ახალი ამბები

ქალაქ ბათუმის მერი გიორგი ერმაკოვი ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის სტუდენტებს შეხვდა და პროგრამა ,,ახალგაზრდების უცხოეთში სტაჟირების ხელშეწყობა“ გააცნო. პროგრამა ითვალისწინებს ახალგაზრდების პროფესიულ სტაჟირებას და გადამზადებას სარესტორნო მომსახურების, სასტუმრო მომსახურებისა და ტურიზმის მენეჯმენტის მიმართულებით, ევროკავშირის წევრ ქვეყნებში, ასევე თურქეთსა და შვეიცარიაში. პროექტის მიზანია სტაჟიორთა კვალიფიკაციის ამაღლება, შრომის ბაზარზე კონკურენტუნარიანი ახალგაზრდა კადრების მომზადება.

Erasmus+ საქართველოს ეროვნული ოფისის კოორდინატორმა ლიკა ღლონტმა და ტემპუსის პროექტის ”MAHATMA”-ს მენეჯერმა, ბსუ-ს ასოცირებულმა პროფესორმა ლელა თურმანიძემ ევროკომისიის მიერ დაფინანსებული პროგრამა შეაფასეს და ორწლიანი მუშაობის ანგარიში წარმოადგინეს. პროექტის ფარგლებში შემუშავდა ახალი სამაგისტრო პროგრამა „განათლების მენეჯმენტი“, რომელმაც წარმატებით გაიარა აკრედიტაცია და მიმდინარე წელს ამოქმედდა. პროგრამა ინტერდისციპლინარულია: შეისწავლება სხვადასხვა მიმართულების არჩევითი და სავალდებულო კურსები, ხორციელდება სასწავლო პრაქტიკა უნივერსიტეტის სხვადასხვა განყოფილებაში, ტარდება პრაქტიკული და სამეცნიერო კვლევები. ახალი საგანმანათლებლო პროგრამა ითვალისწინებს ლიდერების აღზრდას უმაღლესი განათლების რეფორმისათვის. პროექტის ეგიდით უმაღლეს საგანმანათლებლო დაწესებულებას გადაეცა 19 300 ევროს ღირებულების კომპიუტერული ტექნიკა და სახელმძღვანელოები. დამონტაჟდა მულტიმედია პროექტორი და საკონფერენციო დარბაზები აღიჭურვა ვიდეო კონფერენციების ჩატარებისათვის საჭირო ტექნიკით.

ბსუ-ს იურიდიული ფაკულტეტის დეკანი, ასოცირებული პროფესორი ადამ მახარაძე და ასოცირებული პროფესორი მალხაზ ნაკაშიძე ვილნიუსში იმყოფებოდნენ. ვიზიტის ფარგლებში მემორანდუმი გაფორმდა ბათუმის შოთა რუსთაველის სახელმწიფო უნივერსიტეტსა და ვილნიუსის მიკოლას რომერის უნივერსიტეტს შორის

თბილისის ივანე ჯავახიშვილის სახელობის სახელმწიფო უნივერსიტეტის რექტორმა, აკადემიკოსმა, ვლადიმერ პაპავამ ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა თემაზე: „საქართველოს ეკონომიკის ძირითადი გამოწვევები და განვითარების პერსპექტივები“. მომხსენებელმა სტუდენტებსა და პროფესორ-მასწავლებლებს ქვეყნის ეკონომიკის განვითარების შესაძლებლობები და პოტენციალი გააცნო. საუბრისას ყურადღება გაამახვილა ასევე არსებულ პრობლემებზე, მათი მოგვარების გზებსა და ასოცირების ხელშეკრულებით გათვალისწინებულ ვალდებულებებზე. საჯარო ლექციის დასასრულს აკადემიკოსმა ვლადიმერ პაპავამ შეკითხვებს უპასუხა.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ორგანიზებითა და აჭარის ა.რ. განათლების, კულტურისა და სპორტის სამინისტროს მხარდაჭერით საერთაშორისო კონფერენცია „ჰუმანიტარული მეცნიერებები ინფორმაციულ საზოგადოებაში - II“ გაიხსნა. ორდღიანი კონფერენცია 13 სექციაში იმუშავებს და მასში 350-მდე ქართველი, ინგლისელი, ფრანგი, გერმანელი, ამერიკელი, რუსი, პოლონელი, აზერბაიჯანელი, ავსტრიელი, თურქი, ირანელი პროფესორ-მასწავლებელი და მკვლევარი მოხსენებას წარმოადგენს ჰუმანიტარული მეცნიერებების აქტუალურ პრობლემებზე. საერთაშორისო სამეცნიერო სესიის მონაწილეები განიხილავენ ინფორმაციულ საზოგადოებაში ჰუმანიტარული მეცნიერებების ახალ გამოწვევებს და ბოლო პერიოდში წარმოებული კვლევის შედეგებს.