ბათუმის შოთა რუსთაველის სახელმწიფო უნივერსიტეტს გადმოეცა აჭარის ტურიზმისა და კურორტების დეპარტემენტის კუთვნილებაში არსებული შენობა პატარა ეზოთი. ქობულეთში, ბაგრატიონის ქუჩაზე N2ა-ში მდებარე შენობაში ფიტოპათოლოგიისა და ბიომრავალფეროვნების ინსტიტუტის კოლხეთის ტორფნარებისა და წყლის ეკოსისტემების კონსერვაციის განყოფილების კოლხეთის ჭარბტენიანი ლანდშაფტების ეკოლოგიის შესწავლის ახალგაზრდა მეცნიერთა სამეცნიერო ცენტრი შეიქმნება. საველე კვლევებზე ორიენტირებული სამეცნიერო ცენტრი მოემსახურება როგორც ქართველ, ისე უცხოელ სტუდენტებს და ახალგაზრდა მეცნიერებს ეკოლოგიის, ბიოლოგიის, გეოგრაფიის, არქეოლოგიის და ეკოტურიზმის მიმართულებით. ცენტრში მოეწყობა საზაფხულო სკოლები, ტრენინგები, სემინარები და ხელს შეუწყობს უნივერსიტეტის მეცნიერებისა და აკადემიური პერსონალისა ინტეგრაციას.

ბათუმის შოთა რუსთაველის სახელმწიფო უნივერსიტეტს ბელარუსიის რესპუბლიკის მოგილევის რეგიონის დელეგაცია ეწვია. სტუმრები რექტორთან მერაბ ხალვაშთან, აჭარის განათლების, კულტურისა და სპორტის მინისტრთან ინგა შამილიშვილთან, რექტორის მოადგილესთან ნათია წიკლაშვილთან და მკვლევრებთან გამართულ შეხვედრაზე უნივერსიტეტის სასწავლო პროგრამებს, საერთაშორისო ურთიერთობებსა და ბსუ-ს სამეცნიერო ინსტიტუტების მიერ განხორციელებული სამეცნიერო პროექტების შედეგებს გაეცნენ. ვიზიტის ფარგლებში, ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა და ბელარუსიის სოფლის მეურნეობის სახელმწიფო აკადემიის რექტორმა პაველ სასკევიჩმა თანამშრომლობის მემორანდუმს მოაწერეს ხელი.

უნივერსიტეტს კაიროს ალ-აზჰარის უნივერსიტეტის პროფესორი, ევროპისა და ხმელთაშუაზღვის სიცოცხლის მეცნიერებების ასოციაციის პრეზიდენტი აზრაფ ხალილი და ალ-აზჰარის უნივერისიტეტის მიკოლოგიისა და ბიოტექნოლოგიების რეგიონალური ცენტრის მკვლევარი ემან ჰელმი ეწვივნენ. შეხვედრაზე დაიგეგმა ერთობლივი კვლევების წარმოება, პროექტების განხოციელება და გაცვლითი პროგრამების ამოქმედება ფიტოპათოლოოგის, ბიომრავალფეროვნებისა და საბუნებისმეტყველო მეცნიერებათა მიმართულებით.

ფიტოპათოლოგიისა და ბიომრავალფეროვნების ინსტიტუტი 70 წლის იუბილეს ულოცავს ბათუმის შოთა რუსთაველის სახელმწიფო უნივერსიტეტის მემბრანული და აგრარული ტექნოლოგიების ინსტიტუტის სასოფლო-სამეურნეო ნედლეულის წარმოებისა და გადამუშავების ტექნოლოგიების განყოფილების უფროსს, მთავარ მეცნიერ-თანამშრომელს, ინსტიტუტის სამეცნიერო საბჭოს თავმჯდომარეს ზურაბ მიქელაძეს. კოლეგები უსურვებენ ბატონ ზურაბს ჯანის სიმრთელეს, წარმატებებს პირად და საზოგადოებრივ ცხოვრებაში, შემოქმედებით ასპარეზზე.

დღეს, აჭარის მთავრობის თავმჯდომარემ ზურაბ პატარაძემ უნივერსიტეტის რექტორთან მერაბ ხალვაშთან და აჭარის განათლების კულტურისა და სპორტის მინისტრთან ინგა შამილიშვილთან ერთად, ქობულეთში ფიტოპათოლოგიის და ბიომრავალფეროვნების კვლევითი ინსტიტუტისთვის გამოყოფილი ტერიტორია დაათვალიერა, ინსტიტუტის მეცნიერ-თანამშრომლებს გაესაუბრა და მათი საქმიანობის შესახებ ინფორმაცია მოისმინა.