტეტის თურქეთისმცოდნეობის საგანმანათლებლო პროგრამის II კურსის სტუდენტმა ბექა მაკარაძემ 64 ხმა დააგროვა, ეკონომიკისა და ბიზნესის ფაკულტეტის მენეჯმენტის საგანმანათლებლო პროგრამის III კურსის სტუდენტმა გიორგი ბაგრატიონმა 17 - ხმა, ხოლო 4 ბიულეტინი ბათილად იქნა ცნობილი.

პროგრამის „მიგრაცია განვითარებისათვის“ წარდგინება გაიმართა ბათუმის შოთა რუსთაველის სახელმწიფო უნივერსიტეტში. პროგრამის წარმომადგენელმა ირმა წერეთელმა სხვადასხვა ფაკულტეტის სტუდენტებს პროექტში მონაწილეობის პირობები, შრომის ბაზრის თავისებურებანი, დასაქმების შესაძლებლობები და პრიორიტეტული საგანმანათლებლო პროგრამები გააცნო. პროგრამას გერმანიის მთავრობის დაფინანსებით საერთაშორისო მიგრაციისა და განივთარების ცენტრი (CIM) გერმანიის საერთაშორისო თანამშრომლობის საზოგადოებასთან (GIZ) ერთად ახორციელებს. „მიგრაცია განვითარებისათვის“ მიზნად ისახავს ხელი შეუწყოს გერმანიაში უმაღლესდამთავრებული ქართველი ახალგაზრდების დასაქმებასა და ფინანსურ დახმარებას.

ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტში უნივერსიტეტის 80 წლის იუბილესადმი მიძღვნილი სამეცნიერო კონფერენცია ჩატარდა თემაზე: „გენეტიკური რესურსების მრავალფეროვნება, დაცვა, შენარჩუნება“. სესიაზე სამეცნიერო-კვლევითი დაწესებულების მკვლევრებმა მოხსენებები წაიკითხეს დარგის აქტუალურ საკითხებსა და ბოლო პერიოდში წარმოებული კვლევის შედეგებზე. იმსჯელეს ისეთ თემებზე, როგორიცაა: „ბიომრავალფეროვნების ცალკეული კომპონენტის კვლევა, დაცვა, შენარჩუნება, გონივრული გამოყენება“, „ხეხილოვანი კულტურების მრავალფეროვნება, კონსერვაცია“, „შავი ზღვის ძუძუმწოვრები და კოლხეთის თევზების კონსერვაციის ეკოსისტემური მიდგომა“ და „კოლხეთი - ბიომრავალფეროვნების ცხელი წერტილი - წარსული, აწმყო, მომავალი“. სამეცნიერო კონფერენცია საველე ტურით დასრულდა. სესიის მონაწილეებმა დაათვალიერეს ინსტიტუტის სათბურები, სადაც მცენარეთა პათოგენური მიკროორგანიზმების შესწავლა ხდება და ასევე ყოფილი ქობულეთის სამკურნალო მცენარეთა ზონალური სადგურის საკოლექციო ნაკვეთი, რომელიც გადმოეცა ინსტიტუტს კვლევებისათვის.

ბათუმის შოთა რუსთაველის სახელმწიფო უნივერსიტეტმა ართვინის ჭოროხის უნივერსიტეტის დელეგაციას უმასპინძლა. ართვინის ჭოროხის უნივერსიტეტის რექტორი მეჰმედ დუმანი, რექტორის მოადგილე აიდინ თოფექჩიოგლუ დეკანებთან ერთად ბსუ-ს რექტორის მოვალეობის შემსრულებელს, ასოცირებულ პროფესორ მერაბ ხალვაშს, რექტორის მოადგილეს ნათია წიკლაშვილს, დეკანებს და პროფესორ-მასწავლებლებს შეხვდნენ. მხარეებმა უმაღლეს საგანმანათლებლო დაწესებულებებს შორის გაფორმებული მემორანდუმის ფარგლებში განხორცილებული პროგრამები განიხილეს და თანამშრომლობის გაღრმავების მიზნით ახალი მიმართულებები და პრიორიტეტები განსაზღვრეს. საბუნებისმეტყველო და აგრარული მიმართულებით რამდენიმე პროექტი უკვე განხორციელდა და ამოქმედდა ერთობლივი სადოქტორო პროგრამა, ასევე მევლანას გაცვლითი პროგრამის ფარგლებში ბსუ-ს პროფესორებმა ართვინის ჭოროხის უნივერსიტეტში ლექციები და ვორქშოფები ჩაატარეს. შეხვედრაზე დაიგეგმა ეკონომიკის, ჰუმანიტარული და ჯანდაცვის მიმართულებით სასწავლო-სამეცნიერო პროექტების შემუშავება და სტუდენტების გაცვლა.