ახალი ამბები

ბათუმის შოთა რუსთაველის სახელმწიფო უნივერსიტეტმა ნატო-ს საზღვაო ძალების წარმომადგენლებს უმასპინძლა. ბრიტანეთის საზღვაო ფლოტის ადმირალი ჯეიმს მორლი, ამერიკის შეერთებული შტატების საზღვაო ქვეითთა კორპუსის კაპიტანი ჯონათან ლიპსი და ამერიკის საელჩოს თავდაცვის ატაშეს პოლკოვნიკი სტეფანი ბეგლი ბსუ-ს იურიდიული და სოციალურ მეცნიერებათა ფაკულტეტის სტუდენტებს შეხვდნენ და ჩრდილოატლანტიკური ალიანსის თავდაცვისა და უსაფრთხოების საკითხებზე ესაუბრნენ. ღონისძიებას მოდერაცია გაუწიეს საქართველოში აშშ-ის საელჩოს საზოგადოებასთან ურთიერთობის განყოფილების ხელმძღვანელმა ქეთრინ შვაიცერმა და საგარეო საქმეთა სამინისტროს ნატოსა და ევროკავშირის შესახებ საინფორმაციო ცენტრის დირექტორმა თამარა წულეისკირმა. შეხვედრა კითხვა-პასუხის რეჟიმში წარიმართა და სტუმრებმა სტუდენტების აქტუალურ შეკითხვებს უპასუხეს.

2007 წლის 7 ნოემბერს თბილისში გამართული საპროტესტო აქციის დარბევა ბათუმის შოთა რუსთაველის სახელმწიფო უნივერსიტეტის სტუდენტებმა დაგმეს და 8 ნოემბერს აქციის მონაწილეებს სოლიდარობა გამოუცხადეს. ბსუ-ს ეზოში შეკრებილი ახალგაზრდები სპეცდანიშნულების რაზმმა ძალის გამოყენებით დაშალა. სპეცრაზმი უნივერსიტეტის შენობაში შეიჭრა, ლექციაზე მყოფი სტუდენტები და პროფესორ-მასწავლებლები დაარბია, ხელკეტებით ფიზიკურად გაუსწორდა და სასწავლო პროცესის მიმდინარეობისას აუდიტორიებში ცრემლსადენი გაზი გაუშვა. მიუხედავად იმისა, რომ ბათუმის შოთა რუსთაველის სახელმწიფო უნივერსიტეტმა რამდენჯერმე მიმართა შესაბამის სამსახურებს, საკითხი ჯერ კიდევ არ არის გამოძიებული და დამნაშავეები დასჯილი.

ბათუმის შოთა რუსთაველის სახელმწიფო უნივერსიტეტში აჭარის ა.რ. განათლების, კულტურისა და სპორტის სამინისტროს სტუდენტთა დახმარების პროგრამის მონაწილე წარმატებულ სტუდენტებთან შეხვედრა გაიმართა. აჭარის. ა.რ. მთავრობის თავმჯდომარემ თორნიკე რიჟვაძემ, აჭარის ა.რ. განათლების, კულტურისა და სპორტის მინისტრმა მაია ხაჯიშვილმა და უმაღლესი საბჭოს განათლების, მეცნიერების, კულტურისა და სპორტის საკითხთა კომიტეტის თავმჯდომარემ დავით ბაციკაძემ სტუდენტებს კონკურსში გამარჯვება მიულოცეს და წარმატებები უსურვეს. აღნიშნული პროგრამის ფარგლებში, 2012-2021 წლებში 8 383 753 ლარით დაფინანსდა 8 342 სტუდენტი, აქედან 4 000-მდე ბათუმის სახელმწიფო უნივერსიტეტის სტუდენტია. შეხვედრას ბსუ-ს რექტორი, პროფესორი მერაბ ხალვაში, ადმინისტრაციის ხელმძღვანელი ნიკა ჩხარტიშვილი და სხვა უმაღლესი საგანმანათლებლო დაწესებულებების რექტორები ესწრებოდნენ.

ევროკავშირის კვლევისა და ინოვაციის პროგრამის „ჰორიზონტი 2020“ ფარგლებში 2020 წელს დაფინანსებული პროექტის „ციფრული ინოვაციების დანერგვა სკოლებში რეგიონული ინოვაციური ჰაბებისა და მენტორინგის მოდელის საშუალებით“ ფარგლებში ბსუ-დან პროექტში ჩართულმა პერსონალმა სამუშაო შეხვედრა გამართა. შეხვედრაზე მონაწილეებმა გაანალიზეს პროექტის მიმდინარეობა და დასახეს სამომავლო გეგმები. პროექტი ხელს შეუწყობს სკოლებს შორის ურთიერთთანამშრომლობის გაძლიერებას ციფრული ინოვაციების დანერგვის კუთხით. მენტორინგის მოდელი გულისხმობს სკოლების უწყვეტ მეთოდოლოგიურ მხარდაჭერას შეფასების უახლესი მიდგომებისა და სწავლის ანალიტიკური სტრატეგიების გამოყენებით.

ბათუმის შოთა რუსთაველის სახელმწიფო უნივერსიტეტში VI საერთაშორისო საზაფხულო უნივერსიტეტი ტარდება თემაზე: „საქართველოს აკადემიური პერსპეტივა უსაფრთხოების და გაუვრცელებლობის კვლევებში“. ღონისძიების გახსნას ბსუ-ს რექტორი, პროფესორი მერაბ ხალვაში, სტოკჰოლმის უნივერსიტეტის პროფესორი დოქტორი ტომას იონტერი, პოლიტიკის მეცნიერებათა დოქტორი ბენუა პელოპიდასი და შვედეთის მთავრობის წარმომადგენლები ესწრებოდნენ. ორდღიანი საზაფხულო უნივერსიტეტის მიზანია უმაღლესი საგანმანათლებლო დაწესებულებების აკადემიური პერსონალის კვლევითი უნარების განვითარების ხელშეწყობა.