ახალი ამბები

საჯარო სკოლის მოსწავლეებისა და ბათუმის შოთა რუსთაველის სახელმწიფო უნივერსიტეტის სტუდენტების საინიციატივო ჯგუფმა ,,Carpe Diem” სოციალურად დაუცველი სტუდენტებისთვის საქველმოქმედო კონცერტი გამართა. ღონისძიებაში უმაღლესი საგანმანათლებლო დაწესებულების ქორეოგრაფიული ანსამბლი ,,ტბეთი“, გოგონათა და ვაჟთა ფოლკლორული ანსამბლი, თანამედროვე ცეკვის ანსამბლი ,,M style 13” და საჯარო სკოლის მოსწავლეების ცეკვისა და სიმღერის მუსიკალური ჯგუფები მონაწილეობდნენ. კონცერტიდან შემოსული თანხით ,,წარმატებული და სოციალურად დაუცველი სტუდენტების მხარდაჭერის ფონდის“ რეკომენდაციით ბსუ-ს სოციალურად დაუცველ სტუდენტებს - გულადი და თეონა ვაშაყმაძეებს I სემესტრის სწავლის საფასური დაუფინანსდათ.

ბათუმის შოთა რუსთაველის სახლემწიფო უნივერსიტეტის სოციალურ მეცნიერებათა, ბიზნესისა და სამართალმცოდნეობის ფაკულტეტის II კურსის სტუდენტი ლუკა ზაქარიაძე ,,საქართველოს ვარსკვლავი“ გახდა. 31 დეკემბერს, "რუსთავი 2"–ის მუსიკალური პროექტის "საქართველოს ვარსკვლავის" ფინალში ტიტულის მოსაპოვებლად კონკურსის სამი მონაწილე - ანი გოზალიშვილი, ლუკა ზაქარიაძე და გიორგი ნადიბაიძე იბრძოდა. ლუკა ზაქარიაძემ ანსამბლ "შვიდკაცასთან" ერთად "ჩაკრულო" და ჯგუფ Muse-ის ჰიტი Starlight შეასრულა. საქართველოს ვარსკვლავმა ჟიურის დადებითი შეფასება და საქართველოს მოსახლეობის ხმათა 75% მოიპოვა. ბათუმის შოთა რუსთაველის სახელმწიფო უნივერსიტეტი ულოცავს ლუკა ზაქარიაძეს გამარჯვებას და წარმატებებს უსურვებს.

სოციალურ მეცნიერებათა, ბიზნესისა და სამართალმცოდნეობის ფაკულტეტის სამართალმცოდნეობის სპეციალობის I კურსის სტუდენტებმა წმიდა ეკატერინეს სახელობის სავანის მცხოვრებთა მხარდამჭერი საქველმოქმედო კონცერტი „ჩვენც დავბერდებით“ ჩაატარეს. კონცერტში ახალგაზრდებთან ერთად სავანის ანსამბლი „სათნოება“ მონაწილეობდა, სტუდენტებმა და მიუსაფრმა მოხუცებმა საგალობლები, ხალხური და ცნობილი ქართული სიმღერები შეასრულეს. საღამოზე ასევე წარმოდგენილი იყო თავშესაფარის ცხოვრების ამსახველი ფოტო და ვიდეოკოლაჟი

2012 წელი შეაფასა და დამდეგი შობა-ახალი წელი მიულოცა პროფესორ-მასწავლებლებს ბათუმის შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ. სააქტო დარბაზში გამართულ შეხვედრაზე რექტორმა აღნიშნა, რომ ძირითადი აქცენტები სწავლების ორგანიზებისა და სწავლის გაუმჯობესებისაკენ იყო მიმართული. მიმდინარე წელს თანამშრომლობის მემორანდუმი გაფორმდა უცხოეთის 16 ქვეყნის უნივერსიტეტთან და საქართველოს ორმოცამდე სახელმწიფო და კერძო სტრუქტურასთან. უნივერსიტეტმა უმასპინძლა ოთხ საზაფხულო სკოლას. გარდა ამისა, ბსუ-ს სტუდენტებმა მონაწილეობა მიიღეს თურქეთის რესპუბლიკის უნივერსიტეტებში ორგანიზებულ ხუთ საზაფხულო და ერთ ზამთრის სკოლაში. მეცნიერებმა და პროფესორ-მასწავლებლებმა არაერთი სახელმძღვანელო და მონოგრაფია შეადგინეს. იქმნება ელექტრონული ბიბლიოთეკა. უნივერსიტეტში წარმატებული და სოციალურად დაუცველი სტუდენტების მხარდაჭერის ფონდი დაფუძნდა, რომლის მიზანია წარმატებული და სოციალურად დაუცველი სტუდენტების სწავლის საფასურის დაფინანსება, სტიპენდიებით უზრუნველყოფა და დასაქმების ხელშეწყობა

ოთხმა აზერბაიჯანელმა სტუდენტმა ბათუმის შოთა რუსთაველის სახელმწიფო უნივერსიტეტსა და ნახჭევანის სახელმწიფო უნივერსიტეტს შორის გაფორმებული თანამშრომლობის მემორანდუმის ფარგლებში ერთსემესტრიანი სასწავლო პროგრამა გაიარეს. უნივერსიტეტში გამართულ შეხვედრაზე რექტორმა, პროფესერმა ალიოშა ბაკურიძემ და აზერბაიჯანის გენერალურმა კონსულმა ხუსინ ნაჯაფოვმა ერთობლივი პროექტების მნიშვნელობაზე ისაუბრეს, გაცვლითი პროგრამის მიმდინარეობა შეაფასეს და მასში მონაწილე სტუდენტებს წარმატებები უსურვეს. მარტში ბსუ-ს სტუდენტები სასწავლებლად ნახჭევანში გაემგზავრებიან.