ახალი ამბები

დასრულდა ბათუმის შოთა რუსთაველის სახელმწიფო უნივერსიტეტის სოციალური პროექტი „პროფესორები მოსწავლეებისთვის“. ორი კვირის განმავლობაში უმაღლესი საგანმანათლებლო დაწესებულების 50-მდე პროფესორ-მასწავლებელმა ხელვაჩაურის, ქობულეთის ბათუმის საჯარო და კერძო სკოლებში პოპულარული ხასიათის ლექციები წაიკითხა ისეთ აქტუალურ საკითხებზე, როგორიცაა: საქართველო ევროინტეგრაციის გზაზე, კონსტიტუცია და დემოკრატიული მმართველობა, ბულინგის გამომწვევი მიზეზები, თაობები და ღირებულებები, ჯანსაღი ცხოვრების წესი, კრიტიკული აზროვნება და სხვ. პროექტი აჭარის განათლების, კულტურისა და სპორტის სამინისტროს მხარდაჭერით განხორციელდა და მიზნად ისახავდა, ახალგაზრდებში სამოქალაქო ცნობიერების ამაღლების ხელშეწყობას.

ბავშვთა და ახალგაზრდების ძალადობისგან დაცვა - ამ თემაზე ბათუმის შოთა რუსთაველის სახელმწიფო უნივერსიტეტის, საქართველოს საზოგადოებრივი ჯანდაცვის ფონდისა და საზოგადოებრივი ორგანიზაციის „სთეფ ფორვარდი“ ორგანიზებით სამუშაო შეხვედრა გაიმართა. შეხვედრა ევროკავშირის მიერ მხარდაჭერილი პროექტის „ადვოკატირება ბავშვთა და ახალგაზრდების დასაცავად“ ფარგლებში შედგა და მიზნად ისახავდა დამსწრე საზოგადოებისთვის პროექტის ამოცანების, დაგეგმილი საქმიანობების ერთი წლის შედეგების გაცნობა-შეჯამებას და ძალადობის დაცვის სისტემის გაუმჯობესებას.

აჭარის ა.რ. სოფლის მეურნეობის მინისტრი ავთანდილ მესხიძე ბსუ-ს რექტორის მოადგილესთან ნათია წიკლაშვილთან და აგროსერვის ცენტრის დირექტორთან გოჩა ბერიძესთან ერთად, ბათუმის შოთა რუსთველის სახელმწიფო უნივერსიტეტის ტექნოლოგიური ფაკულტეტის სტუდენტებს შეხვდა და ანაზღაურებადი სტაჟირების პროგრამა გააცნო. პროექტი მიზნად ისახავს მაღალკვალიფიციური კადრების მომზადების ხელშეწყობას, ახალგაზრდების პროფესიულ განვითარებასა და პრაქტიკული უნარ-ჩვევების გამომუშავებას. აგრარული მიმართულების სტუდენტები 6-თვიან სტაჟირებას აჭარის სოფლის მეურნეობის სამინისტროს აგროსერვის ცენტრში გაივლიან და გაეცნობიან დარგის მუშაობის სპეციფიკას. სტაჟირების პროგრამაში მონაწილეობის მსურველთა რეგისტრაცია 5 ვაკანსიაზე დაიწყო და 5 მარტს დასრულდება.

ბათუმის შოთა რუსთაველის სახელმწიფო უნივერსიტეტში არსენ გვენატაძემ საჯარო ლექცია წაიკითხა თემაზე: „შეუძლებელი არაფერია“. შეხვედრაზე საუბარი შეეხო ადამიანებს შორის ურთიერთობასა და მოტივაციას. შეხვედრაზე საუბარი შეეხო ადამიანებს შორის ურთიერთობასა და მოტივაციას. არსენ გვენეტაძე ექიმი გინეკოლოგი, რეპროდუქტოლოგი, თბილისის სახელმწიფო უნივერსიტეტის პროფესორი და ზურაბ საბახტარაშვილის რეპროდუქციული კლინიკის ხელმძღვანელია. ასევე, ეწევა საქმიანობას კულტურულ სფეროში, მისი ფერწერული ტილოები გამოიფინა ნიუ იორკში, მილანში, კანში, კაუნასსა და ბერლინში. საჯარო ლექცია ბათუმის შოთა რუსთაველის სახელმწიფო უნივერსიტეტის, ზურაბ საბახტარაშვილის კლინიკის, ბათუმის საზღვაო ჰოსპიტალისა და ჯეპრა ბათუმის ორგანიზებით ჩატარდა.

ბათუმის შოთა რუსთაველის სახელმწიფო უნივერსიტეტის ახალი სასწავლო კორპუსის მშენებლობა იწყება. უნივერსიტეტმა და შპს „ჩაინა ენერჯი ენჯინერინგ გრუპ ნორთვესტ პოვერ კონსტრაქშენ ენჯინერინგ კოს საქართველოს ფილიალმა“ ხელი მოაწერეს მშენებლობის ხელშეკრულებას. თანამედროვე, საერთაშორისო სტანდარტების შესაბამისი სამსართულიანი სასწავლო კორპუსი აჭარის ა.რ. მთავრობის ფინანსური მხარდაჭერით ბათუმში, ლეონიძის ქ. N15-ში აშენდება. მშენებლობისთვის ორი მილიონ ექვსას სამოცი ათას ხუთას ორმოცდასამი ლარია გათვალისწინებული. შენობის სამ სართულზე განთავსდება 27 აუდიტორია, კაბინეტები და საკონფერენციო დარბაზი. კორპუსი ადაპტირებულია შშმ პირებზე, მოეწყობა პანდუსი, სველი წერტილები და ლიფტი. მშენებლობა 2018 წლის დეკემბერში დასრულდება.