ახალი ამბები

ბათუმის შოთა რუსთაველის სახელმწიფო უნივერსიტეტში საერთაშორისო სამეცნიერო-პრაქტიკული კონფერენცია „ახალგაზრდული მეწარმეობა აღმოსავლეთ პარტნიორობის ქვეყნებში: ფორმირების გამოცდილება და განვითარების პერსპექტივები“ ტარდება. ორდღიანი კონფერენცია პროექტის „უმაღლესი სასწავლებლები ახალგაზრდული მეწარმეობისათვის“ Erasmus+-ის ფარგლებში გაიხსნა და მიზნად ისახავს ახალგაზრდა მეწარმეების ხელშეწყობას, არსებული პრობლემების კვლევასა და მათი გადაჭრის გზების ძიებას. სესიის ქართველი, უკრაინელი, სომეხი, ბელარუსი და მოლდოველი მონაწილეები მოხსენებებს ექვსი მიმართულებით წარმოადგენენ.

ბათუმის III საზაფხულო უნივერსიტეტი გაიხსნა ბათუმის შოთა რუსთაველის სახელმწიფო უნივერსიტეტში თემაზე: „საერთაშორისო უსაფრთხოება და ბირთვული გაუვრცელებლობა: თეორიები, დისკურსიები და მიმდინარე პროცესები“. სწავლება მიზნად ისახავს პროფესორ-მასწავლებლების, სტუდენტების, საჯარო და სამოქალაქო სექტორის წარმომადგნლების კომპეტენციის ამაღლებას საერთაშორისო უსაფრთხოებისა და ბირთვული გაუვრცელებლობის, უსაფრთხოების სექტორის დემოკრატიული ზედამხედველობის განხორციელების მექანიზმების საკითხებში. ბსუ-ს პროფესორ-მასწავლებლები, არასამთავრობო ორგანიზაციის სამოქალაქო საბჭოს და ამერიკის შეერთებული შტატების წარმომადგენლები მოხსენებებს წარმოადგენენ საერთაშორისო უსაფრთხოების აქტუალურ საკითხებზე.

დღეს, ბათუმის შოთა რუსთაველის სახელმწიფო უნივერსიტეტში პირველკურსელთა რეგისტრაცია დაიწყო. რეგისტრაციის პარალელურად სტუდენტები საკონსულტაციო ცენტრში ღებულობენ დეტალურ ინფორმაციას უნივერსიტეტში მოქმედ სამართლებრივ რეგულაციებზე, სწავლის საფასურის გადახდის წესზე, საერთაშორისო ურთიერთობებსა და გაცვლით პროგრამებზე, სოციალურ პროექტებსა და სტიპენდიებზე, შემოქმედებით და სპორტულ წრეებზე. რეგისტრაცია გრძელდება 25 სექტემბრის ჩათვლით.

ბათუმის შოთა რუსთაველის სახელმწიფო უნივერსიტეტის მოსამზადებელი ცენტრი აცხადებს აბიტურიენტების მიღებას ერთიანი ეროვნული გამოცდებისთვის მოსამზადებლად!

რეგისტრაცია იწარმოებს 10 სექტემბრიდან 5 ოქტომბრის ჩათვლით 11:00-დან 16:00 საათამდე. (შაბათ-კვირის გარდა)

მისამართი: ქ. ბათუმი, ნინოშვილის #35
III კორპუსი, ოთახი 411
ტელ: 577 45 60 61; 577 14 10 90;

საქართველოს მათემატიკოსთა კავშირის IX საერთაშორისო კონფერენცია ტარდება ბათუმის შოთა რუსთაველის სახელმწიფო უნივერსიტეტში. ოთხდღიანი სამეცნიერო ფორუმი მიზნად ისახავს მათემატიკის უახლესი სამეცნიერო მოღწევებისა და ბოლო ერთი წლის განმავლობაში წარმოებული კვლევის შედეგების წარდგენას. 17 ქვეყნის 200-მდე მეცნიერი მოხსენებებს წარმოადგენს მათემატიკის აქტიურად განვითარებადი დარგების პრობლემატიკაზე. კონფერენცია ბათუმის შოთა რუსთაველის სახელმწიფო უნივერსიტეტის, საქართველოს მათემატიკოსთა კავშირის, ივანე ჯავახიშვილის თბილისის სახელმწიფო უნივერსიტეტისა და საქართველოს უნივერსიტეტის ორგანიზებით იმართება.