საქართველოში სამკურნალო მცენარეების გამოყენებას უძველესი ისტორია აქვს. პირველი სამკურნალო მცენარეების ბაღი, რომელიც ცნობილია ჰეკატეს ბაღის სახელწოდებით, მდებარეობდა კოლხეთში. მედიცინა უძველეს წარსულში სწორედ აქ ჩაისახა. ამიტომაა, რომ გერმანელი ექიმი, ბოტანიკოსი და მედიცინის ისტორიის მკვლევარი კურტ შპრენგელი თავის ხუთ ტომეულში მსოფლიოს მედიცინის ისტორიას ძველი კოლხეთის მედიცინით იწყებს. ტერმინი „მედიცინა“ კოლხი ასულის, განთქმული მკურნალის - მედეას სახელს უკავშირდება. რომელსაც სამკურნალო მცენარეების ბაღი ჰქონდა გაშენებული ჩვენს წელთაღრიცხვამდე XIII-XII ს-ში. ავტორის აღწერით იქ 41 სამკურნალო და შხამიანი მცენარე ხარობდა. დღეისათვის ამ მცენარეთა ნომენკლატურა გვარების დონემდეა დადგენილი, ზოგჯერ კი სახეობებიცაა მითითებული.

ატოპიური დერმატიტი არის კანის ქრონიკული, ალერგიული დაავადება, დამახასიათებელი სტადიური მიმდინარეობით და სხვადასხვა ასაკობრივ ჯგუფში განსხვავებული კლინიკური გამოვლინებებით. ატოპიური დერმატიტის განვითარებაში ენდოგენურ ფაქტორებს შორის მნიშვნელოვანია გენეტიკური წინასწარგანწყობა, ატოპიის ოჯახური შემთხვევები, ხოლო ეგზოგენურ ფაქტორებს შორის უნდა აღინიშნოს გარემო ფაქტორები, საყოფაცხოვრებო პირობები, სხვადასხვა მედიკამენტოზური, კვებითი ან საყოფაცხოვრებო ალერგენი, კანის გამოშრობა და მისი არასწორი მოვლა და სხვა.

სემინარის თემა ერთი ნაწილია კვლევისა, რომელიც მიზნად ისახავს რიზეს რეგიონის ფაზარის რაიონის სოფელ ჰამიდიეში მცხოვრებ ქობულეთელ მუჰაჯირთა შთამომავლების მეტყველების, ფოლკლორის, ყოფის, ისტორიის, მატერიალური კულტურის შესწავლას.
ჰამიდიეს ქართული ყველაზე ახლოს დგას აჭარის ქობულეთის მეტყველებასთან. ჰამიდიელი ქართველი მუჰაჯირები აჭარულ დიალექტზე, მეტწილად ქობულეთურ კილოკავზე, მეტყველებენ.
ჩვენი მიზანია, დავადგინოთ, თუ როგორ მეტყველებენ ჰამიდიელები, რა ხარისხით ცოცხლობს მათში საკუთრივ ქობულეთური და რით განსხვავდება ჰამიდიეს ქართული სხვა რეგიონებში მცხოვრები ქობულეთელი მუჰაჯირების მეტყველებისგან; როგორია ჰამიდიეს ქართულის ენობრივი სტრუქტურა და კონტაქტები თურქულთან.

„აღმოსავლეთი აღმოსავლეთია, დასავლეთი – დასავლეთი და ისინი ვერასოდეს გაუგებენ ერთმანეთს“ - ასე ფიქრობდა ორივე სამყაროს დიდებული მცოდნე რადიარდ კიპლინგი. რა თქმა უნდა, მას შემდეგ მრავალი ათწლეული გავიდა, პოსტინდუსტრიულმა, ინფორმაციულმა ეპოქამ ეს მკვეთრი განსხვავებანი თითქოს წაშალა აღმოსავლეთსა და დასავლეთს შორის, მაგრამ პოსტმოდერნისტი მწერლები, მათ შორის, ორჰან ფამუქიც, კიპლინგის ციტირებას ახდენს: ჯერ კიდევ „აღმოსავლეთი – აღმოსავლეთია, დასავლეთი – დასავლეთი“, თუმცა თან დასძენს: „ერთიც ალაჰისაა და – მეორეც.“

პროცესების ოპტიმალური მართვის თეორიის ინტენსიური განვითარება დაფუძნებულია მის მრავალმხრივ გამოყენებებზე. პროცესების უმრავლესობა, რომელთანაც გვაქვს საქმე პრაქტიკაში, მართვადია და ამიტომაც მათი რეალიზაციისას მნიშვნელოვანია მივიღოთ ოპტიმალური გადაწყვეტილება. საუკეთესო გადაწყვეტილების პოვნა და შესაბამისი პროგრამული ფუნქციების შექმნის საჭიროება არსებობს ყველგან. ხშირად პრაქტიკულად მნიშვნელოვანი პროცესები აღიწერებიან არალოკა-ლური სასაზღვრო პირობების მქონე კერძოწარმოებულიანი დიფერენციალური განტოლებებით. არალოკალური სასაზღვრო ამოცანები ბუნებრივი სახით მიიღებიან რეალური პროცესებისა და მოვლენების მათემატიკური მოდელების აგებისას სიმკვ-რივის თეორიიდან, დიფუზური პროცესებიდან, ქიმიური რეაქციის კინეტიკის, დრეკადობისა და გარსთა თეორიიდან და სხვა. საკმაოდ ხშირად გვხდება არა-ლოკალური სასაზღვრო ამოცანები მათემატიკური მოდელირებისას ბიოლოგიაშიც. კერძოდ, ასეთი ამოცანები მიიღება მიკრობების პოპულაციის გამრავლების პროცესების მოდელირებისას. ამიტომაც ასეთი სისტემების მართვის პრობლემების შესწავლა, რომელიმე პროგრამულ გარემოში შესაბამისი მართვის სისტემების ფუნქ-ციების შექმნა, მეტად მნიშვნელოვანია.