ახალი ამბები

ბულგარეთის რესპუბლიკის საელჩომ ბათუმის შოთა რუსთაველის სახელმწიფო უნივერსიტეტში ეთნოგრაფიული გამოფენა მოაწყო. ღონისძიება ბულგარეთის რესპუბლიკის საგანგებო და სრულუფლებიანმა ელჩმა დესისლავა ივანოვმა გახსნა და საზოგადოებას ბულგარეთის რესპუბლიკის ევროკავშირის საბჭოს თავმჯდომარეობის შედეგები წარუდგინა. ეთნოგრაფიულ გამოფენაზე წარმოდგენილია ბულგარული ეროვნული ტანისამოსისა და ცეცხლის რიტუალის ამსახველი ალექსანდრე მიხაილოვის 25 ფოტო. ექსპოზიცია ბულგარელი ხალხის ყოფა-ცხოვრებასა და ტრადიციებს ეძღვნება.

ბათუმის შოთა რუსთაველის სახელმწიფო უნივერსიტეტი „სტუდენტური დღეები - 2018“-ის გრან-პრის მფლობელია. შეჯიბრში აჭარის უმაღლესი საგანმანათლებლო დაწესებულებები მონაწილეობდნენ. გუნდებმა მაყურებელს მუსიკალური ნომერი, ორიგინალური ნომერი, ვიდეორგოლი „წარმოაჩინე შენი უნივერსიტეტი“ და სილამაზის კონკურსი „მის უნივერსიტეტი“ წარუდგინეს. სტუდენტური დღეების ფარგლებში, უნივერსიტეტებს შორის პირველობა გაიმართა სპორტის ხუთ სახეობაში, რომელთაგან ოთხი ბსუ-ს გამარჯვებით დასრულდა. ახალგაზრდებმა წარმატებას ქუჩის კალათბურთში, მაგიდის ჩოგბურთში, ფრენბურთში, ფუტსალსა და ინტელექტუალურ თამაშში „რა? სად? როდის?“ მიაღწიეს, წარადგინეს საუკეთესო ვიდეორგოლი, ხოლო „მის სტუდენტი“ ელიზავეტა კრასენკო გახდა.

ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის სტუდენტებმა თამარ გვარიშვილმა და ნიკა ცეცხლაძემ აჭარის დებატების ტურნირში გაიმარჯვეს. პირველობა საპარლამენტო და ღირებულებითი ფორმატის დებატებში 9-10 ივნისს მიმდინარეობდა და შეჯიბრში სტუდენტებთან ერთად, მოსწავლეებიც მონაწილეობდნენ. ტურნირის გამართვამდე 150 სტუდენტსა და მოსწავლეს ტრენინგები ჩაუტარდათ, როგორც ბათუმში ასევე სხვადასხვა მუნიციპალიტეტში. პროექტი აჭარის ა.რ. განათლების, კულტურისა და სპორტის სამინისტროს სპორტისა და ახალგაზრდობის საქმეთა დეპარტამენტის ორგანიზებით განხორციელდა. უნივერსიტეტი ულოცავს სტუდენტებს გამარჯვებას და უსურვებს წარმატებებს.

საქართველოს პრეზიდენტის ადმინისტრაციის უფროსი გიორგი აბაშიშვილი ბათუმის შოთა რუსთაველის სახელმწიფო უნივერსიტეტის რექტორს, მერაბ ხალვაშს და ბსუ-ს პროფესორებს, პრეზიდენტის ფონდის მიერ დაფინანსებული პროექტის მონაწილეებს ალეკო კალანდიასა და მაია ვანიძეს შეხვდა. ვიზიტის ფარგლებში გიორგი აბაშიშვილი პროექტის „აჭარული სამზარეულოს პოპულარიზაციის მიზნით ადგილობრივი ტრადიციული კერძებისა და მათი ინგრედიენტების ქიმიური კვლევა ანალიზის თანამედროვე ინსტრუმენტული მეთოდებით“ განხორციელებული კვლევის პირველი ეტაპის შედეგებს გაეცნო.

ბსუ-ს პროფესიული პროგრამების „ბეჭდური და ონლაინ გამოცემების რეპორტიორისა’’ და „კორესპონდენტის’’ სპეციალობის სტუდენტებმა სასწავლო პროცესში განხორციელებული პრაქტიკული ნამუშევრები ფართო საზოგადოებას წარუდგინეს. მომავალ ჟურნალისტებს მიესალმნენ აჭარის განათლების მინისტრი ინგა შამილიშვილი, აჭარის საზოგადოებრივი მაუწყებლის ხელმძღვანელი ნათია კაპანაძე და ბსუ-ს რექტორი მერაბ ხალვაში. მოწვეულ სტუმრებს სტუდენტებმა წარუდგინეს ფოტო და ვიდეო ნამუშევრები, ისაუბრეს იმ ჟურნალისტურ პროექტებზე, რომლებშიც აქტიურ მონაწილეობას ღებულობდნენ. შეხვედრის დასასრულს, აჭარის განათლების მინისტრმა ინგა შამილიშვილმა პროფესიულ სტუდენტთა პრაქტიკულ კონფერენციაში გამარჯვებულ სტუდენტებს - ლინდა მესხიძეს, ხატია რომანაძეს, იაგო ფალავანდიშვილს, თორნიკე დევაძესა და გიორგი გორჯელაძეს სერტიფიკატები გადასცა.