ახალი ამბები

ბათუმის შოთა რუსთაველის სახელმწიფო უნივერსიტეტის რექტორმა, პროფესორმა მერაბ ხალვაშმა აკადემიური საბჭოს წევრებს, ფაკულტეტის დეკანებსა და ადმინისტრაციის წარმომადგენლებს 2021 წელს გაწეული მუშაობის ანგარიში წარუდგინა. გასულ წელს საქმიანობა ძირითადად წარმართული იყო ბსუ-ს სტრატეგიული განვითარების და რექტორის სამოქმედო გეგმების შესაბამისად, შემდეგი მიმართულებებით: სწავლა-სწავლების ხარისხის ამაღლება, დისტანციური სწავლება, სამეცნიერო-კვლევითი მუშაობის ხელშეწყობა, პროფესიული საგანმანათლებლო პროგრამები, საერთაშორისო ურთიერთობები, სტუდენტთა მომსახურების გაუმჯობესება, საგანმანათლებლო პროგრამების აკრედიტაცია, მატერიალურ-ტექნიკური ბაზის გაუმჯობესება, ინფრასტრუქტურული და სოციალური პროექტები, ბიუჯეტი და სახელფასო პოლიტიკა. ბსუ-ს რექტორმა, პროფესორმა მერაბ ხალვაშმა ასევე, ყურადღება გაამახვილა მნიშვნელოვან საუნივერსიტეტო აქტებსა და ღონისძიებებზე, დეტალურად განიხილა ყველა ის მიღწევა და წარმატებული პროექტი, რომელიც უნივერსიტეტმა 2021 წელს განახორციელა.

ბათუმის შოთა რუსთაველის სახელმწიფო უნივერსიტეტის ეზოში უკრაინის მხარდამჭერი აქცია გაიმართა სლოგანით „ბსუ უკრაინისთვის“. სტუდენტებმა, პროფესორ-მასწავლებლებმა და ადმინისტრაციის წარმომადგენლებმა სოლიდარობა გამოუცხადეს უკრაინელ ხალხს და დაგმეს რუსეთის სამხედრო აგრესიის შედეგად უკრაინაში მიმდინარე ტრაგიკული მოვლენები. უკრაინის მხარდამჭერ აქციას უნივერსიტეტის რექტორი, პროფესორი მერაბ ხალვაში აკადემიური საბჭოს წევრებთან ერთად შეუერთდა და საბჭოს მიმართვა გააცნო.

ბათუმის შოთა რუსთაველის სახელმწიფო უნივერსიტეტის აკადემიური საბჭო, პროფესორ-მასწავლებლებისა და სტუდენტების სახელით, მკაცრად გმობს რუსეთის სამხედრო აგრესიას უკრაინაში, რომელიც საფრთხეს უქმნის ქვეყნის ტერიტორიულ მთლიანობას და სუვერენიტეტს, მის დემოკრატიულ განვითარებასა და ცივილიზებულ სამყაროში ინტეგრირების პროცესს.

საქართველოს საბჭოთა ოკუპაციის დღისადმი მიძღვნილი ღონისძიება ბათუმის შოთა რუსთაველის სახელმწიფო უნივერსიტეტში სახელმწიფო დროშის დაშვებით დაიწყო. პროფესორ-მასწავლებლებმა და სტუდენტებმა დისკუსია გამართეს თემაზე: „1921 წლის საქართველოს ოკუპაციის ფაქტი ისტორიულ კონტექსტში" და წუთიერი დუმილით პატივი მიაგეს უკრაინაში მიმდინარე საომარი მოქმედებების დროს დაღუპულთა ხსოვნას. დისკუსიაზე მოხსენებები წარმოადგინეს ჰუმანიტარულ მეცნიერებათა ფაკულტეტის პროფესორებმა ოთარ გოგოლიშვილმა და ჯემალ კარალიძემ. ღონისძიების მონაწილეებმა იმსჯელეს საქართველოში, 1921 წლის თებერვალ-მარტში განვითარებულ მოვლენებზე და კიდევ ერთხელ გაიხსენეს საქართველოს დამოუკიდებლობისათვის დაღუპული გმირები.

საქართველოს ცენტრალური საარჩევნო კომისიის თავმჯდომარე გიორგი კალანდარიშვილი, უმაღლესი საარჩევნო კომისიის თავმჯდომარე პარმენ ჯალაღონია და ბათუმის საოლქო საარჩევნო კომისიის თავმჯდომარე ციალა შავაძე ბათუმის შოთა რუსთაველის სახელმწიფო უნივერსიტეტის სტუდენტებს შეხვდნენ. ცესკოს თავმჯდომარემ ახალგაზრდებს მიმდინარე საარჩევნო რეფორმები და შუალედურ არჩევნებზე ელექტრონული ტექნოლოგიების გამოყენების წესები გააცნო. გიორგი კალანდარიშვილმა ასევე ისაუბრა ქვეყნის დემოკრატიულ განვითარებაში არჩევნების მნიშვნელობაზე, დეტალური ინფორმაცია წარმოადგინა 2 აპრილს დაგეგმილი შუალედური არჩევნების შესახებ და შეაჯამა მისი თავმჯდომარედ არჩევის შემდეგ განხორციელებული სიახლეები.