ახალი ამბები

ბათუმის შოთა რუსთაველის სახელმწიფო უნივერსიტეტის სოციალურ მეცნიერებათა, ბიზნესისა და სამართალმცოდნეობის ფაკულტეტსა და გრაცის უნივერსიტეტის სამართლის ფაკულტეტს შორის მემორანდუმი გაფორმდა. თანამშრომლობა ხელს შეუწყობს სამართლებრივი კვლევების პოპულარიზაციას, სტუდენტებისა და იურისტების პროფესიულ განვითარებას, ერთობლივი სასწავლო და საგანმანათლებლო პროგრამების განხორციელებას. მხარეები ასევე სასწავლო, სამეცნიერო და მეთოდოლოგიური ლიტერატურის ურთიერთგაცვლაზე, ერთობლივი კონფერენციების, სემინარების, ვორქშოფების ჩატარებასა და ბიბლიოთეკების გამოყენებაზე შეთანხმდნენ. მემორანდუმის ფარგლებში დაიგეგმა ბსუ-ს ბაზაზე „ევროპული სამართალი“-ს თემაზე საზაფხულო სკოლის ჩატარება.

თანამშრომლობის მემორანდუმი გაფორმდა ბათუმის შოთა რუსთაველის სახელმწიფო უნივერსიტეტსა და იუნუს ემრეს ინსტიტუტს შორის. ხელშეკრულება ითვალისწინებს უმაღლესი საგანმანათლებლო დაწესებულებების ერთობლივი სასწავლო-სამეცნიერო პროექტებისა და გაცვლითი პროგრამების განხორციელებას. მემორანდუმი ხელს შეუწყობს განათლებისა და მეცნიერებათა ფაკულტეტის თურქული ენისა და ლიტერატურის მიმართულებისათვის თურქეთიდან მაღალკვალიფიციური კადრების მოწვევას, პროფესორ-მასწავლებლების უცხოეთში სტაჟირებას, კაბინეტების მატერიალურ-ტექნიკური ბაზის გაუმჯობესებასა და ლიტერატურის მიწოდებას.

„საბავშვო უნივერსიტეტის“ ეგიდით, ბათუმის შოთა რუსთაველის სახელმწიფო უნივერსიტეტში მათემატიკის ნიჭით დაჯილდოებულ მოზარდებს შორის გუნდური შეჯიბრი ჩატარდა. საჯარო სკოლების მოსწავლეები ერთმანეთს ორი საათის განმავლობაში მათემატიკური დავალებების ამოხსნაში ეჯიბრებოდნენ. პირველობა მიზნად ისახავდა მომავალი მათემატიკოსებისათვის ოლიმპიადის ტიპის ამოცანების სწავლებას, საჭირო უნარ-ჩვევების გამომუშავებას, უნივერსიტეტის პოპულარიზაციასა და აბიტურიენტების მოზიდვას. შეჯიბრი ყოველ შაბათს გაიმართება და მასში მონაწილეობის მიღება ყველა მსურველს შეეძლება.

ტურიზმის ფაკულტეტის ორგანიზებითა და გერმანიის საერთაშორისო თანამშრომლობის საზოგადოების მხარდაჭერით, ბათუმის შოთა რუსთაველის სახელმწიფო უნივერსიტეტში II პრაქტიკული კონფერენცია ,,საგანმანათლებლო და ტურიზმის ინდუსტრიის ორგანიზაციები” გაიხსნა. კონფერენცია მიზნად ისახავს ტურიზმის განათლების სფეროში საგანმანათლებლო სექტორისა და ტურიზმის ინდუსტრიის ორგანიზაციების ინტეგრაციას. მჭიდრო თანამშრომლობა ხელს შეუწყობს ტურიზმისა და მასპინძლობის დარგისათვის მაღალკვალიფიციური, სათანადო თეორიული ცოდნით, პრაქტიკული უნარ-ჩვევებითა და კომპეტენციებით აღჭურვილი, საერთაშორისო ტურისტული მომსახურების ბაზარზე კონკურენტუნარიანი სპეციალისტების მომზადებას. ორი დღის განმავლობაში ოთხი ქვეყნის ასამდე წარმომადგენელი ისეთ აქტუალურ საკითხებზე იმსჯელებს, როგორიცაა: კომუნიკაციური უნარები, პროფესიული სწავლების ხარისხი, სწავლების წინაპირობები პროფესიულ საგანმანათლებლო პროგრამებზე, პროფესიული სტანდარტები და სასწავლო პროგრამები.

ბათუმის შოთა რუსთაველის სახელმწიფო უნივერსიტეტში დამოუკიდებელი სტუდენტური მოძრაობა „ალტერნატივა“-ს ორგანიზებით სტუდენტები, პროფესორ-მასწავლებლები და საზოგადოების წარმომადგენლები შეიკრიბნენ. შეხვედრაზე სტუდენტური მოძრაობის წევრებმა 2007 წლის 8 ნოემბერს, უნივერსიტეტის დარბევის ამსახველი ვიდეო კადრები წარმოადგინეს და უმაღლეს საგანმანათლებლო დაწესებულებაში განვითარებული მოვლენები გაიხსენეს. ახალგაზრდებმა აკადემიურ პერსონალთან ერთად სპეცრაზმელების მიერ სტუდენტებისა და პროფესორ-მასწავლებლების დარბევის ფაქტები დაგმეს, დამნაშავეთა გამოვლენა და პოლიტპატიმრების, ბსუ–ს სტუდენტების: ცოტნე ანანიძისა და დიმიტრი ჭეიშვილის გათავისუფლება მოითხოვეს.