ახალი ამბები

ბულგარეთის რესპუბლიკის საგანგებო და სრულუფლებიანმა ელჩმა საქართველოში დესისლავა ივანოვმა ბათუმის შოთ რუსთაველის სახელმწიფო უნივერსიტეტში საჯარო ლექცია წაიკითხა თემაზე: „ბულგარეთი და ევროკავშირი“. დიპლომატიური კორპუსის წარმომადგენელმა სოციალურ და პოლიტიკურ მეცნიერებათა ფაკულტეტის სტუდენტებს ბულგარეთის რესპუბლიკის ევროკავშირის საბჭოს თავმჯდომარეობის შედეგები გააცნო. ბულგარეთი ევროკავშირს 2007 წელს შეუერთდა, ხოლო 2018 წელს პირველად ევროკავშირის თავმჯდომარე ქვეყანა გახდა. ქალბატონმა დესისლავა ივანოვმა საქართველოსა და ბულგარეთის ურთიერთობებზე ისაუბრა, ყურადღება გაამახვილა უვიზო რეჟიმსა და ევროკავშირში გაწევრიანების პირობებზე. ლექციის დასასრულს მომხსენებელმა შეკითხვებს უპასუხა.

ბათუმის შოთა რუსთაველის სახელმწიფო უნივერსიტეტში ტურიზმის ფაკულტეტის ორგანიზებით საზაფხულო სკოლა „სოფლად ტურიზმის მდგრადი განვითარება“ ტარდება. სწავლება პროექტის „მდგრადი ტურიზმი: სოფლად მეწარმეობა და კულტურული მემკვიდრეობა“ ფარგლებში იმართება. საზაფხულო სკოლის მიზანია, ხელი შეუწყოს ინტერნაციონალიზაციას, ერთობლივი სტუდენტური პროექტების განხორციელებასა და უცხოური გამოცდილების გაზიარებას. საზაფხულო სკოლაში მონაწილეობენ ბათუმის შოთა რუსთაველის სახელმწიფო უნივერსიტეტის, სამხრეთ-აღმოსავლეთ ნორვეგიის უნივერსიტეტის (USN), ყირგიზეთის პარტნიორი უნივერსიტეტების, აკაკი წერეთლის სახელმწიფო უნივერსიტეტის, ბათუმის საზღავაო აკადემიის პროფესორ-მასწავლებლები და სტუდენტები.

საერთაშორისო სამეცნიერო კონფერენცია „საქართველოს უძველესი მეტალოგენური კერა (აჭარა) - უძველესი აღმოჩენები, კონტაქტები აღმოსავლურ ცივილიზაციებთან, ნოვაციები, პერსპექტივები“ გაიხსნა ბათუმის შოთა რუსთველის სახელმწიფო უნივერსიტეტში. ქართველი და უცხოელი მეცნიერები ოთხი დღის განმავლობაში სამეცნიერო მოხსენებებს წარმოადგენენ ბოლო პერიოდში ჩატარებული არქეოლოგიური გათხრებისა და სამეცნიერო კვლევების შედეგებზე. საერთაშორისო სესია ბათუმის შოთა რუსთველის სახელმწიფო უნივერსიტეტის, აჭარის მუზეუმის, აჭარის ა. რ. განათლების, კულტურისა და სპორტის სამინისტროსა და ივანე ჯავახიშვილის სახელობის თბილისის სახელმწიფო უნივერსიტეტის აღმოსავლეთმცოდნეობის ინსტიტუტის ორგანიზებით იმართება.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის 42 სტუდენტი გერმანიაში გაემგზავრა. სტუდენტები 3 თვის განმავლობაში პრაქტიკას გერმანიის მაღალი კლასის სასტუმროებში გაივლიან, გაეცნობიან სასტუმროს ყველა ძირითადი სტრუქტურული ერთეულის ფუნქციონირებას. ახალგაზრდები თეორიული ცოდნის მიღებასთან ერთად, ჩაერთვებიან სასტუმროს ყოველდღიურ საქმიანობაში, გაიუმჯობესებენ პრაქტიკულ უნარ-ჩვევებსა და კომპეტენციებს, რაც მათ მომავალში, საერთაშორისო ტურისტული მომსახურების ბაზარზე წარმატებით დასაქმების საშუალებას მისცემს. პრაქტიკა უზრუნველყოფილია გერმანიის შვერინის ბალტიკის კოლეჯთან გაფორმებული მემორანდუმის საფუძველზე და ქალაქ ბათუმის მერიის ფინანსური მხარდაჭერით.

ბათუმის შოთა რუსთაველის სახელმწიფო უნივერსიტეტს ირანის ისლამური რესპუბლიკის გენერალური კონსულის მოვალეობის შემსრულებელი საქართველოში აჰმად ბადფა ეწვია. უნივერსიტეტის რექტორთან მერაბ ხალვაშთან გამართული ვიზიტი გაცნობითი ხასიათის იყო და მიზნად ისახავდა სამომავლო თანამშრომლობის მიმართულებების განსაზღვრას. შეხვედრაზე დაიგეგმა გაცვლითი პროგრამებისა და ერთობლივი სასწავლო-სამეცნიერო პროექტების განხორციელება. მხარეთა შეფასებით, თანამშრომლობა ხელს შეუწყობს ორ ქვეყანას შორის არსებული კავშირების გაღრმავებას.