ახალი ამბები

უნივერსიტეტში საქართველოს სოფლის მეურნეობის მეცნიერებათა აკადემიის წევრის, ბათუმის შოთა რუსთაველის სახელმწიფო უნივერსიტეტის აგრარული და მემბრანული ტექნოლოგიების ინსტიტუტის მთავარი მეცნიერ-თანამშრომლის, აკადემიკოს გურამ პაპუნიძის დაბადებიდან 70 და სამეცნიერო-პედაგოგიური მოღვაწეობის 45 წლის იუბილე აღინიშნა. ღვაწლმოსილ მეცნიერს იუბილე მიულოცეს, სამახსოვრო საჩუქრები გადასცეს და მის ღვაწლზე ისაუბრეს უნივერსიტეტის რექტორმა, პროფესორმა ალიოშა ბაკურიძემ, აჭარის ა.რ. უმაღლესი საბჭოს თავმჯდომარემ ავთანდილ ბერიძემ, საქართველოს მეცნიერებათა ეროვნული აკადემიის პრეზიდენტმა, აკადემიკოსმა გიორგი კვესიტაძემ, აჭარის ა.რ. განათლების, კულტურისა და სპორტის მინისტრმა გიორგი თავამაიშვილმა, ბათუმის მერის მოვალეობის შემსრულებელმა გიორგი ერმაკოვმა, ბათუმის საკრებულოს თავმჯდომარემ ირაკლი ჩავლეიშვილმა, კოლეგებმა, საზოგადოების წარმომადგენლებმა და მეგობრებმა. გურამ პაპუნიძეს რამდენიმე ათეული წელია მნიშვნელოვანი წვლილი შეაქვს ქართული მეცნიერების განვითარებასა და საუნივერსიტეტო ცხოვრებაში. იყო საქართველოს პარლამენტისა და აჭარის უზენაესი საბჭოს წევრი, ბათუმის საქალაქო საბჭოს დეპუტატი, სამეცნიერო-კვლევითი ინსტიტუტის დირექტორი, არჩეულია საქართველოს მეცნიერებათა ეროვნული აკადემიის სამეცნიერო საბჭოს წევრად და მევენახეობა-მეღვინეობის დარგის მთავარ მეცნიერ-კონსულტანტად

აუტიზმის საერთაშორისო დღესთან დაკავშირებით ბათუმის შოთა რუსთაველის სახელმწიფო უნივერსიტეტის სტუდენტური თვითმმართველობისა და სოციალურ მეცნიერებათა, ბიზნესისა და სამართალმცოდნეობის ფაკულტეტის წარმომადგენლებმა ინკლუზიური ჯგუფის მოზარდები მოინახულეს და ტკბილეული გადასცეს. შეხვედრა მიზნად ისახავდა აუტიზმის მქონე პირთა საზოგადოებაში ინტეგრირების ხელშეწყობასა და ცნობიერების გაზრდას. ბათუმის მე-6 საჯარო სკოლაში არსებული ინტეგრირებული ჯგუფის მოსწავლეებმა და თამარის დასახლებაში საოჯახო ტიპის სახლში მყოფმა განსაკუთრებული საჭიროების მქონე ბავშვებმა სტუდენტებს სხვადასხვა სახის ნამუშევრები, ნახატები და თიხისგან დამზადებული ნივთები წარუდგინეს. 2007 წლის 18 დეკემბერს გენერალურმა ასამბლეამ 2 აპრილი აუტიზმის შესახებ ინფორმაციის გავრცელების მსოფლიო დღედ გამოაცხადა

საქართველოს მეცნიერებათა ეროვნული აკადემიის პრეზიდენტმა, აკადემიკოსმა გიორგი კვესიტაძე ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა თემაზე: „ბიოტექნოლოგია - XXI საუკუნეში ქვეყნის განვითარების მაგისტრალური გზა“. აკადემიკოსმა სტუდენტებსა და პროფესორ-მასწავლებლებს მეცნიერებათა აკადემიაში განხორციელებული ცვლილებები, დაგეგმილი პროექტები და არსებული პრობლემების გადაჭრის გზები გააცნო. ისაუბრა ბიოტექნოლოგიის სიახლეებზე, აქტუალურ საკითხებსა და XXI საუკუნის გამოწვევებზე. მომხსენებელმა ყურადღება გაამახვილა ისეთ მნიშვნელოვან პრობლემებზე, როგორიცაა: სურსათისა და მისი ცალკეული ინგრედიენტების იაფი და მასიური წარმოება ტრადიციული და არატრადიციული ტექნოლოგიებით, მასშტაბური ურბანიზაციით გამოწვეული ეკოლოგიური მდგომარეობის მკვეთრი გაუარესება, ალტერნატიული ენერგომატარებლები, რადიაციის ფონის ზრდა, ბუნებაში სპონტანური მუტაციების და მუტაგენური ეფექტის მნიშვნელოვანი მატება, ახალი ტიპის სამკურნალო საშუალებები, გენმოდიფიცირებული ორგანიზმები: პრობლემები და გამოყენება.

აჭარის ა.რ. განათლების, კულტურისა და სპორტის სამინისტროს წარმომადგენლებმა ბათუმის შოთა რუსთაველის სახელმწიფო უნივერსიტეტის სტუდენტებსა და პროფესორ-მასწავლებლებს პროგრამა „უმაღლესი განათლების ხელშეწყობა“ წარუდგინეს. სამინისტრო პროგრამას პირველად ახორციელებს და მიზნად ისახავს რეგიონში არსებული უმაღლესი საგანმანათლებლო დაწესებულებების ხელშეწყობას. პროექტი ითვალისწინებს უცხოეთის წამყვან უნივერსიტეტებსა და სამეცნიერო-კვლევით ორგანიზაციებში სასწავლო-სამეცნიერო პროექტებისა და გაცვლითი პროგრამების განხორციელებას. პროფესორ-მასწავლებლებს შესაძლებლობა ექნებათ მონაწილეობა მიიღონ საზღვარგარეთ დაგეგმილ კონგრესში, ფორუმში, სიმპოზიუმსა და სემინარში. პროექტი ასევე ფინანსურად უზრუნველყოფს კონფერენციებისა და საჯარო ლექციების ჩატარებას.

უკრაინაში, ქალაქ კიევში ტარას შევჩენკოს სახელობის სახელმწიფო უნივერსიტეტში გამართულ სტუდენტთა, დოქტორანტთა და ახალგაზრდა მეცნიერთა XII საერთაშორისო კონფერენციაში: „ШЕВЧЕНКIВСЬКА ВЕСНА: ЕКОНОМIКА 2014“ მონაწილეობა მიიღეს ბათუმის შოთა რუსთაველის სახელმწიფო უნივერსიტეტის ,,მენეჯმენტის” სპეციალობის მე-4 კურსის სტუდენტებმა. პროფესორ გელა მამულაძის ხელმძღვანელობით მანანა დიდმანიძემ, დარინა გორგილაძემ და ქეთევან თავდგირიძემ სესიაზე მოხსენებები წაიკითხეს ისეთ მნიშვნელოვან საკითხებზე, როგორიცაა: „სარეკლამო ბიზნესში არსებული ტენდენციები და პერსპექტივა“, „კომერციული ბანკების პრობლემები და მათი გადაჭრის გზები“, „მართვის პრობლემები ვაჭრობის სფეროში და მათი აღმოფხვრის გზები“. ხუთდღიან კონფერენციაზე წარდგენილი ნაშრომები კონფერენციის შრომების კრებულში დაიბეჭდა და ფორუმის მონაწილე სტუდენტებს სერთიფიკატები გადაეცათ. სოციალურ მეცნიერებათა, ბიზნესისა და სამართალმცოდნეობის ფაკულტეტი სტუდენტებს ულოცავს წარმატებას.