ბათუმის შოთა რუსთაველის სახელმწიფო უნივერსიტეტსა და ვილნიუსის მიკოლას რომერის უნივერსიტეტს შორის 2014 წელს გაფორმებული თანამშრომლობის მემორანდუმის ფარგლებში მიკოლას რომერის უნივერსიტეტის იურიდიული ფაკულტეტის დეკანის მოადგილე, ასოცირებული პროფესორი რეგინა ვალუტიტე და ბიზნესის სამართლის დეპარტამენტის უფროსი, ასოცირებული პროფესორი ვირგინიუს ბიტე იურიდიულ ეწვივნენ. ფაკულტეტის დეკანი პროფესორი ადამ მახარაძე და ასოცირებული პროფესორი მალხაზ ნაკაშიძე შეხვედრაზე ლიტველ კოლეგებთან ევროპული სამართლის ერთობლივი ინგლისურენოვანი სამაგისტრო პროგრამის შექმნასა და აკრედიტაციაზე შეთანხმდნენ.

ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის სტუდენტებს იურიდიული კლინიკის სერტიფიკატები გადაეცათ. სამართალმცოდნეობის საგანმანათლებლო პროგრამის სხვადასხვა კურსის სტუდენტებმა კლინიკის 6-თვიანი სასწავლო კურსი გაიარეს, შეასრულეს სასწავლო პროგრამით გათვალისწინებული კლინიკის ვალდებულებები და გამოიმუშავეს პრაქტიკული უნარ-ჩვევები. 6 თვის განმავლობაში მომავალმა სამართალმცოდნეებმა მოქალაქეებს აქტიური დახმარება გაუწიეს სხვადასხვა სამართლებრივი პრობლემების მოგვარებასა და იურიდიული დოკუმენტების მომზადებაში.

ბათუმის შოთა რუსთაველის სახელმწიფო უნივერსიტეტის იურიდიულ ფაკულტეტს ევროკომისიის განათლების, აუდიოვიზუალური და კულტურის აღმასრულებელი სააგენტოს (EACEA) წარმომადგენელი, პროგრამების მმართველი, პროექტის მრჩეველი სნეჟინა ნიკოლოვა ეწვია. ფაკულტეტის დეკანთან ადამ მახარაძესთან გამართულ შეხვედრაზე სტუმარმა ევროკომისიის საგრანტო პროექტით მიმდინარე საზაფხულო სკოლის „ევროკავშირის სამართალი სამხრეთ კავკასიაში“ შედეგები გახილა და დადებითად შეაფასა. ვიზიტის ფარგლებში სნეჟინა ნიკოლოვა 2015 წლის საზაფხულო სკოლის სამზადისს გაეცნო და სამომავლო გეგმებზე ისაუბრა.

ბათუმის შოთა რუსთაველის სახელმწიფო უნივერსიტეტის სტუდენტებისათვის ავსტრიის ქალაქ გრაცის უნივერსიტეტის პროფესორმა თომას კრუნსმანმა თანამედროვე პერიოდის აქტუალურ გენდერულ თანასწორობის სამართლებრივ პრობლემაზე ლექცია წაიკითხა ინგლისურ ენაზე. მომხსენებელმა ლექციის დასასრულს სტუდენტების აქტუალურ შეკითხვებს უპასუხა და დისკუსია გაიმართა.

იურიდიული ფაკულტეტის ფუტსალის ნაკრებმა (მინდია ლემსაძის, გიორგი დავითაძის, კოხტა ხუჯაძის, მინდია ხუჯაძის და დავით კეკელიძის შემადგენლობით) ბათუმის შოთა რუსთაველის სახელმწიფო უნივერსიტეტის 80 წლის იუბილესადმი მიძღვნილ პირველობაში მიიღო მონაწილეობა. სამართალმცოდნეობის სპეციალობის სტუდენტები ფინალურ შეხვედრაში ტურიზმის ფაკულტეტის გუნდს დაუპირისპირდნენ, რომლის რამდენიმე წევრი უნივერსიტეტის ნაკრების ღირსებას იცავს და საქართველოს უმაღლეს სასწავლებლებს შორის ჩემპიონები არიან. თამაში ანგარიშით 5:6 დასრულდა და იურიდიული ფაკულტეტის ფუტსალის ნაკრებმა მეორე ადგილი დაიკავა. ფაკულტეტის დეკანატი მადლობას უხდის გუნდს მიღწეული შედეგისთვის, უსურვებს მათ შემდგომ წარმატებებს და ულოცავს ფაკულტეტს მეორე საპატიო ადგილს.