ახალი ამბები

საქართველოს დამოუკიდებლობის აღდგენის დღე ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებმა სამეცნიერო კონფერენციით აღნიშნეს. კონფერენცია გახსნეს და მონაწილეებს საქართველოს დამოუკიდებლობის აღდგენის დღე მიულოცეს ბსუ-ს რექტორმა მერაბ ხალვაშმა და ჰუმანიტარულ მეცნიერებათა ფაკულტეტის დეკანმა მარინა გიორგაძემ. სესიაზე ბსუ-ს მკვლევარებმა საქართველოს სხვადასხვა უნივერსიტეტის წარმომადგენლებთან ერთად, 102 წლის წინ განვითარებული მოვლენები შეაფასეს.

ბსუ-ს იურიდიული და სოციალურ მეცნიერებათა ფაკულტეტის ორგანიზებით საქართველოს დამოუკიდებლობის დღისადმი მიძღვნილი კონფერენცია: „დამოუკიდებლობის მოპოვება, აღდგენა, შენარჩუნება“ ჩატარდა ZOOM-ის ონლაინ პლატფორმაზე. სესიაზე საქართველოს სხვადასხვა უმაღლესი საგანმანათლებლო დაწესებულების პროფესორ-მასწავლებლებმა მოხსენებები წარმოადგინეს 1918 წლის 26 მაისის მოვლენებთან დაკავშირებულ საკითხებზე. განხილული იყო ისეთი აქტუალური საკითხები, როგორიცაა: „1918 წლის 26 მაისი მის თანამედროვეთა აღქმებსა და შეფასებებში“, „დამოუკიდებლობის აქტით დეკლარირებული პრინციპების დამკვიდრება საქართველოს 1921 წლის კონსტიტუციაში“, „საქართველოს დემოკრატიული რესპუბლიკის საკანონმდებლო ორგანო და კანონმდებლობის ძირითადი მიმართულებანი (1918-1921)“, „ბათუმის საკითხი 1918 წლის მარტის ტრაპიზონისა და მაისის ბათუმის კონფერენციებზე“, „დამოუკიდებლობიდან დამოუკიდებლობამდე (კონსტიტუციონალიზმის განვითარების ეტაპები)“.

აჭარის ა.რ. მთავრობის თავმჯდომარე თორნიკე რიჟვაძე, აჭარის ა.რ. განათლების, კულტურისა და სპორტის მინისტრთან მაია ხაჯიშვილთან ერთად ბათუმის შოთა რუსთაველის სახელმწიფო უნივერსიტეტის ადმინისტრაციის წარმომადგენლებს შეხვდა. სამუშაო შეხვედრაზე დისტანციური სწავლების მიმდინარეობა და ხარისხი, პანდემიის პერიოდში არსებული გამოწვევები განიხილეს. ასევე, ყურადღება გაამახვილეს საბუნებისმეტყველო მეცნიერებათა და ჯანდაცვის ფაკულტეტის სტუდენტებზე, რომლებიც კოვიდინფიცირებულ პაციენტებთან მუშაობდნენ.

კულტურული მრავალფეროვნების დღისადმი მიძღვნილი სტუდენტთა პირველი ონლაინ სამეცნიერო კონფერენცია „ჰარმონიული თანაცხოვრება მრავალფეროვან გარემოში“ გაიმართა ბათუმის შოთა რუსთაველის სახელმწიფო უნივერსიტეტში. კონფერენცია ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა, აჭარის ა.რ. განათლების, კულტურისა და სპორტის სამინისტროს განათლების დეპარტამენტის ხელმძღვანელმა ნაცო ბერიძემ, ზუსტმეცნიერებათა და განათლების ფაკულტეტის დეკანმა ლელა თურმანიძემ, რექტორის მოადგილემ თამარ სირაძემ, პედაგოგიურ მეცნიერებათა დეპარტამენტის ხელმძღვანელმა გული შერვაშიძემ და ბსუ-ს ფსიქოლოგიის კლინიკის კოორდინატორმა ქეთევან ბერიძემ გახსნეს.

ბსუ-ს ჰუმანიტარულ მეცნიერებათა ფაკულტეტის ასოცირებულმა პროფესორმა გიორგი მასალკინმა საჯარო ლექცია წაიკითხა თემაზე: „პოსტკორონისეული სამყარო და ჩვენ”. მომხსენებელმა ღონისძიებაზე ისეთ აქტუალურ საკითხებზე, როგორიცაა: თუ რა გავლენას მოახდენს ეს მოვლენა საერთაშორისო გლობალურ პროცესებზე ეკონომიკაში, პოლიტიკაში, განათლების, კულტურისა და ხელოვნების სფეროებში; რა გავლენას მოახდენს ის კომუნიკაციაზე (რომელიც განსაზღვრავს ცივილიზაციის რაობას); დემოკრატიის რაობაზე, - ხომ არ დაემატება დილემას - „თავისუფლება თუ უსაფრთხოება“, ახალი დილემა - „თავისუფლება თუ ჯამრთელობა“. რომელი პოლიტიკური იდეოლოგია და რეჟიმები აღმოჩნდებიან უფრო სიცოცხლისუნარიანები არსებულ მდგომარეობაში; რა შეიცვლება სოციალურ ურთიერთობებში - ატომიზაცია, რობინზონიზაცია, ახალი სოციალური ქცევა, ჩვევები და ა.შ.