ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის არქიტექტურისა და მშენებლობის საგანმანათლებლო პროგრამების სტუდენტებისათვის ჰუმანიტარულ მეცნიერებათა ფაკულტეტის პროფესორმა, ფილოსოფიის დოქტორმა ლალი ზაქარაძემ ღია ლექცია ჩაატარა თემაზე: „ფილოსოფიური ურბანისტიკა - ქალაქის შესახებ ინტერდისციპლინური დისკუსიების პერსპექტივა“. შეხვედრა მიეძღვნა ფილოსოფიის საერთაშორისო დღეს. მომხსენებელმა ისაუბრა ფილოსოფიის საერთაშორისო დღის ისტორიაზე, UNESCO-ს კულტურათა დაახლოების საერთაშორისო ათწლეულის (2013-2023) მიზნებზე და ინიციატივებზე, აკადემიური განათლების კონტექსტში ფილოსოფიისა და ინტერდისციპლინური ცოდნის მნიშვნელობაზე, ფილოსოფიის ახალ პერსპექტივებზე.

სტუდენტებთან ერთად დისკუსირებული იყო ახალი ფილოსოფიური დისციპლინის -  ფილოსოფიური ურბანისტიკის აქტუალური პრობლემები: სიმბოლოსა და არქიტექტურის მიმართება, ურბანისტიკის ფართო გაგება, ქალაქი - სიმბოლო, ქალაქი - კულტურული სივრცე, ურბანული პროცესების სოციალური განზომილება, ქალაქის საზრისი და იდენტობა, ქალაქის იდეის კრიზისი, ექსურბანიზმის და პოსტურბანიზმის თანამედროვე ტენდენციები.

ღონისძიების დასრულების შემდეგ, დარბაზში წარმოდგენილი წიგნები საჩუქრად გადაეცა ტექნოლოგიური ფაკულტეტის ბიბლიოთეკას.