ახალი ამბები

საგარეო ურთიერთობათა და სტრატეგიული განვითარების სამსახურის ორგანიზებით "ერაზმუს მუნდუსის" გაცვლითი პროგრამების პრეზენტაცია გაიმართა. წარდგინებაზე სტუდენტები, პროფესორ-მასწავლებლები, მკვლევრები და ადმინისტრაციის წარმომადგენლები პროგრამის განხორციელების წესებსა და კონკურსის ჩატარების პირობებს გაეცნენ. უნივერსიტეტი ევროკავშირის მიერ დაფინანსებული „ერაზმუს მუნდუსის“ პროგრამის 6 პროექტშია ჩართული, რაც მსურველებს შესაძლებლობას აძლევს განათლება ევროპის წამყვან უნივერსიტეტებში მიიღონ. გაცვლით პროგრამაში მონაწილეობა ბათუმის შოთა რუსთაველის სახელმწიფო უნივერსიტეტის სტუდენტებთან ერთად, საქართველოს სხვადასხვა უმაღლესი საგანმანათლებლო დაწესებულების სტუდენტებსაც შეუძლიათ. დამატებითი ინფორმაციისათვის იხილეთ ბსუ-ს ვებგვერდი: www.bsu.edu.ge

ბათუმის შოთა რუსთაველის სახელმწიფო უნივერსიტეტს რიზეს რეჯებ ტაიპ ერდოგანის უნივერსიტეტის რექტორი, პროფესორი ხუსეინ კარამანი და პროფესორ-მასწავლებლები ეწვივნენ. შეხვედრის ფარგლებში უმაღლეს საგანმანათლებლო დაწესებულებების რექტორებმა ხელი მოეწერეს ,,მევლანას” გაცვლითი პროგრამის ორმხრივ ხელშეკრულებას, რომელიც სტუდენტებისა და პროფესორ-მასწავლებლების გაცვლას ითვალისწინებს. სტუდენტებს შეუძლიათ თურქეთის რესპუბლიკის უმაღლეს საგანმანათლებლო დაწესებულებებში ისწავლონ ერთი ან ორი სემესტრით, ხოლო აკადემიურ პერსონალს ლექციების ჩატარება შეუძლიათ ერთი კვირიდან სამი თვის განმავლობაში.

ცნობილი მეცნიერისა და საზოგადო მოღვაწის, პუბლიცისტის, ისტორიის მეცნიერებათა დოქტორის, პროფესორ აბელ სურგულაძის 80 წლისადმი მიძღვნილი სამეცნიერო კონფერენცია გაიმართა ბათუმის შოთა რუსთაველის სახელმწიფო უნივერსიტეტში. ღვაწლმოსილი მეცნიერის ცხოვრებასა და მოღვაწეობაზე ისაუბრეს და მის ხსოვნას პატივი მიაგეს უნივერსიტეტის რექტორმა, პროფესორმა ალიოშა ბაკურიძემ, პროფესორ-მასწავლებლებმა, ემერიტუს-პროფესორებმა, კოლეგებმა, სტუდენტებმა, საზოგადო მოღვაწეებმა, მეგობრებმა. პროფესორმა აბელ სურგულაძემ ღირსეულად განვლო თავისი ცხოვრების გზა. მის სახელთან არის დაკავშირებული 1991 წელს უნივერსიტეტში საქართველოს ისტორიის კათედრის დაფუძნება და საქართველოს ისტორიის პოპულარიზაცია. ცნობილი მკვლევრის რედაქტორობით დაიწყო საქართველოს ისტორიის კათედრის გაზეთ "ძლევაის" და კრებულ "საისტორიო მაცნე"-ს გამოცემა. კონფერენციის ფარგლებში მკვლევრებმა სამეცნიერო სტატიები წარმოადგინეს საქართველოს ისტორიის აქტუალურ საკითხებზე.

საქართველოს უმაღლესი საგანმანათლებლო დაწესებულებების 2014 წლის სტუდენტური ლიგის პირველი შესარჩევი ეტაპი ფუტსალში ბათუმის შოთა რუსთაველის სახელმწიფო უნივერსიტეტის ნაკრებმა წარმატებულად დაასრულა. ქუთაისის აკაკი წერეთლის სახელმწიფო უნივერსიტეტის გუნდთან გამართული შეხვედრა ანგარიშით 5:2, ბათუმელების სასარგებლოდ დამთავრდა. დასავლეთის გუნდებს შორის ბსუ-ს საუკეთესო ნაკრები ასპარეზობას 2014 წლის თებერვლიდან უმაღლეს ლიგაში განაგრძობს. პირველობა საქართველოს საუნივერსიტეტო სპორტის ფედერაციის, საქართველოს ფუტსალის ასოციაციის, საქართველოს სპორტისა და ახალგაზრდობის საქმეთა სამინისტროს ორგანიზებითა და კომპანია „ბილაინის“ მხარდაჭერით იმართება. უნივერსიტეტი ულოცავს ფუტზალის ნაკრებს გამარჯვებას და წარმატებებს უსურვებს.

შოთა რუსთაველის ეროვნულმა სამეცნიერო ფონდმა საზღვარგარეთ არსებული ქართული მატერიალური და სულიერი მემკვიდრეობის სამეცნიერო კვლევისათვის 2013 წლის სახელმწიფო სამეცნიერო და 2013-2014 წლების დოქტორანტურის საგანმანათლებლო პროგრამების საგრანტო კონკურსების ფარგლებში, ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებისა და მკვლევრების პროექტები დააფინანსა. ასოცირებული პროფესორის ზაზა შაშიკაძის ხელმძღვანელობით განხორციელდება პროექტი „ქართველ მუსლიმთა მატერიალური და სულიერი მემკვიდრეობა თურქეთში“. ემერიტუს-პროფესორი და ნიკო ბერძენიშვილის ინსტიტუტის მთავარი მეცნიერ-თანამშრომელი შუშანა ფუტკარაძე უხელმძღვანელებს პროექტს „სტამბოლის ქართული სავანის ეპისტოლური და მემუარული მემკვიდრეობა“. სახელმწიფო საგრანტო დაფინანსება მიიღო ასევე პროფესორ ნუგზარ ღომიძის სადოქტორო პროგრამამ ,,მოდულირებული სიგნალები დისპერსიულ გარემოში”, პროფესორ ალეკო კალანდიას სადოქტორო პროგრამამ ,,სტევიას ბიოლოგიურად აქტიური ნივთიერებები და მათი ცვალებადობა გადამუშავების პროცესში“ და ასოცირებული პროფესორის ლეილა ახვლედიანის სადოქტორო პროგრამამ ,,აჭარაში გავრცელებული ნოზოკომიური ინფექციების გამომწვევების გამოყოფა, იდენტიფიკაცია და ანტიბიოტიკორეზისტენტობის პროფილის შესწავლა”.