ახალი ამბები

საქართველოს ახალგაზრდა იურისტთა ასოციაციის აჭარის ფილიალის წარმომადგენლებმა ბათუმის შოთა რუსთაველის სახელმწიფო უნივერსიტეტის სტუდენტებს სამთავრობო ელექტრონული პეტიციების პორტალი (ichange.gov.ge) წარუდგინეს. ichange.gov.ge მოქალაქეთა ელექტრონული პეტიციების ოფიციალური სამთავრობო პლატფორმაა, რომელსაც საქართველოს მთავრობის ადმინისტრაცია ღია მმართველობის პარტნიორობის (OGP) მეორე სამოქმედო გეგმის მიხედვით ახორციელებს. პორტალის დახმარებით საქართველოს ნებისმიერ სრულწლოვან მოქალაქეს შეუძლია პეტიციის საშუალებით საქართველოს მთავრობის ყურადღება გაამახვილოს მისთვის მნიშვნელოვან საკითხზე. შესაბამისი კრიტერიუმების დაკმაყოფილების შემთხვევაში, საქართველოს მთავრობა ვალდებულია, განიხილოს პეტიციაში აღწერილი საკითხი და მოახდინოს რეაგირება.

ბათუმის შოთა რუსთაველის სახელმწიფო უნივერსიტეტმა აბიტურიენტებისათვის ღია კარის დღეები - 2018 დაიწყო. პროფესორ-მასწავლებლებმა და სტუდენტებმა ბათუმის საჯარო და კერძო სკოლების მეთორმეტე კლასის მოსწავლეებს უნივერსიტეტის საგანმანათლებლო პროგრამები, საუნივერსიტეტო ცხოვრება, სოციალური პროგრამები, სტიპენდიები, გაცვლითი პროგრამები და არსებული სიახლეები გააცნეს. 2018-2019 სასწავლო წელს ბსუ-ში 40-მდე საბაკალავრო საგანმანათლებლო პროგრამაზე 1360 პირველკურსელი ჩაირიცხება, მათგან 460 სახელმწიფო დაფინანსებით ისწავლის. შეხვედრის მონაწილეებს ბათუმის შოთა რუსთაველის სახელმწიფო უნივერსიტეტის საინფორმაციო ბუკლეტები და სამახსოვრო საჩუქრები გადაეცათ.

სტამბოლის „შოთა რუსთაველის სახელობის კულტურის ცენტრის“ თავმჯდომარე სეზენ გონენჩ ოქჯანი (სალომე ბარამიძე) მოადგილესთან ორჰან ბერიძესთან ერთად ბათუმის შოთა რუსთველის სახელმწიფო უნივერსიტეტს ეწვია. სტუმრებმა ბსუ-ს ქართველოლოგიის ცენტრში უნივერსიტეტის რექტორთან მერაბ ხალვაშთან, პროფესორ-მასწავლებლებთან, მკვლევარებთან, სტუდენტებთან და საზოგადოების წარმომადგენლებთან გამართულ შეხვედრაზე ორგანიზაციის მიზნებსა და ამოცანებზე ისაუბრეს. ღონისძიებაზე განისაზღვრა სამომავლო თანამშრომლობის მიმართულებები და დაიგეგმა ერთობლივი ღონისძიებები.

ბათუმის შოთა რუსთაველის სახელმწიფო უნივერსიტეტის სტუდენტებს ბათუმის ამერიკული კუთხის პროგრამების კოორდინატორმა მამუკა საფარიძემ მედიაწიგნიერების სკოლა წარუდგინა. 16-დან 30 წლამდე მოქალაქეებისთვის განკუთვნილი მედიაწიგნიერების სკოლის სასწავლო მოდული შექმნილია ნიუ-იორკის სთოუნ ბრუქის უნივერსიტეტისა და ადამ მიცკიევიჩის უნივერსიტეტის (პოზნანი, პოლონეთი) ჟურნალისტიკისა და მასობრივი კომუნიკაციის პროფესორების თანამშრომლობის შედეგად. სკოლაში სწავლება წარიმართება ქართულ და ინგლისურ ენებზე.

ორგანიზაციის „ინიციატივა სოციალური ცვლილებებისთვის“ (ISC) წარმომადგენელებმა თამარ ივანიაძემ და ნინო ქობალიამ ბათუმის შოთა რუსთაველის სახელმწიფო უნივერსიტეტის სტუდენტებს ქუჩაში მცხოვრები და მომუშავე ბავშვების საჭიროებათა კვლევის შედეგები გააცნეს და სტუდენტური ესეების კონკურსი წარუდგინეს. კონკურსი პროექტის - „საინფორმაციო კამპანია ქუჩაში მცხოვრები და/ან მომუშავე ბავშვების დაცვისა და მხარდაჭერის გასაძლიერებლად“ ფარგლებში საქართველოს იუსტიციის სამინისტროსა და სსიპ „დანაშაულის პრევენციის ცენტრის“ მხარდაჭერით ცხადდება. პროექტი მიზნად ისახავს საზოგადოების ცნობიერების ამაღლება ბავშვთა შრომითი ექსპლუატაციის, ტრეფიკინგის საკითხებზე და დაინტერესებულ მხარეთა შორის დიალოგის წარმართვის ხელშეწყობას.