ახალი ამბები

სააქტო დარბაზში ბათუმის შოთა რუსთაველის სახელმწიფო უნივერსიტეტის რექტორის, პროფესორ ალიოშა ბაკურიძისა და პროფესორ-მასწავლებლების ტრადიციული შეხვედრა გაიმართა. რექტორმა აკადემიურ პერსონალს „უმაღლესი განათლების შესახებ კანონში“ შეტანილი ცვლილებები გააცნო და გასული სასწავლო წლის სემესტრის შედეგები შეაჯამა. ასევე ისაუბრა აკრედიტაციისა და ავტორიზაციის ვადების შეცვლაზე, შესყიდვების გამარტივებულ წესზე, უნივერსიტეტის ავტონომიაზე, უმაღლესი განათლებისა და მეცნიერების რეფორმის კონცეფციასა და სამეცნიერო საგრანტო პროექტებზე.

ბათუმის შოთა რუსთაველის სახელმწიფო უნივერსიტეტის რექტორი, პროფესორი ალიოშა ბაკურიძე, ადმინისტრაციის ხელმძღვანელი ედიშერ ჩავლეიშვილი, რექტორის მოადგილეები ნათია წიკლაშვილი და ირაკლი ბარამიძე უნივერსიტეტის ინსტიტუტების მეცნიერ-თანამშრომლებს შეხვდნენ. სამეცნიერო-კვლევითი დაწესებულების წარმომადგენლებმა ინსტიტუტების აქტუალურ საკითხებზე, კვლევის პრიორიტეტულ მიმართულებებზე, მატერიალურ-ტექნიკური ბაზის გაუმჯობესების აუცილებლობაზე, მიღწევებსა და სამომავლო გეგმებზე ისაუბრეს. შეხვედრა კითხვა-პასუხის რეჟიმში წარიმართა და რექტორმა მკვლევარების შეკითხვებს უპასუხა.

უნივერსიტეტში ნიკო ბერძენიშვილის ინსტიტუტის უფროსი მეცნიერ-თანამშრომლის ოთარ თურმანიძის წიგნის „აჭარის პოლიტიკური და ეკონომიკური ისტორია (1921-1940)“ წიგნის წარდგინება გაიმართა. მონოგრაფია აჭარის XX საუკუნის 20-30-იან წლების პოლიტიკური და სოციალურ-ეკონომიკური ისტორიის საკითხებს ეძღვნება. ნაშრომში აღწერილია საოლქო რევკომის ფორმირება, საბჭოთა ხელისუფლების გამოცხადება, ბრძოლა თურქი ოკუპანტების წინააღმდეგ, ავტონომიური რესპუბლიკის შექმნა, სახელმწიფო ორგანოების ჩამოყალიბება. ასევე განხილულია ეკონომიკური გარდაქმნები: წარმოების ძირითად საშუალებათა ნაციონალიზაცია, სამრეწველო-ეკონომიკური და აგრარული რეფორმები. ავტორი განიხილავს მრეწველობის, ტრანსპორტისა და სოფლის მეურნეობის ძირითად დარგებს. ნაშრომი განკუთვნილია სპეციალისტების, სტუდენტებისა და მკითხველთა ფართო წრისათვის.

ღია კარის დღეები - 2014 ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებმა და სტუდენტებმა ხულოში, შუახევში, ქედაში, ხელვაჩაურში, ქობულეთში, ფოთში, ოზურგეთში, ლანჩხუთსა და ჩოხატაურში გამართული შეხვედრებით დაასრულეს. უნივერსიტეტის წარმომადგენლებმა უმაღლესი საგანმანათლებლო დაწესებულების პრეზენტაცია გამართეს. მეთორმეტე კლასის მოსწავლეები და აბიტურიენტები უნივერსიტეტის ფაკულტეტებს, სახელმწიფოს მიერ დაფინანსებულ და აკრედიტებულ საგანმანათლებლო პროგრამებს, პრიორიტეტებს, სოციალური პროგრამებს, სტიპენდიებს, უცხოეთის გაცვლით პროგრამებსა და სიახლეებს გაეცნენ. შეხვედრის მონაწილეებს ტრადიციულად, ბსუ-ს საინფორმაციო ბუკლეტები და სამახსოვრო საჩუქრები გადაეცათ.

სააქტო დარბაზში სტუდენტური ლიტერატურული ჟურნალ “ინტეგრალის” წარდგინება და ლიტერატურული საღამო გაიმართა. მოწვეულმა დეკლამატორებმა სტუდენტებს, პროფესორ-მასწავლებლებს, მწერლებსა და საზოგადოების წარმომადგენლებს პირველ ნომერში დაბეჭდილი ლექსები წაუკითხეს. ალმანახი ბათუმის შოთა რუსთაველის სახელმწიფო უნივერსიტეტის ინიციატივითა და ფინანსური მხარდაჭერით სტუდენტებმა: მინდია ცეცხლაძემ, ირაკლი ყურუამ, ლაშა მიქელაძემ დაარსეს. „ინტეგრალი“ წელიწადში ორჯერ გამოვა და მიზნად ისახავს საზოგადოებისათვის შემოქმედებითი ნიჭის მქონე სტუდენტების გაცნობას. სადებიუტო ნომერში საქართველოს რვა უნივერსიტეტის ცამეტი სტუდენტის ლექსი დაიბეჭდა. შემდეგ ნომრებში მკითხველი იხილავს სხვადასხვა ჟანრის მხატვრულ ნაწარმოებებს. ჟურნალი საქველმოქმედო ხასიათისაა და გაყიდვით შემოსული თანხა სოციალურად დაუცველი და წარმატებული სტუდენტების დასახმარებლად გადაირიცხება. ახალგაზრდებს ალმანახში საკუთარი შემოქმედების გამოსაქვეყნებლად შეუძლიათ დაუკავშირდნენ სარედაქციო ჯგუფს შემდეგ ელექტრონულ მისამართზე: lit.integrali@gmail.com; lit.integrali@mail.ru