ახალი ამბები

ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის სტუდენტებისათვის პროფესორმა, ბსუ-ს საპატიო დოქტორმა თომას კრუსმანმა სემინარი ჩაატარა თემაზე: „გერმანული კაზუისტიკის მეთოდიკა ქართულ სისხლის სამართალში“. ლექცია მიზნად ისახავდა სწავლებას კაზუსის ამოხსნის გერმანულ მეთოდიკაზე შედარებით-სამართლებრივი ანალიზის საფუძველზე როგორც ანგლო-საქსური პრეცედენტული სამართლის, ისე გერმანულ სისხლის სამართალში გახმაურებული საქმის მეშვეობით. ასევე გაიმართა დისკუსია საკითხზე, თუ როგორ უნდა შეფასდეს პოლიციის განყოფილების უფროსის მოვალეობის შემსრულებლის ქმედება - წამების მუქარა ეჭვმიტანილის მიმართ მცირეწლოვანი მძევლის ადგილსამყოფლის თაობაზე ინფორმაციის მიწოდების მიზნით.

23-26 აპრილს ერაზმუს+-ის აკადემიური და ადმინისტრაციული პერსონალის გაცვლითი პროგრამების ფარგლებში ბათუმის შოთა რუსთაველის სახელმწიფო უნივერსიტეტში, ბსუ-ს სტრატეგიული განვითარებისა და საგარეო ურთიერთობათა დეპარტამენტის ორგანიზებით გამართული „ბსუ-ს საერთაშორისო კვირეული“ დასრულდა. უცხოური უნივერსიტეტების პროფესორებმა წაიკითხეს ლექციები ტურიზმისა და ფიზიკა-მათემატიკისა და კომპიუტერულ მეცნიერებათა ფაკულტეტების სტუდენტებისთვის. ევროპული პარტნიორი უნივერსიტეტების ერაზმუს+-ის კოორდინატორებმა ჩაატარეს ტრენინგები გაცვლითი პროგრამების ეფექტურად მართვაზე.

საქართველოს განათლებისა და მეცნიერების მინისტრი მიხეილ ჩხენკელი ბათუმის შოთა რუსთაველის სახელმწიფო უნივერსიტეტს ეწვია. მინისტრმა ბსუ-ს მატერიალურ-ტექნიკური ბაზა, უახლესი ტექნოლოგიებით აღჭურვილი სტამბა, კაბინეტ-ლაბორატორიები დაათვალიერა, სადაც სტუდენტები თეორიულ ცოდნასთან ერთად, პრაქტიკულ უნარ-ჩვევებს იძენენ. ვიზიტის ფარგლებში განათლებისა და მეცნიერების მინისტრი მკვლევარებისა და პროფესორების მიერ წარმოებული კვლევის შედეგებს გაეცნო. ასევე რექტორთან ერთად, შეხვდა პროფესორ-მასწავლებლებს, სტუდენტებს და უნივერსიტეტის სამომავლო განვითარების პერსპექტივებზე ესაუბრა.

საზეიმოდ ჩაეყარა საფუძველი ბათუმის შოთა რუსთაველის სახელმწიფო უნივერსიტეტის ახალი სასწავლო კორპუსის მშენებლობას. საქართველოს განათლებისა და მეცნიერების მინისტრმა მიხეილ ჩხენკელმა, აჭარის ა.რ. მთავრობის თავმჯდომარემ ზურაბ პატარაძემ, ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა, აჭარის უმაღლესი საბჭოს თავმჯდომარემ დავით გაბაიძემ მშენებლობის სერტიფიკატს მოაწერეს ხელი. მინისტრმა მიხეილ ჩხენკელმა უნივერსიტეტს წარმატებები უსურვა და საჩუქრად შოთა რუსთაველის ისტორიული ბარელიეფი გადასცა.

საქართველოს პარლამენტის საგარეო ურთიერთობათა კომიტეტის თავმჯდომარემ სოფიო ქაცარავამ, ადამიანის უფლებების დაცვის სამდივნოს უფროსმა მარიამ ჯაჯანიძემ და სახალხო დამცველის თანასწორობის დეპარტამენტის უფროსმა ქეთევან შუბაშვილმა ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებთან და სტუდენტებთან ადამიანის უფლებათა დაცვის საკითხებზე შეხვედრა გამართეს. ღონისძიების მონაწილეებმა სოციალური და სამოქალაქო-პოლიტიკური უფლებების დამოკიდებულებაზე ისაუბრეს, სახელმწიფოს მზარდი სოციალური პასუხისმგებლობა განიხილეს საქართველოს ევროინტეგრაციის პროცესის კონტექსტში და სამოქალაქო-პოლიტიკური უფლებების განხორციელების გათვალისწინებით სოციალური უფლებების რეალიზების მნიშვნელობაზე იმსჯელეს.