3-7 ივლისს, საფრანგეთის ქალაქ ტულუზაში გამართულ საერთაშორისო სიმპოზიუმის მუშაობაში მონაწილეობა მიიღეს ფიტოპათოლოგიისა და ბიომრავალფეროვნების ინსტიტუტის მცენარეთა დაავადებების მონიტორინგისა და დიაგნოსტიკის განყოფილების უფროსმა გალინა მეფარიშვილმა და ამავე განყოფილების მეცნიერ-თანამშრომელმა მაკა მურადაშვილმა. სიმპოზიუმი საკარანტინო კატეგორიის ფიტოპათოგენური ბაქტერიის R. solanacearum - ით გამოწვეულ მცენარეთა ბაქტერიულ დაავადებებს ეძღვნებოდა და მასში 28 ქვეყნის წარმომადგენელი მონაწილეობდა.

ფიტოპათოლოგიისა და ბიომრავალფეროვნების ინსტიტუტს ავსტრალიის ეკონომიკის, ტრანსპორტის და რესურსების სახელმწიფო დეპარტამენტის წამყვანი მეცნიერი, სელექციონერი, ფიტოპათოლოგი მეთიუ როდა ეწვია. მეცნიერი ინსტიტუტში მიმდინარე კვლევით მიმართულებებს გაეცნო და ინსტიტუტის თანამშრომლებთან ერთად ქობულეთის აგროსერვისცენტრი მოინახულა. მეთიუ როდამ ფიტოპათოლოგიისა და ბიომრავალფეროვნების ინსტიტუტთან თანამშრომლობის სურვილი გამოთქვა ზოგიერთი სასოფლო სამეურნეო კულტურების მოვლა-მოყვანის, ნეგატიური ზემოქმედებისაგან დაცვის, კვალიფიკაციის ამაღლების და სხვადასხვა ტრენინგების ჩატარების მიმართულებით.

ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტისა და აჭარის სოფლის მეურნეობის სამინისტროს ორგანიზებით ქობულეთის მუნიციპალიტეტების აგროსერვის ცენტრის ადმინისტრაციის ტერიტორიაზე მცენარეთა ჯანმრთელობის კლინიკა მოეწყო, რაც ფერმერებისა და სხვა დაინტერესებული პირების მიერ წარმოდგენილი სასოფლო-სამეურნეო კულტურების დაავადებების დიაგნოსტირებას და კონსულტირებას ითვალისწინებდა.

19-20 მაისს, საქართველოს ეროვნულ ბოტანიკურ ბაღში ბიომრავალფეროვნების საერთაშორისო დღისადმი მიძღვნილი კონფერენცია „ბიომრავალფეროვნება და საქართველო“ გაიმართა. კონფერენცია სამკურნალო მცენარეთა განყოფილების 100 წლისთავს მიეძღვნა და მასში ბათუმის შოთა რუსთაველის სახელმწიფო უნივერსიტეტთან ერთად ბათუმის ბოტანიკური ბაღი, საქართველოს უმაღლესი საგანმანათლებლო დაწესებულებები და არასამთავრობო ორგანიზაციები მონაწილეობდნენ.
სამეცნიერო მოხსენებები წარმოადგინეს ბათუმის შოთა რუსთაველის სახელმწიფო უნივერსიტეტისა და ბათუმის ბოტანიკური ბაღის წარმომადგენლებმა.

6 მაისს, ბათუმის ბოტანიკური ბაღის ეგზოტურ მცენარეთა დეპარტამენტის საკოლექციო სათბურიდან ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტს 42 სახეობის 216 ნერგი გადაეცა საჩუქრად. ნერგები ინსტიტუტის საკუთრებაში არსებულ სამეცნიერო - კვლევითი საქმიანობისთვის განკუთვნილი ქობულეთის ყოფილი სამკურნალო მცენარეთა ზონალური სადგურის 5,2 ჰა მიწის ნაკვეთის განაშენიანებას ითვალისწინებს.