ახალი ამბები

3-17 მარტს ისრაელში, თელავივში „Erasmus+“-ის ინსტიტუციური განვითარების პროექტის „სწავლების ოპტიმიზაცია და აკადემიური ინკლუზია დისტანციური სწავლისა და სწავლების გამოყენებით“ (LoveDistance) კონსორციუმის შეხვედრა გაიმართა. შეხვედრას პროექტის სამივე პარტნიორი ორგანიზაცია - ლევინსკის განათლების კოლეჯი, ონოს აკადემიური კოლეჯი და თელავივის უნივერსიტეტი მასპინძლობდა. შეხვედრის მიზანი იყო პროექტის ფარგლებში ჩატარებული სამუშაოების შეჯამება და მიმდინარე პროცესების განხილვა როგორც შინაარსობრივ, ასევე მენეჯმენტის ჭრილში. შეხვედრაში ბსუ-დან პროექტში ჩართული პერსონალი - ნანა მაკარაძე, ირაკლი კორძაია, ამირან შარაძე და ნინო მიქელაძე მონაწილეობდნენ.

14-16 მარტს „ერაზმუს+“-ის რურდის პროგრამის მონაწილეები ბსუ-დან დაესწრნენ ვიტაუტას მაგნუსის უნივერსიტეტში (კაუნასი, ლიეტუვა) გამართულ სამუშაო შეხვედრებს. პროექტის კოორდინატორი ბსუ-ში, ასოცირებული პროფესორი ხათუნა ბერიძე, ჰუმანიტარულ მეცნიერებათა ფაკულტეტის დეკანი, პროფესორი მარინა გიორგაძე და პროექტის მკვლევარი ლევან ტარიელაძე გაეცნენ პროექტის განხორციელებასა და მართვასთან დაკავშირებულ საკითხებს. შეხვედრებზე განხილული იყო რექტორთა კონფერენციის განხორციელებული და სამომავლო აქტივობები, უნივერსიტეტი-მუნიციპალიტეტის თანამშრომლობის, კულტურული მემკვიდრეობის, სპორტის, საერთაშორისო თანამშრომლობის, ტურიზმის, საწარმოთა პრაქტიკის ცენტრის „MINDED VDU“, მრავალ ფუნქციური მეცნიერებისა და კვლევების ცენტრის, აკადემიური აღიარების, კურსდამთავრებულთა პროგრამის, ინოვაციური კვლევების ინსტიტუტის აქტუალური საკითხები.

ბათუმის შოთა რუსთაველის სახელმწიფო უნივერსიტეტში ამერიკელმა მედიაექსპერტებმა, არიზონას სახელმწიფო უნივერსიტეტის ვალტერ კრონკაიტის ჟურნალისტიკის სკოლის პროფესორებმა - ბილ სილკოკმა და კენ ფოსკეტტმა საჯარო ლექციები წაიკითხეს ტრადიციული და ციფრული მედიის გამოწვევებზე. ორი დღის განმავლობაში ამერიკელმა მედიაექსპერტებმა ბსუ-ს სტუდენტებს, პროფესორ-მასწავლებლებსა და მოქმედ ჟურნალისტებს ისეთი აქტუალური საკითხები გააცნეს, როგორებიცაა: „თავისუფალი პრესის მოდელი სამართლიანი არჩევნების გაშუქებისთვის", „დეზინფორმაცია", „სოციალური მედია ჟურნალისტიკის სწავლებაში" და „საგამოძიებო ჟურნალისტიკა". ღონისძიების ფარგლებში მოეწყო ვორკშოფი, ამერიკელმა პროფესორებმა მსმენელებს მრავალწლიანი გამოცდილება გაუზიარეს და მათ აქტუალურ შეკითხვებს უპასუხეს.

ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტი მე-11 საერთაშორისო სამშენებლო მასალების, ტექნოლოგიებისა და უძრავი ქონების გამოფენაში „Batumi Build 2022” მონაწილეობს. გამოფენაზე წარმოდგენილია ბსუ-ს ფაბლაბში დამზადებული სხვადასხვა არქიტექტურული კონსტრუქციები და მაკეტები. ღონისძიება კომპანია „GEONET EXPO–ის“ ორგანიზებით იმართება და სამ დღეს გაგრძელდება.

ბათუმის შოთა რუსთაველის სახელმწიფო უნივერსიტეტი კიდევ ერთხელ გამოხატავს სრულ სოლიდარობას უკრაინისადმი და იწყებს საქველმოქმედო აქციას უკრაინელი ხალხის დასახმარებლად. აქცია ითვალისწინებს მედიკამენტებითა და სხვა საჭირო ნივთებით (მშრალი ტკბილეული - ჩურჩხელა, ჩირი), ჰიგიენური და ბავშვის მოვლის საშუალებები, თეთრეული, ტანსაცმელი და ა.შ. დახმარებას. ასევე, ფულად შემოწირულობას აღნიშნული საჭიროებების შესაძენად.