ახალი ამბები

ბათუმის შოთა რუსთაველის სახელმწიფო უნივერსიტეტსა და რელიგიის საკითხთა სახელმწიფო სააგენტოს შორის თანამშრომლობის მემორანდუმი გაფორმდა. დოკუმენტი მიზნად ისახავს ხელი შეუწყოს რელიგიის მეცნიერულ შესწავლას, რელიგიათმცოდნეობის, რელიგიისა და პოლიტიკის, რელიგიის სამართლის მიმართულებით ერთობლივი პროგრამებისა და პროექტების შემუშავებას. უმაღლესი საგანმანათლებლო დაწესებულება სააგენტოსთან ერთად უზრუნვეყლყოფს საექსპერტო და კვლვევითი ცენტრების ჩამოყალიბებასა და სემინარების ჩატარებას.

,,ელექტრონული მმართველობა: მიღწევები და პერსპექტივები"- ამ სახელწოდებით ბათუმის შოთა რუსთაველის სახელმწიფო უნივერსიტეტში სამეცნიერო კონფერენცია გაიმართა. სამეცნიერო სესიაში ქართველი, მოლდაველი და აზერბაიჯანელი პროფესორები მონაწილეობდნენ. მომხსენებლებმა საქართველოში ელექტრონული მმართველობის დამკვიდრების საკითხებზე, განვითარების პროცესში არსებულ პრობლემებსა და გადაჭრის გზებზე იმსჯელეს. თემატიკა ითვალისწინებდა როგორც საერთაშორისო, ასევე ეროვნული გამოცდილების წარმოჩენას. კონფერენცია ბათუმის შოთა რუსთაველის სახელმწიფო უნივერსიტეტის სოციალურ და პოლიტიკურ მეცნიერებათა ფაკულტეტისა და საქართველოს პოლიტოლოგიის ინსტიტუტის ორგანიზებით ბათუმში მეორედ ჩატარდა.

ბათუმის შოთა რუსთაველის სახელმწიფო უნივერსიტეტმა თურქეთის ორდუს სოციალურ მეცნიერებათა სკოლის პროფესორებსა და პედაგოგებს უმასპინძლა. სტუმრები უმაღლესი საგანმანათლებლო დაწესებულების ისტორიას, ფაკულტეტებს, საგანმანათლებლო პროგრამებს გაეცნენ. მხარეები მემორანდუმის გაფორმებაზე, ერთობლივი კვლევების წარმოებასა და გაცვლითი პროგრამების განხორციელებაზე შეთანხმდნენ.

დასრულდა ევროკომისიის მიერ დაფინანსებული ერასმუს მუნდუსის გავცლითი პროექტის ,,EUROEAST” გამოცხადებული საგრანტო კონკურსი. ბათუმის შოთა რუსთაველის სახელმწიფო უნივერსიტეტი ულოცავს ბსუ-ს სტუდენტებსა და მონაწილეებს გამარჯვებას და წარმატებებს უსურვებს.

საქართველოს თანამედროვე ხუთჭიდისა და ტრიატლონის ფედერაციის წარმომადგენლები ბსუ-ს სტუდენტებს შეხვდნენ. ახალგაზრდებს სპორტის სახეობები და შეჯიბრის ორგანიზებასთან დაკავშირებული საკითხები გააცნეს. 18-20 სექტემბერს ბათუმი თანამედროვე ხუთჭიდის საერთაშორისო კავშირის მხარდაჭერით ბიატლსა და ტრიატლში მსოფლიო ჩემპიონატს უმასპინძლებს. საერთაშორისო ღონისძიებისთვის დაგეგმილია მოხალისედ 100 სტუდენტის შერჩევა. ჩემპიონატში 12 ასაკობრივ კატეგორიაში 30 ქვეყნის 350-მდე სპორტსმენი მიიღებს მონაწილეობას.