ახალი ამბები

გერმანიის აკადემიური გაცვლის სამსახურის - DAAD-ის მხარდაჭერითა და ბათუმის შოთა რუსთაველის სახელმწიფო უნივერსიტეტის ორგანიზებით გერმანისტიკის მიმართულების დოქტორანტთა მეორე კონფერენცია გაიმართა. სესიაზე საქართველოს სხვადასხვა უმაღლესი საგანმანათლებლო დაწესებულების დოქტორანტებმა სადოქტორო ნაშრომების პროექტები წარმოადგინეს და კვლევის მეთოდოლოგიასთან ერთად კვლევის პროცესში წამოჭრილი პრობლემების დაძლევის გზები განიხილეს. მომავალმა მკვლევრებმა ასევე ისაუბრეს დოქტორანტთა მხარდამჭერი საერთაშორისო დონორი ორგანიზაციების საგრანტო პროექტებზე. კონფერენციის მუშაობაში გერმანიის აკადემიური გაცვლის სამსახურის საინფორმაციო ცენტრის ხელმძღვანელი, პროფესორი ელიზაბეთ ფენორი და DAAD-ის პროფესორი თურქეთში (ათათურქის უნივერსიტეტი) ენრიკო ლიპმანი მონაწილეობდნენ.

ბათუმის შოთა რუსთაველის სახელმწიფო უნივერსიტეტის და პროფესორებს: რეზო დიასამიძეს, ოთარ გოგოლიშვილს, ემერიტუს-პროფესორ ბიჭიკო დიასამიძეს დამსახურებული მოღვაწის და ემერიტუს-პროფესორ აკაკი ბერიძეს საპატიო ბათუმელის წოდება მიენიჭათ. თვითმმართველი ქალაქის - ბათუმის საკრებულოს გადაწყვეტილებით, დღესასწაულის - „ბათუმობა - 2013“ - ფარგლებში უმაღლესი საგანმანათლებლო დაწესებულების პროფესორ-მასწავლებლებმა საპატიო წოდება განათლებასა და მეცნიერებაში შეტანილი განსაკუთრებული წვლილისათვის მიიღეს. უნივერსიტეტის რექტორატი, აკადემიური პერსონალი და ადმინისტრაცია დამსახურებულ მოღვაწეებს ულოცავს წარმატებას.

„ბათუმობის“ დღესასწაულზე მოწვეული სტუმრები ბათუმის შოთა რუსთაველის სახელმწიფო უნივერსიტეტს ეწვივნენ და პროფესორ-მასწავლებლებს შეხვდნენ. უმაღლესი საგანმანათლებლო დაწესებულების რექტორმა, პროფესორმა ალიოშა ბაკურიძემ, საქართველოს პარლამენტის ვიცე-სპკერმა მურმან დუმბაძემ, ქალაქ ბათუმის საკრებულოს თავმჯდომარემ ირაკლი ჩავლეიშვილმა, ქალაქ ბათუმის მერმა ჯემალ ანანიძემ, აჭარის უმაღლესი საბჭოს თავმჯდომარემ ავთანდილ ბერიძემ, აჭარის ა.რ. განათლების, კულტურისა და სპორტის მინისტრმა გიორგი თავამიშვილმა, უცხოეთიდან მოწვეულმა სტუმრებმა უნივერსიტეტის განსაკუთრებულ მნიშვნელობაზე ისაუბრეს და ხაზი გაუსვეს ბათუმის განვითარებაში შეტანილ წვლილზე. უნივერსიტეტის რექტორმა უცხოეთში მოღვაწე წარმატებულ ქართველ პროფესორებს ბსუ-ში „სტუმარი პროფესორის“ სტატუსით ლექციების ჩატარება შესთავაზა. ღონისძიების ფარგლებში ასევე გაიმართა "დედა ენის" უნიკალური გამოცემების პირველი გამოფენა. კერძო კოლექციონერმა ლევან თაქთაქიშვილმა უნივერსიტეტის ფოიეში სხვადასხვა პერიოდში გამოცემული 50-მდე წიგნი წარმოადგინა, მათ შორის, იაკობ გოგებაშვილის სიცოცხლეში დაბეჭდილი "დედა ენა".

ბათუმის შოთა რუსთაველის სახელმწიფო უნივერსიტეტის, ფრანკფურტის ლინგვისტური წრისა და ფრანკფურტის იოჰან ვოლფგანგ გოეთეს უნივერსიტეტის ორგანიზებით ქართველოლოგიის მეორე საზაფხულო სკოლა ,,კორპუსის ლინგვისტიკა და ქართველოლოგიის პრობლემები“ გაიხსნა. რვადღიანი საზაფხულო სკოლა ორი მიმართულებით იმუშავებს: ,,ქართული ენის ეროვნული კორპუსი - პროცესი და პროდუქტი“ და ,,ქართველოლოგიის სპეციალური პრობლემები კორპუსთან მიმართებაში - უარყოფა, მოდალობა, ევიდენციალობა“. საზაფხულო სკოლა მიზანად ისახვს ქართული ენის ეროვნული კორპუსის შექმნის პროცესისა და გამოყენების გაცნობასა და დანერგვას, როგორც ტექნოლოგიური ისე ლინგვისტური პერსპექტივებიდან გამომდინარე. ქართველი და გერმანელი პროფესორ-მასწავლებლები საქართველოს წამყვანი უნივერსიტეტების 60-მდე სტუდენტს თეორიულ კურსებთან ერთად მონაცემთა ბაზების გამოყენების პრაქტიკულ ჩვევებს გააცნობენ. პროგრამის ფარგლებში ცნობილი მეცნიერები იოსტ გიბერტი (ფრანკფურტი) და პაულ მოირერი (ბერგენი) კორპუსის ლინგვისტიკაში ვორკშოფს ჩაატარებენ. მონაწილეებს ფრანკფურტის უნივერსიტეტის საერთაშორისო სერტიფიკატი გადაეცემათ.

ტემპუსის პროექტების წევრებმა უნივერსიტეტის რექტორს, პროფესორ ალიოშა ბაკურიძეს და რექტორის მოადგილეს სამეცნიერო დარგში ნათია წიკლაშვილს "სამაგისტრო პროგრამა - უმაღლესი განათლების რეფორმის ლიდერების მომზადება“ - ,,MAHATMA" და ,,უნივერსიტეტის მართვის ინტეგრირებული სისტემები“ -,,INURE" მიმდინარეობის შესახებ ანგარიშები წარუდგინეს. პროექტში ,,MAHATMA“ ჩართულია სამი ევროპული უნივერსიტეტი და ორი პროფესიული განვითარების ცენტრი, ასევე ოთხი უმაღლესი სასწავლებელი საქართველოდან და ოთხი სომხეთიდან. პროექტი ითვალისწინებს უმაღლესი განათლების ადმინისტრირებაში სამაგისტრო პროგრამის შემუშავებას, მის დანერგვასა და სტუდენტების გაცვლას პარტნიორ დაწესებულებებში. პროექტის ფარგლებში გაიმართა ერთკვირიანი ტრენინგები საფრანგეთში (ქ. სევრი) და იტალიაში (ქ. პალერმო). ტრენინგებს ესწრებოდნენ პროექტის წევრები: ასოც. პროფ. ლელა თურმანიძე (პროექტის კოორდინატორი), პროფესორები: ლელა თავდგირიძე, გული შერვაშიძე, ასისტენტ პროფესორი ნანა მაზმიშვილი და მასწავლებელი ნინო მიქელაძე. ევროპელი, ქართველი და სომეხი პარტნიორები პროგრამით გათვალისწინებული საერთო სწავლის შედეგებზე შეთანხმდნენ.