საარჩევნო სისტემათა საერთაშორისო ფონდის (IFES-ი) ექსპერტმა გენდერის საკითხებში ირინა ჟვანიამ საჯარო ლექცია წაიკითხა თემაზე: „გენდერული თანასწორობის საკითხები - ქალის როლის მნიშვნელობა საზოგადოების განვითარებაში“. ღონისძიებას ბათუმის შოთა რუსთაველის სახელმწიფო უნივერსიტეტის სტუდენტებთან და პროფესორ-მასწავლებლებთან ერთად, USAID-ის დემოკრატიის და მმართველობის სამსახურის დირექტორი დანიელ რეიფი ესწრებოდა. IFES-ის ეგიდით საჯარო ლექციები დემოკრატიის, ადამიანის უფლებების, კარგი მმართველობისა და გენდერული თანასწორობის საკითხების შესახებ საქართველოს სხვადასხვა უნივერსიტეტსა და სკოლაში ტარდება. პროგრამა შშ-ს საერთაშორისო განვითარების სააგენტოს მხარდაჭერით „საარჩევნო სისტემების გაძლიერების“ პროექტის ფარგლებში მიმდინარეობს, რომელსაც საარჩევნო სისტემათა საერთაშორისო ფონდი ახორციელებს.

თბილისის თავისუფალი უნივერსიტეტის ბიზნეს სამართლის ეროვნულმა ცენტრმა სამართლის სწავლების ინსტიტუტის ფარგლებში ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის პროფესორ-მასწავლებლებისათვის სამართლის სწავლების მეთოდოლოგიის თემაზე ტრენინგი ჩატარდა. სწავლებაზე ისეთი საკითხები განიხილეს, როგორიცაა: აქტიური სწავლების მეთოდი, როლური თამაშები და იმიტირებული სასამართლო პროცესები, კაზუსებით სწავლება და შეფასების რუბრიკები.

ბათუმის შოთა რუსთაველის სახელმწიფო უნივერსიტეტის იურიდიულ ფაკულტეტთან კრიმინალისტიკის სასწავლო კაბინეტ-ლაბორატორია გაიხსნა. სასწავლო-პრაქტიკული სამუშაოები წარიმართება კრიმინალისტიკური ტექნიკის ძირითად მიმართულებაში - ტრასოლოგიაში (მოძღვრება კვალთა შესახებ). ბაკალავრიატისა და მაგისტრატურის სტუდენტები დაეუფლებიან ხილვადი, ნაკლებად ხილვადი და უხილავი კვალის აღმოჩენის, კვალის ფიქსირების, ამოღების, შეფუთვის, მის პროცესუალურ გაფორმებისა და გამოკვლევის უნარ-ჩვევებს. სასწავლო პროცესში გამოიყენება მეთოდი „სწავლება კეთებით“. კრიმინალისტიკის სასწავლო კაბინეტ-ლაბორატორიის ბაზაზე ასევე განხორციელდება ორი მოკლევადიანი საგანმანათლებლო პროგრამა: ჟურნალისტური გამოძიება და დეტექტივ-კრიმინალისტი.

სამართალმცოდნეობის სპეციალობის სტუდენტმა რამინ მაჭარაშვილმა ინდონეზიის დედაქალაქ ჯაკარტაში გამართულ შეზღუდული შესაძლებლობის მქონე პირების (შშმპ) საარჩევნო უფლებებისადმი მიძღვნილ კონფერენციაში მიიღო მონაწილეობა. სხვადასხვა ქვეყნისა და არასამთავრობო ორგანიზაციების წარმომადგენლებმა ერთმანეთს გამოცდილება გაუზიარეს და არსებული პრობლემების გადაჭრის გზებზე იმსჯელეს. მომავალმა სამართალმცოდნემ ორდღიან საერთაშორისო სესიაზე მოხსენება წარადგინა თემაზე: ,,ახალგაზრდების როლი შშმ პირთა პრობლემების მოგვარებაში“. კონფერენცია IFES-ის, ავსტრალიის საელჩო ინდონეზიაში და ASEAN-ის (აზია წყნარიოკეანის ქვეყნების ასოციაცია) ორგანიზებით გაიმართა.

ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის II კურსის სტუდენტი გრიგოლ გაგუა სხვადასხვა ჩემპიონატის გამარჯვებულია. მომავალმა სამართალმცოდნემ საქართველოს პირველობაზე კრივში მესამე ადგილი დაიკავა, ხოლო ბათუმში გამართულ დამსახურებული მწვრთნელის რაზმიკ პეტროსიანის სახელობის ტურნირში პირველობა მოიპოვა. უმაღლესი საგანმანათლებლო დაწესებულება ულოცავს გრიგოლ გაგუას გამარჯვებას და უსურვებს წარმატებებს.