იურიდიული და სოციალურ მეცნიერებათა ფაკულტეტის სტუდენტებმა მონაწილეობა მიიღეს 27-30 მაისს გამართულ კონრად ადენაუერის ფონდის პოლიტიკური განათლების აკადემიის შეხვედრაში - „პოლიტიკა და მოლაპარაკებები“. ახალგაზრდებს შესაძლებლობა მიეცათ ინტერაქტიული სავარჯიშოების და როლური თამაშების მეშვეობით გაეაზრებინათ, თუ როგორ ხდება განსხვავებული ინტერესების მქონე პოლიტიკურ ჯგუფებთან თანამშრომლობა და კომპრომისებზე წასვლა საერთო კონსესუსის მისაღწევად. კონრად ადენაუერის ფონდის პოლიტიკური განათლების აკადემია მიზნად ისახავს ახალგაზრდებში პოლიტიკური განათლების ხელშეწყობასა და პოპულარიზაციას.

ბათუმის შოთა რუსთველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის პროფესორმა მურმან გორგოშაძემ საქართველოს დამოუკიდებლობის დღისადმი მიძღვნილ ღონისძიებაში მიიღო მონაწილეობა. პროფესორმა მურმან გორგოშაძემ საჯარო ლექცია წაიკითხა თემაზე: „კანონმდებლობა მშობლიური ენის შესახებ 1918-1921 წლებში“. მომხსენებლი სტუდენტებსა და პროფესორ-მასწავლებლებს ენის პრინციპების დაცვასა და საკანონმდებლო ნორმათა შესრულების აუცილებლობაზე ესაუბრა.

ბერლინის თავისუფალი უნივერსიტეტის პროფესორმა იან ქოლერმა იურიდიული და სოციალურ მეცნიერებათა ფაკულტეტის საერთაშორისო ურთიერთობებისა და ევროპისმცოდნეობის სპეციალობის სტუდენტებისათვის საჯარო ლექცია ჩაატარა თემაზე: „კონფლიქტების კვლევის ინსტიტუციური მიდგომა“. პროფესორმა იან ქოლერმა ახალგაზრდებს გააცნო ფორმალური და არაფორმალური ინსტიტუტების როლი სოციალური წესრიგის ინჟინერინგში.

ბათუმის შოთა რუსთაველის სახელმწიფო უნივერსიტეტის იურიდიულ და სოციალურ მეცნიერებათა ფაკულტეტის ასოცირებულმა პროფესორმა გივი აბაშიძემ მონაწილეობა მიიღო 24-25 მაისს თბილისში, საქართველოს მეცნიერებათა ეროვნულ აკადემიაში გამართულ საერთაშორისო სამეცნიერო კონფერენციაში „კრიმინოლოგიის მნიშვნელობა სახელმწიფოში და მისი ადგილი მეცნიერებათა სისტემაში“. სესიის მუშაობაში ქართველი მეცნიერებთან ერთად კრიმინოლოგიური დარგის ცნობილი უცხოელი მეცნიერები მონაწილეობდნენ. ასოცირებულმა პროფესორმა გივი აბაშიძემ კონფერენციის ორგანიზატორებს გადასცა ბსუ-ს რექტორის მერაბ ხალვაშის მისალმების ადრესატი და გამოვიდა მოხსენებით „კრიმინოლოგიის მნიშვნელობა, მისი ადგილი და როლი დამნაშავეობის წინააღმდეგ ბრძოლის საქმეში“.

ბათუმის შოთა რუსთაველის სახელმწიფო უნივერსიტეტში ახალი საბაკალვრო საგანმანათლებლო პროგრამის საჯარო მმართველობის შემუშავების ფარგლებში გარე შეფასების მიზნით გაიმართა პროგრამის მიზნების, შედეგების განხილვა ბერლინის თავისუფალი უნივერსიტეტის პროფესორთან იან ქიოლერთან. სამუშაო ჯგუფის ხელმძღვანელმა ასოცირებულმა პროფესორმა ირაკლი მანველიძემ იონ ქიოლერს გააცნო საგანმანთლებლო პროგრამის სტრუქტურა, კურიკულუმი, სასწავლო კურსები, პროგრამის მიზნები, ამოცანები, დასაქმების ბაზრის და დამსაქმებელთა მოთხოვნების ანალიზი. შეხვედრაზე პროფესორმა იან ქოლერმა დადებითად შეაფასა საგანმანათლებლო პროგრამა და გამოთქვა სურვილი, სასწავლო კურიკულუმში აისახოს კონფლიქტების და ძალადობის ამსახველი კურსები, რადგან ძალადობისა და კონფლიქტების რისკების ზრდის პირობებში აუცილებელია თანამედროვე საჯარო მოხელეს ჰქონდეს შესაბამისი ცოდნა და უნარები.