ახალი ამბები

ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელმა მერაბ ხალვაშმა და საქართველოს სოფლის მეურნეობის მეცნიერებათა აკადემიის პრეზიდენტმა გურამ ალექსიძემ თანამშრომლობის მემორანდუმს მოაწერეს ხელი. მხარეები აგრარული მიმართულებით ერთობლივი პროგრამებისა და პროექტების განხორციელებაზე შეთანხმდნენ. დოკუმენტი ასევე ითვალისწინებს დარგში არსებული აქტუალური პრობლემების გადაწყვეტისათვის ერთობლივი შემოქმედებითი ჯგუფების ჩამოყალიბებას, სპეციალისტთა კვალიფიკაციის ამაღლებას, სამეცნიერო მიღწევებისა და ინოვაციური ტექნოლოგიების სფეროში გამოცდილების გაზიარებას.

ბათუმის შოთა რუსთაველის სახელმწიფო უნივერსიტეტი 2016 წლის საშემოდგომო მიღებისთვის ახალი პროფესიული მოდულური პროგრამების განხორციელებას გეგმავს. ამ მიზნით უნივერსიტეტში 12 მაისიდან 14 მაისის ჩათვლით პროფესიულ კვალიფიკაციათა განვითარების ხელშეწყობის პროგრამის ფარგლებში შეხვედრა გაიმართა მოდულური პროფესიული საგანმანათლებლო პროგრამების ხელმძღვანელებთან. კონსულტაციები პროგრამების დანერგვის კონსულტირებისა და ხელშეწყობის სპეციალისტებმა ქალბატონმა დალი კალაძემ და ირმა გრძელიძემ განახორციელეს.

განათლების საერთაშორისო ცენტრმა ბათუმის შოთა რუსთაველის სახელმწიფო უნივერსიტეტში საინფორმაციო შეხვედრა გამართა. შეხვედრა 2016-2017 სასწავლო წლისთვის საზღვარგარეთ სამაგისტრო, სადოქტორო და სახელმწიფო დაწესებულებაში დასაქმებულ პირთათვის კვალიფიკაციის ამაღლების პროგრამებს შეეხებოდა. პროგრამის კოორდინატორმა ნინო სულავამ სტუდენტებსა და აკადემიურ პერსონალს კონკურსის მოთხოვნებისა და პირობების შესახებ ინფორმაცია მიაწოდა.

გაეროს მოდელირებული ახალგაზრდული ასამბლეა სასტუმრო „ლეოგრანდში’’ საზიეომოდ დაიხურა. გამოვლინდა სარეზოლუციო პროექტების გამარჯვებული სტუდენტები და მოსწავლეები. პროექტის გამარჯვებული ბათუმის შოთა რუსთაველის სახელმწიფო უნივერსიტეტის საერთაშორისო ურთიერთობების 1-ლი კურსის სტუდენტი ირინე ტაკიძე გახდა, რომელიც 2 თვით უცხოეთში სტაჟირებაზე გაემგზავრება. დახურვის ცერემონიაზე ორგანიზატორებმა პროექტში მონაწილე ლიდერი სტუდენტები, ორგანიზატორები და ღონისძიების მხარდამჭერები სერტიფიკატებით დააჯილდოეს.

ბათუმის შოთა რუსთაველის სახელმწიფო უნივერსიტეტში ევროპის დღე რამდენიმე ღონისძიებით აღინიშნა. კვირეული ისტორიის სპეციალობის სტუდენტთა კონფერენციით -„ევროპა და საქართველო“ გაიხსნა. შედგა ფილმის „მოგზაურობა ეროპაში“ ჩვენება. უმაღლესი საგანმანათლებლო დაწესებულების წარმომადგენლებმა სტუდენტებს საზღვარგარეთ სწავლის პირობები გააცნეს და გაცვლითი პროგრამების შესახებ პრეზენტაციები წარუდგინეს. ღონისძიების ფარგლებში სტუდენტებმა სახელწოდებით -„ევროპა იწყება საბერძნეთით“ ანტიკური სამოსის დეფილე გამართეს, ასევე საფრანგეთის, გერმანიის, ინგლისისა და სლავური სამყაროების კუთხეები მოაწყვეს, სადაც ნაციონალური სამზარეულო, ტანსაცმელი და ტრადიციები წარმოადგინეს.