ახალი ამბები

ბსუ-ს ზუსტ მეცნიერებათა და განათლების ფაკულტეტთან არსებული ბავშვთა უფლებების ცოდნის ცენტრის ორგანიზებით, ფოტო-ნახატების გამოფენა „ბავშვები იცავენ თავიანთ უფლებებს“ გაიმართა. ბავშვის უფლებათა ცოდნის ცენტრის მიზანია, ხელი შეუწყოს შესაძლებლობების განვითარებასა და ინოვაციური მიდგომების დანერგვას ინკლუზიური და ბავშვთა უფლებების დაცვის პრინციპებზე დაფუძნებულ განათლებას. ღონისძიებაზე აჭარის, თბილისის, გურიის საჯარო, კერძო და ინკლუზიური სკოლების მოსწავლეებმა ნამუშევრები წარმოადგინეს თანასწორობაზე, მეგობრობაზე, ერთიანობასა და მრავალფეროვნებაზე. გამოფენაში ასევე ჩაერთნენ სპეციალური საგანმანათლებლო საჭიროების მქონე მოსწავლეები კერამიკის საამქროდან, რომლებმაც ღონისძიების მონაწილეებს გააცნეს, თუ როგორ ქმნიან ნაკეთობებს, როგორ ხატავენ და როგორ ნათელ ფერებში ხედავენ სამყაროს.

რეჯიო კალაბრიოს უნივერსიტეტთან გაფორმებული მემორანდუმის ფარგლებში, ბათუმის შოთა რუსთაველის სახელმწიფო უნივერსიტეტში სამეცნიერო დისკუსია გაიმართა თემაზე: „ხელოვნური ინტელექტის თანამედროვე გამოწვევები“. ღონისძიებაში მონაწილეობა მიიღეს ბსუ-ს იურიდიული და სოციალურ მეცნიერებათა ფაკულტეტისა და იტალიის რეჯიო კალაბრიოს უნივერსიტეტის პროფესორ-მასწავლებლებმა და სტუდენტებმა. ასოცირებულმა პროფესორმა ანგელო ვიგლიანისი ფერარომ ისაუბრა სამომავლო ურთიერთობების პერსპექტივებსა და შესაძლებლობებზე, კერძოდ, ერთობლივი სასწავლო პროგრამების შემუშავებაზე, საზაფხულო სკოლების ორგანიზებასა და სამეცნიერო კონფერენციების ჩატარებაზე.

ბათუმის შოთა რუსთაველის სახელმწიფო უნივერსიტეტი და ნიკო ბერძენიშვილის ინსტიტუტი 80 წლის იუბილეს ულოცავს ემერიტუს-პროფესორს, ფილოლოგიის მეცნიერებათა დოქტორ შუშანა ფუტკარაძეს და უსურვებს ჯანის სიმრთელეს, წელთა სიმრავლეს და ნაყოფიერ სამეცნიერო მოღვაწეობას. ნაყოფიერი და მრავალმხრივ გამორჩეულია ქალბატონ შუშანა ფუტკარაძის სამეცნიერო მოღვაწეობის ინტერესთა სფერო. მკვლევარი ისტორიული სამხრეთ-დასავლეთ საქართველოს კუთხეების-აჭარის, ტაო-კლარჯეთის, ფოცხოვ-ჩილდირის, ერუშეთის ისტორიას, ფოლკლორს, ეთნოგრაფიასა და მეტყველებას იკვლევს.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის აღმოსავლეთმცოდნეობის დეპარტამენტის საერთაშორისო სამეცნიერო ჟურნალმა „აღმოსავლეთმცოდნეობის მაცნე“ (ISSN 2587-490X) საერთაშორისო სამეცნიერო ინდექსირების (ISI)/International Scientific Indexing ბაზაში მოიპოვა ინდექსაცია და მიენიჭა იმპაქტ ფაქტორი - 0.758 (2021-2022). საერთაშორისო სამეცნიერო ჟურნალი აღმოსავლეთმცოდნეობის მაცნე დაარსდა 2018 წელს ბსუ-ს ჰუმანიტარულ მეცნიერებათა ფაკულტეტის აღმოსავლეთმცოდნეობის დეპარტამენტის ბაზაზე.

ბათუმის შოთა რუსთაველის სახელმწიფო უნივერსიტეტსა და სუპერმარკეტების ქსელ „დეილს’’ შორის თანამშრომლობის მემორანდუმი გაფორმდა. შეთანხმების საფუძველზე, სტუდენტებს შესაძლებლობა ეძლევათ, დასაქმდნენ სუპერმარკეტში და მიიღონ დაფინანსება. კომპანიაში დასაქმების 6-თვიანი პერიოდის გავლის შემდეგ შპს „დეილი“ წარმატებულ სტუდენტებს დაუფინანსებს სწავლის 25%-ს, ხოლო 1-წლიანი პერიოდის გავლის შემდეგ - 50%-ს. მემორანდუმი ასევე მიზნად ისახავს ახალგაზრდების სტაჟირებას, სასწავლო-საგანმანათლებლო პროექტების განხორციელებას. თანამშრომლობის ფარგლებში, ჩატარდება ერთობლივი ტრენინგები, ლექციები, კონფერენციები და დისკუსიები.