ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტისა და ქალაქ ბათუმის მერიის ორგანიზებით XI საერთაშორისო სამეცნიერო კონფერენცია „ბათუმი – წარსული და თანამედროვეობა“. ონლაინ რეჟიმში გამართულ კონფერენციაში 40-ზე მეტი ქართველი, ამერიკელი, უკრაინელი, პოლონელი, სომეხი და დაღესტნელი მკვლევარი მონაწილეობდა. ორდღიან სემეცნიერო სესიაზე მონაწილეებმა მოხსენებები წარმოადგინეს ბათუმის ისტორიის, არქეოლოგიის, ენათმეცნიერების, რელიგიის, მედიცინის, ტურიზმისა და ნუმიზმატიკის მნიშვნელოვან საკითხებზე.

ბათუმის შოთა რუსთაველის სახელმწიფო უნივერსიტეტი ღრმა მწუხარებას გამოთქვამს ნიკო ბერძენიშვილის ინსტიტუტის ფოლკლორის, დიალექტოლოგიისა და ემიგრანტული ლიტერატურის კვლევის განყოფილების უფროსი მეცნიერ-თანამშრომლის ომარ მემიშიშის გარდაცვალების გამო და თანაუგრძნობს გარდაცვლილის ოჯახს. მრავალმხრივი და ნაყოფიერი იყო ბატონი ომარის სამეცნიერო მოღვაწეობის სფერო. ის იკვლევდა ქართველური და შედარებითი ენათმეცნიერების აქტუალურ საკითხებს. მის არაერთ სამეცნიერო სტატიაში მეცნიერული სიზუსტითა და სიღრმითაა გაანალიზებული ლაზური ენის პრობლემური საკითხები.

დასრულდა მუშაობა ბსუ-ს ნიკო ბერძენიშვილის ინსტიტუტის მიერ სტამბულის ქართულ სავანეში მოპოვებული მასალების გარკვეულ ნაწილზე. მომზადდა მასალათა კრებული „სტამბოლის ქართული სავანის ეპისტოლური და მემუარული მემკვიდრეობა“. წინამდებარე კრებულში (ტომი მეორე) წარმოდგენილია ქალაქ სტამბოლში, ქართველ კათოლიკეთა ეკლესია-მონასტერთან არსებულ ბიბლიოთეკასა და არქივში საიმედოდ დაცული და შემონახული ქართული კულტურული მემკვიდ-რეობის შესანიშნავი ნიმუშები, როგორიცაა: პუბლიცისტური და კერძო წერილები, მემუარული ჩანაწერები, ემიგრაციაში მყოფი საქართველოს რესპუბლიკის ეროვნული მთავრობის საქმიანობის ამსახველი, სხვადასხვა შინაარსისა და დანიშნულების მქონე ისტორიული წყაროები.

ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტმა 1921 წლის 18-20 მარტს ბათუმის განმათავისუფლებელ ბრძოლაში დაღუპულთა ხსოვნისადმი მიძღვნილი სამეცნიერო ონლაინ სემინარი ჩაატარა. ისტორიისა და არქეოლოგიის განყოფილების ხელმძღვანელმა, უფროსი მეცნიერ თანამშრომელ ოლეგ ჯიბაშვილმა მოხსენება წაიკითხა 1921 წლის თებერვალ-მარტში, ბათუმის ირგვლივ განვითარებულ მოვლენებზე, ხოლო, აჭარის ა.რ. უმაღლესი საბჭოს წევრმა, არქეოლოგმა ირაკლი ჩავლეიშვილმა ისაუბრა საბჭოთა პერიოდში დაკარგული ბათუმისათვის დაღუპულთა საძმო საფლავის მოძიებასა და გმირთა ნეშტების ხელმეორედ პატივით დაკრძალვაზე.

ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის დირექტორმა როინ მალაყმაძემ ონლაინ ლექცია ჩაატარა თემაზე: „1921 წლის 25 თებერვალი“. მომხსენებელმა საბჭოთა ოკუპაციაზე, 100 წლის წინ განვითარებულ მოვლენებზე ისაუბრა და გაიხსენა სამშობლოს შეწირული მამულიშვილები. შეხვედრას ესწრებოდნენ მეცნიერები, ახალგაზრდები, პედაგოგები, საზოგადოების წარმომადგენლები საქართველოდან და თურქეთიდან.