ახალი ამბები

ბათუმის შოთა რუსთაველის სახელმწიფო უნივერსიტეტის განათლებისა და მეცნიერებათა ფაკულტეტის ბიოლოგიის დეპარტამენტისა და ივანე ჯავახიშვილის თბილისის სახელმწიფო უნივერსიტეტის ზუსტ და საბუნებისმეტყველო მეცნიერებათა ფაკულტეტის უჯრედული და მოლეკულური ბიოლოგიის კათედრის ერთობლივი IV სკოლა-სემინარი "ბიომედიცინის აქტუალური საკითხები" ჩატარდა. სკოლა–სემინარი 2006 წლიდან იმართება და მასში ქვეყნის სხვადასხვა უმაღლესი საგანმანათლებლო დაწესებულების ახალგაზრდა მკვლევრები და სტუდენტები მონაწილეობენ. სამი დღის განმავლობაში ახალგაზრდები ბიომედიცინის უახლეს მიღწევებთან ერთად კვლევის შედეგებს გაეცნენ და ერთმანეთს გამოცდილება გაუზიარეს. სკოლა-სემინარის მონაწილეების მოხსენებები კრებულის სახით დაიბეჭდება. "ბიომედიცინის აქტუალური საკითხები" ბსუ-ს სტუდენტური თვითმმართველობის მხარდაჭერით გაიმართა.

საქართველოს განათლებისა და მეცნიერების მინისტრის მოადგილემ თამარ სანიკიძემ, უმაღლესი განათლებისა და მეცნიერების განვითარების დეპარტამენტის უფროსმა მამუკა ბერიაშვილმა და სამინისტროს წარმომადგენლებმა ბათუმის შოთა რუსთაველის სახელმწიფო უნივერსიტეტში განათლებისა და მეცნიერების რეფორმების სამოქმედო გეგმა წარადგინეს. რექტორთან, პროფესორ ალიოშა ბაკურიძესთან და პროფესორ-მასწავლებლებთან ერთად, უმაღლესი განათლების შესახებ კანონში შესატანი ცვლილებების პროექტი განიხილეს. საკანონმდებლო სიახლის მიხედვით, იცვლება უმაღლესი საგანმანათლებლო დაწესებულებების სტატუსი, მმართველობითი ორგანოები, შეფასების სისტემა, რექტორისა და დეკანის საკვალიფიკაციო მოთხოვნები, აკადემიური პერსონალის შემადგენლობა. რეფორმის შემდეგ დარეგულირდება სახელფასო პოლიტიკა, საბიუჯეტო პროცესის გამჭირვალობა, ცვლილებები შევა შოთა რუსთაველის ეროვნული სამეცნიერო ფონდის საგრანტო პროექტების გაცემის წესსა და დაფინანსებაში. შეხვედრა დიალოგის რეჟიმში წარიმართა და სამინისტროს წარმომადგენლებმა პროფესორ-მასწავლებლების აქტუალურ შეკითხვებს უპასუხეს.

ბათუმის შოთა რუსთაველის სახელმწიფო უნივერსიტეტს გდანსკის მენეჯმენტის განვითარების ფონდის დირექტორი ტომას ჰარაცკიევიჩი და ფონდის წარმომადგენელი საქართველიოში, პროფესორი ზურაბ ჩელებაძე ეწვივნენ. რექტორის მოადგილესთან, ირაკლი ბარამიძესთან და ადმინისტრაციის წარმომადგენლებთან გამართულ შეხვედრაზე მხარეები ბიზნესის ადმინისტრირების მიმართულებით პოსტდიპლომური განათლების ერთობლივი საგანმანათლებლო პროგრამის შემუშავებაზე შეთანხმდნენ. ასევე განიხილეს პროექტის განხორციელებისათვის საჭირო მოსამზადებელი სამუშაოების ჩატარებისა და გდანსკის უნივერსიტეტთან (პოლონეთი) სამომომავლო თანამშრომლობის საკითხები. ერთობლივი პროგრამის ფარგლებში, ბაკალავრებსა და მაგისტრებს ბსუ-ს ბაზაზე შეეძლებათ კვალიფიკაციის ასამაღლებელი კურსის გავლა. გაიცემა საერთაშორისო სერტიფიკატი, რაც ხელს შეუწყობს კურსდამთავრებულთა უცხოეთში დასაქმებას.

ტემპუსის საგრანტო პროექტის „ინტერნაციონალიზაციისა და უმაღლეს განათლებაში ხარისხის უზრუნველყოფის შედარებითობის ხელშეწყობა (PICQA)” ფარგლებში ევროპის პარტნიორი უმაღლესი საგანმანათლებლო დაწესებულებების წარმომადგენლები უნივერსიტეტის რექტორს, პროფესორ ალიოშა ბაკურიძეს, ადმინისტრაციის ხელმძღვანელს ედიშერ ჩავლეიშვილსა და რექტორის მოადგილეებს შეხვდნენ. გერმანიის აკრედიტაციის საბჭოს ინჟინერიის, ინფორმატიკის, საბუნებისმეტყველო მეცნიერებებისა და მათემატიკის მიმართულებების ექსპერტებმა იანა მოერინიმ და ბიგირიტ ჰანიმ, საფრანგეთის აკრედიტაციის სააგენტოს წარმომადგენელმა ლიზა ბიდანოვამ, როტერდამის უნივერსიტეტის პროფესორმა ასტრიდ ჰარტმანიმ, განათლების ხარისხის განვითარების ეროვნული ცენტრის წარმომადგენელმა ნინო კოპალეიშვილმა შეხვედრაზე პროექტის განხორციელების პირობებსა და შედეგებზე ისაუბრეს. ვიზიტის ფარგლებში უცხოელმა ექსპერტებმა უნივერსიტეტის პროფესორ-მასწავლებლებისათვის სემინარი ჩაატარეს თემებზე: „ხარისხის უზრუნველყოფის შიდა და გარე მექანიზმების ურთიერთობა“ და „დაინტერესებულ მხარეებთან ურთიერთობა“

სრულიად საქართველოს კათოლიკოს-პატრიარქი, უწმიდესი და უნეტარესი ილია II ბათუმის შოთა რუსთაველის სახელმწიფო უნივერსიტეტს ეწვია. უმაღლესი საგანმანათლებლო დაწესებულების აკადემიური საბჭოს გადაწყვეტილებით, მცხეთა-თბილისის მთავარეპისკოპოსს და ბიჭვინთისა და ცხუმ-აფხაზეთის მიტროპოლიტს ილია II-ს საპატიო დოქტორის წოდება მიენიჭა. უნივერსიტეტის რექტორმა, პროფესორმა ალიოშა ბაკურიძემ პატრიარქს დაბადებიდან 80 და აღსაყდრებიდან 35 წლის იუბილე მიულოცა, მის ღვაწლზე, უნივერსიტეტის განვითარებაში შეტანილ წვლილზე ისაუბრა, შოთა რუსთაველის მედალი და კრებული „აჭარული საუნჯე“ გადასცა. უწმიდესსა და უნეტარესს მიესალმნენ აჭარის ა.რ. მთავრობის თავმჯდომარე არჩილ ხაბაძე, უნივერსიტეტის ემერიტუს-პროფესორი შუშანა ფუტკარაძე, კულტურისა და ხელოვნების განვითარების ფონდის „წმიდა ანდრიას ჯვრის“ დირექტორი მათე ტაკიძე და სტუდენტი ქეთევან დევაძე. სრულიად საქართველოს კათოლიკოს-პატრიარქმა, უწმიდესმა და უნეტარესმა ილია II-მ სტუდენტები, პროფესორ-მასწავლებლები და სრულიად საქართველო დალოცა და უნივერსიტეტს წმიდა ნიკოლოზის ხატი აჩუქა.