ბსუ-ში უნივერსიტეტის სტრატეგიული განვითარებისა და საგარეო ურთიერთობათა დეპარტამენტის ინიციატივით ჩატარდა საერთაშორისო სტუდენტების მიღების დღე (Welcome Party). მიმდინარე სემესტრში ბსუ-ს სხვადასხვა ფაკულტეტზე, „ერაზმუს+“-ის გაცვლითი პროგრამებისა და თანამშრომლობის მემორანდუმების საფუძველზე, 14 სტუდენტი აგრძელებს სწავლას საფრანგეთიდან, პოლონეთიდან, თურქმენეთიდან, ყაზახეთიდან და უკრაინიდან.
ბათუმის შოთა რუსთაველის სახელმწიფო უნივერსიტეტი ევროპის ჟურნალისტიკის ტრენინგების ასოციაციის (EJTA) სრულუფლებიანი წევრი გახდა. 17-20 ოქტომბერს ვენაში გამართულ European Journalism Training Association-ის კონფერენციაზე ბსუ-ს რექტორის მოადგილემ, პროფესორმა თამარ სირაძემ და ციფრული მედია და ინოვაციების სამაგისტრო პროგრამის ხელმძღვანელმა, პროფესორმა ინგა შამილიშვილმა ბათუმის შოთა რუსთაველის სახელმწიფო უნივერსიტეტი წარადგინეს, როგორც ასოციაციის ახალი წევრი. კენჭისყრის შედეგად, ბსუ ასოციაციის სრულუფლებიანი წევრი გახდა, რაც მედია სკოლის განვითარებისა და წარმატებისკენ გადადგმული კიდევ ერთი მნიშვნელოვანი ნაბიჯია.
ბათუმის შოთა რუსთველის სახელმწიფო უნივერსიტეტმა „ბულვარის ფესტივალში“ მიიღო მონაწილეობა. ბულვარში გამართული ფესტივალის საგამოფენო კუთხეში ბსუ-მ წარადგინა FAB LAB BSU-ში სტუდენტების მიერ ბათუმის ბულვარის თემაზე დამზადებული ნამუშევრები, ცნობილი არქიტექტურული კონსტრუქციების მოდელები და ხელნაკეთი ნივთები. ფესტივალის ფარგლებში ასევე გაიმართა საერთაშორისო სამეცნიერო კონფერენცია „რეკრეაციული პარკების მართვისა და განვითარების შესაძლებლობები“, სადაც ბსუ-ს მკვლევრებმა მოხსენებები წარადგინეს ქალაქის განვითარებაში რეკრიაციული პარკების მნიშვნელობაზე, ეკოლოგიასა და გამწვანებაზე.
ბსუ-ში ეკონომიკისა და ბიზნესის ფაკულტეტის ორგანიზებით, საერთაშორისო სამეცნიერო კონფერენცია „ეკონომიკა და ბიზნესის გლობალური გამოწვევები და მდგრადი განვითარება“ გაიხსნა. ორდღიან საერთაშორისო კონფერენციაზე ბოლო პერიოდში წარმოებული კვლევების შედეგებზე სამეცნიერო მოხსენებას წარმოადგენს 100-ზე მეტი ქართველი, ამერიკელი, ინგლისელი, უკრაინელი, ბელგიელი, რუმინელი, ლიეტუველი, ლატვიელი, პოლონელი და აზერბაიჯანელი მკვლევარი. კონფერენცია გახსნეს და მონაწილეებს მიესალმნენ ბსუ-ს ეკონომიკისა და ბიზნესის ფაკულტეტის დეკანი ნათია წიკლაშვილი, აჭარის. ა. რ. ფინანსთა და ეკონომიკის მინისტრი ჯაბა ფუტკარაძე, აჭარის ა.რ. განათლების კუტურისა და სპორტის მინისტრის მოადგილე ჯემალ სურმანიძე, საქართველოს მეცნიერებათა ეროვნული აკადემიის აკადემიკოსი მიხეილ ჯიბუტი, კრანფილდის მენეჯმენტის სკოლის პროფესორი, მიწოდების ჯაჭვისა და ლოჯისტიკის კვლევითი ცენტრის ხელმძღვანელი მიხაილ ბოურლაკისი, მენეჯმენტისა და საინფორმაციო სისტემების უმაღლესი სკოლის ასოცირებული პროფესორი ვიქტორია რიაშენკო და მიკოლას რომერის უნივერსიტეტი პროფესორი ჟანეტა სიმანავიჩინე.
ბათუმის შოთა რუსთველის სახელმწიფო უნივერსიტეტის ბიბლიოთეკის, სტრატეგიული განვითარებისა და საგარეო ურთიერთობათა დეპარტამენტისა და სტუდენტთა კარიერული განვითარების, კულტურისა და სპორტის დეპარტამენტის წარმომადგენლებმა ბსუ-ს ყველა ფაკულტეტის პირველკურსელებთან საინფორმაციო შეხვედრები გამართეს. პირველი კურსის სტუდენტებმა საინფორმაციო შეხვედრებზე დეტალური ინფორმაცია მიიღეს ბიბლიოთეკით სარგებლობისა და ელექტრონული რესურსების გამოყენების წესებზე, გაცვლით პროგრამებსა და უცხოეთის უნივესიტეტებში სწავლის პირობებზე. ახალგაზრდები ასევე გაეცნენ სტუდენტურ სერვისებს, უნივერსიტეტში არსებულ სტუდენტურ კლუბებს, მხარდაჭერის პროგრამებსა და სტუდენტურ პროექტებს. შეხვედრებზე სტუდენტებს შესაძლებლობა ჰქონდათ სამსახურების წარმომადგენლებისთვის დაესვათ შეკითხვები მათთვის საინტერესო საკითხებთან დაკავშირებით და მიეღოთ ამომწურავი პასუხები.
