ახალი ამბები

ბათუმის შოთა რუსთაველის სახელმწიფო უნივერსიტეტის მედიაციის მოკლევადიანი პროგრამის 13 მსმენელი 18-29 ოქტომბერს სტაჟირებით ესპანეთში, ქალაქ მურსიაში მიემგზავრება. პროექტის მონაწილეებს 2 კვირის განმავლობაში ინტენსიური ტრენინგ-კურსი ჩაუტარდებათ მედიაციის აქტუალურ საკითხებზე და მონაწილეობას მიიღებენ სხვადასხვა სასწავლო ღონისძიებაში. სტაჟირების პროგრამა ევროკავშირის მიერ დაფინანსებული პროექტის MEDIATS: „მედიაცია, ტრენინგი და საზოგადოების ტრანსფორმაცია“ ფარგლებში ხორციელდება, რომელშიც ბსუ 2018 წლიდან არის ჩართული. „ერაზმუს+“-ის დღეების ეგიდით, ბსუ-სა და ილიას სახელმწიფო უნივერსიტეტის ერთობლივი შეხვედრა გაიმართა. ღონისძიებაზე პროექტის მენეჯერებმა ქეთი დევაძემ და სალომე გაგნიძემ პროექტის მიმდინარეობა შეაფასეს და შედეგების შესახებ პრეზენტაციები წარმოადგინეს.

ბათუმში, 26 მაისის ქუჩაზე, საცხოვრებელი კორპუსის ჩამონგრევის შედეგად დატრიალებული შემზარავი ტრაგედიის დროს გარდაცვლილთა ხსოვნის პატივსაცემად ბათუმის შოთა რუსთაველის სახელმწიფო უნივერსიტეტის ეზოში სახელმწიფო დროშა დაეშვა. ბსუ-ს რექტორატმა, პროფესორ-მასწავლებლებმა, ადმინისტრაციის წარმომადგენლებმა და სტუდენტებმა ტრაგედიის ადგილი ყვავილებით შეამკეს, სანთლები დაანთეს და დაღუპულთა ხსოვნას პატივი მიაგეს. 8 ოქტომბერს საცხოვრებელი კორპუსის ჩამონგრევის შედეგად 9 ადამიანი დაიღუპა, რომელთაგან 3 მცირეწლოვანი ბავშვი იყო.

ბათუმის შოთა რუსთაველის სახელმწიფო უნივერსიტეტის რექტორმა, პროფესორმა მერაბ ხალვაშმა და „იურიდიული დახმარების სამსახურის“ დირექტორმა რაჟდენ კუპრაშვილმა თანამშრომლობის მემორანდუმს მოაწერეს ხელი. ხელშეკრულება ითვალისწინებს ერთობლივი პროექტების განხორციელებას, საგანმანათლებლო პროგრამების შემუშავება–განახლების პროცესში თანამშრომლობის უზრუნველყოფას და უნივერსიტეტის კურსდამთავრებულთათვის სტაჟირების ხელშეწყობას. მემორანდუმი ასევე მიზნად ისახავს სამეცნიერო-კვლევითი საქმიანობის განხორციელებას და სხვადასხვა სახის ღონისძიების ჩატარებას.

„Erasmus+”-ის ინსტიტუციური განვითარების პროექტის - „რეგიონული უნივერსიტეტების როლი რეგიონის განვითარებაში” (RURD – role of universities in the regional development) ფარგლებში ბათუმის შოთა რუსთაველის სახელმწიფო უნივერსიტეტში სამუშაო შეხვედრა გაიმართა. ღონისძიებაში მონაწილეობა მიიღეს ბსუ-ს რექტორმა, პროფესორმა მერაბ ხალვაშმა, აჭარის ა.რ. განათლების, კულტურისა და სპორტის მინისტრის მოადგილემ ბადრი ნაკაშიძემ, აჭარის ა. რ. ტურიზმისა და კურორტების დეპარტამენტის თავმჯდომარემ თინათინ ზოიძემ და პროფესორ-მასწავლებლებმა.

ბათუმის შოთა რუსთაველის სახელმწიფო უნივერსიტეტის რექტორმა, პროფესორმა მერაბ ხალვაშმა და გუდავაძე-პატარკაციშვილის ფონდის დირექტორმა ზურაბ კერვალიშვილმა თანამშრომლობის მემორანდუმს მოაწერეს ხელი. ხელშეკრულების ფარგლებში, ფონდი ბსუ-ს ზოგადი განათლების დაწყებითი საფეხურის მასწავლებლის მომზადების ინტეგრირებული საბაკალავრო-სამაგისტრო საგანმანათლებლო პროგრამის ათ წარმატებულ სტუდენტს წამახალისებელ სტიპენდიას გადასცემს. მემორანდუმის ხელმოწერის ღონისძიება ონლაინ ფორმატში ჩატარდა, რომელშიც ორგანიზატორებთან ერთად, მომავალი სტიპენდიანტებიც მონაწილეობდნენ. სტუდენტებმა დეტალური ინფორმაცია მიიღეს იმ პროექტების შესახებ, რომელსაც ფონდი ახორციელებს და რომელში ჩართვაც მომავალ პედაგოგებს უკვე მიმდინარე წლიდან შეეძლებათ.