ახალი ამბები

ჰუმანიტარულ მეცნიერებათა ფაკულტეტის ქართველოლოგიის ცენტრის ორგანიზებით ბათუმის შოთა რუსთაველის სახელმწიფო უნივერსიტეტში X სამეცნიერო კონფერენცია ჩატარდა. სესია გახსნა და სამეცნიერო პროექტების (შოთა რუსთაველის ეროვნული სამეცნიერო ფონდის გრანტი ,,კლარჯეთი” (№31/69), სამეცნიერო პროექტი ,,მუჰაჯირები...” (დამფინანსებელი აჭარის არ მთავრობა) 2013 წლის ანგარიში საზოგადოებას წარუდგინა პროექტების სამეცნიერო ხელმძღვანელმა, პროფესორმა მამია ფაღავამ. პროფესორ-მასწავლებლებმა: მალხაზ ჩოხარაძემ, თინა შიოშვილმა, ზაზა შაშიკაძემ, ნუგზარ მგელაძემ, რამაზ ხალვაშმა, მაია ბარამიძემ, დოქტორანტმა მეჰმედ ალი ქესკინმა და სხვ. მოხსენებები წარმოადგინეს ისტორიული კლარჯეთის ფოლკლორის, ეთნოლოგიის, ისტორიისა და კლარჯული კილოს პრობლემებზე. შრომები და 2013 წლის ზაფხულის კომპლექსური ექსპედიციის მიერ მოპოვებული დიალექტოლოგიური და ფოლკლორული მასალები (ლექსიკონითურთ) დაიბეჭდება ქართველოლოგიის ცენტრის ,,კრებულის” VIII ტომში.

საქართველოში აკრედიტებულ უმაღლეს საგანმანათლებლო დაწესებულებებს შორის 2014 წლის სტუდენტური ლიგის შესარჩევი ეტაპის მორიგი შეხვედრა ფუტსალში ბათუმის შოთა რუსთაველის სახელმწიფო უნივერსიტეტის გამარჯვებით დასრულდა. ზუგდიდში გამართული თამაშში შოთა მესხიას სახელობის უნივერსიტეტის ნაკრები დამარცხდა ანგარიშით 3:2. სტუდენტური ლიგის პირველი ტურის გამარჯვებული გუნდი ასპარეზობას უმაღლეს ლიგაში განაგრძობს. პირველობა საქართველოს საუნივერსიტეტო სპორტის ფედერაციის, საქართველოს ფუტსალის ასოციაციის, საქართველოს სპორტისა და ახალგაზრდობის საქმეთა სამინისტროს ორგანიზებითა და კომპანია „ბილაინის“ მხარდაჭერით ტარდება.

ბათუმის შოთა რუსთაველის სახელმწიფო უნივერსიტეტის დელეგაცია სამდღიანი ვიზიტით პროგრამის ,,სახელმწიფო და კერძო სასწავლებლების საგანმანათლებლო სისტემები თურქეთში’’ ეგიდით თურქეთის რესპუბლიკაში, ქალაქ სტამბულში იმყოფებოდა. უმაღლესი საგანმანათლებლო დაწესებულების რექტორი, ფაკულტეტის დეკანები და პროგრამის კორდინატორი ემზარ მაკარაძე მარმარასა და ფათიჰის უნივერსიტეტებს ეწვივნენ. ვიზიტის ფარგლებში უნივერსიტეტის რექტორმა, პროფესორმა ალიოშა ბაკურიძემ და ფათიჰის უნივერსიტეტის ვიცე-რექტორმა, პროფესორმა ფეჰრეთინ გუცინმა თანამშრომლობის მემორანდუმს მოაწერეს ხელი. ხელშეკრულება ითვალისწინებს პროფესორ-მასწავლებლებისა და სტუდენტების გაცვლასა და ერთობლივი სამეცნიერო-კვლევა ძიების წარმოებას ბიოლოგიისა და მედიცინის მიმართულებით. მარმარას უნივერსიტეტში რექტორთან, პროფესორ ზაფერ გულისთან შეხვედრისას დაიგეგმა ,,მევლანას’’ გაცვლითი პროგრამის ფარგლებში მემორანდუმის გაფორმება.

ამერიკის შეერთებული შტატების სამხედრო საზღვაო ხომალდის "Mount Whitney"-ის ბენდის კონცერტი გაიმართა ბათუმის შოთა რუსთაველის სახელმწიფო უნივერსიტეტში. ღონისძიებას საქართველოში ამერიკის შეერთებული შტატების საგანგებო და სრულუფლებიანი ელჩი რიჩარდ ნორლანდი, უნივერსიტეტის რექტორი, პროფესორი ალიოშა ბაკურიძე, ქალაქ ბათუმის მერი ჯემალ ანანიძე, პროფესორ-მასწავლებლები, სტუდენტები და საზოგადოების წარმომადგენლები ესწრებოდნენ. კონცერტის დასასრულს დიპლომატიური კორპუსის წარმომადგენელი უმაღლესი საგანმანათლებლო დაწესებულების ამერიკის შესწავლის ცენტრს ეწვია, ორი ქვეყნის მეგობრულ ურთიერთობებზე ისაუბრა და სურვილი გამოხატა მომავალი ვიზიტის ფარგლებში სტუდენტებთან შეხვედრისა.

7-8 ნოემბერს ბათუმის შოთა რუსთაველის სახელმწიფო უნივერსიტეტის რექტორის მოადგილე პროფესორი ირაკლი ბარამიძე მიწვეული იყო თურქეთის რესპუბლიკის ანადოლუს უნივერსიტეტში დისტანციური სწავლების 30 წლის საიუბილეო კონფერენციაზე. ვიზიტის ფარგლებში უნივერსიტეტებს შორის გაფორმდა თანამშრომლობის მემორანდუმი. მხარეები ერთობლივი სასწავლო-სამეცნიერო პროგრამებისა და პროექტების განხორციელებაზე შეთანხმდნენ.