ახალი ამბები

ბათუმის შოთა რუსთაველის სახელმწიფო უნივერსიტეტის სტუდენტებმა და პროფესორ-მასწავლებლებმა 1989 წლის 9 აპრილს მთავრობის სასახლესთან საქართველოს დამოუკიდებლობისათვის დაღუპული გმირების ხსოვნას პატივი მიაგეს. 25 წლის წინ განვითარებულ მოვლენებს მიეძღვნა სტუდენტთა კონფერენცია თემაზე: „9 აპრილი - სისხლით დამძიმებული თავისუფლება“. ტრაგიკული მოვლენების ამსახველი ფოტოქრონიკის ჩვენების შემდეგ სტუდენტებმა და პროფესორ-მასწავლებლებმა კიდევ ერთხელ გაიხსენეს ტრაგიკულ ღამეს დაღუპული გმირები, მათი ხსოვნის უკვდავსაყოფად სანთლები დაანთეს, ზღვისპირა პარკში მანათობელი ფრანები გაუშვეს და მემორიალი ტიტებით შეამკეს.

ტემპუსის პროექტის ,,სტუდენტთა კარიერული განვითარების სერვისის დანერგვა საქართველოში -CASEDE“-ის ფარგლებში ბათუმის შოთა რუსთაველის სახელმწიფო უნივერსიტეტში სემინარი ჩატარდა. პროექტის მენეჯერმა, უნივერსიტეტის სტრატეგიული განვითარების სამსახურის უფროსმა თეონა ბერიძემ სხვადასხვა სპეციალობის სტუდენტებისათვის მოხსენება წაიკითხა თემაზე: მსოფლოს ცვალებადობა და მისი გავლენა კარიერულ ზრდაზე. სწავლების ფარგლებში ახალგაზრდები ისეთ მნიშვნელოვან საკითხებს გაეცნობიან, როგორიცაა: თვითშემეცნება, დროის მენეჯმენტი, სტრესულ მდგომარეობასთან გამკლავების გზები, პირადი ფინანსების მართვა, ვაკანსიის მოძიების სტრატეგიები, სააპლიკაციო დოკუმენტების (CV, სამოტივაციო წერილი, რეკომენდაცია) სპეციფიკის გაცნობა, ინტერვიუსთვის მომზადება, სამსახურეობრივ გარემოსთან ადაპტირების გზები და სამუშაო ადგილის შენარჩუნება. ტრენინგის მონაწილეებს ბათუმის შოთა რუსთაველის სახელმწიფო უნივერსიტეტისა და ვილნიუსის უნივერსიტეტის ერთობლივი სერტიფიკატი გადაეცემათ.
პროექტი მიზნად ისახავს დაეხმაროს სტუდენტებს კარიერული ხედვის ჩამოყალიბებასა და კარიერული განვითარების ინდივიდუალური გეგმის შემუშავებაში.

შოთა რუსთაველის დარბაზში სამეცნიერო-პოპულარული და საზოგადოებრივი ჟურნალ „მაჭახლის“ ახალი ნომრის პრეზენტაცია და ჟურნალისტ გოდერძი შარაშიას დოკუმენტური ფილმის "მაჭახლის აკვანი" ჩვენება შედგა. ჟურნალი ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტმა გამოსცა და „მაჭახლობის“ სახალხო დღესასწაულს ეძღვნება. „მაჭახელი“ მკითხველს სიახლით გამორჩეულ სხვადასხვა თემატიკის სტატიებს, ინტერვიუებსა და ხეობის ცხოვრების ამსახველ მასალებს სთავაზობს. ჟურნალში გამოქვეყნებულია მაჭახლის, კირნათის, ახალსოფლის სოფლების სამეურნეო და კულტურული ცხოვრების ამსახველი წერილები, ზემო მაჭახლის მეტყველების ნიმუშები, მაჭახლელ მუჰაჯირთა დასახლებებისა და განსახლების ისტორია, ხელვაჩაურის მუნიციპალიტეტის სიახლეები. წარდგინება უმაღლესი საგანმანათლებლო დაწესებულებისა და ხელვაჩაურის მუნციპალიტეტის ორგანიზებით გაიმართა.

ბათუმის შოთა რუსთაველის სახელმწიფო უნივერსიტეტში მთავრობის ადმინისტრაციის უფროსის მოადგილემ ნინო კობახიძემ ბსუ-ს სტუდენტებისათვის საქართველოს პრემიერ-მინისტრის ირაკლი ღარიბაშვილის საგანმანათლებლო ინიციატივების წარდგინება გამართა. საგანმანათლებლო ინიციატივები საერთაშორისო განათლების ცენტრის შექმნას, საჯარო სამსახურში წარჩინებული სტუდენტების სტაჟირებასა და სოციალურად დაუცველი სტუდენტებისთვის საერთო საცხოვრებლის აშენებას ითვალისწინებს. ნინო კობახიძემ წარდგინებისას ყურადღება გაამახვილა ასევე საქართველოს მთავრობის ერთ-ერთ უმთავრეს პრიორიტეტზე - განათლებაზე და მისი განვითარების პერსპექტივებზე. საგანმანათლებლო ინიციატივების წარდგინების შემდეგ შეხვედრა კითხვა-პასუხის რეჟიმში წარიმართა და მთავრობის ადმინისტრაციის უფროსის მოადგილემ სტუდენტების კითხვებს უპასუხა.

უნივერსიტეტში საქართველოს სოფლის მეურნეობის მეცნიერებათა აკადემიის წევრის, ბათუმის შოთა რუსთაველის სახელმწიფო უნივერსიტეტის აგრარული და მემბრანული ტექნოლოგიების ინსტიტუტის მთავარი მეცნიერ-თანამშრომლის, აკადემიკოს გურამ პაპუნიძის დაბადებიდან 70 და სამეცნიერო-პედაგოგიური მოღვაწეობის 45 წლის იუბილე აღინიშნა. ღვაწლმოსილ მეცნიერს იუბილე მიულოცეს, სამახსოვრო საჩუქრები გადასცეს და მის ღვაწლზე ისაუბრეს უნივერსიტეტის რექტორმა, პროფესორმა ალიოშა ბაკურიძემ, აჭარის ა.რ. უმაღლესი საბჭოს თავმჯდომარემ ავთანდილ ბერიძემ, საქართველოს მეცნიერებათა ეროვნული აკადემიის პრეზიდენტმა, აკადემიკოსმა გიორგი კვესიტაძემ, აჭარის ა.რ. განათლების, კულტურისა და სპორტის მინისტრმა გიორგი თავამაიშვილმა, ბათუმის მერის მოვალეობის შემსრულებელმა გიორგი ერმაკოვმა, ბათუმის საკრებულოს თავმჯდომარემ ირაკლი ჩავლეიშვილმა, კოლეგებმა, საზოგადოების წარმომადგენლებმა და მეგობრებმა. გურამ პაპუნიძეს რამდენიმე ათეული წელია მნიშვნელოვანი წვლილი შეაქვს ქართული მეცნიერების განვითარებასა და საუნივერსიტეტო ცხოვრებაში. იყო საქართველოს პარლამენტისა და აჭარის უზენაესი საბჭოს წევრი, ბათუმის საქალაქო საბჭოს დეპუტატი, სამეცნიერო-კვლევითი ინსტიტუტის დირექტორი, არჩეულია საქართველოს მეცნიერებათა ეროვნული აკადემიის სამეცნიერო საბჭოს წევრად და მევენახეობა-მეღვინეობის დარგის მთავარ მეცნიერ-კონსულტანტად