ახალი ამბები

ბათუმის შოთა რუსთაველის სახელმწიფო უნივერსიტეტში სტუდენტური თვითმმართველობის არჩევნები ჩატარდა. კენჭისყრაში 93 სტუდენტი და სამი საინიციატივო ჯგუფი: „ალტერნატიული ინიციატივა“, „გულო თურმანიძის საინიციატივო ჯგუფი“ და „აპოლიტიკა“ მონაწილეობდა. უმაღლესი საგანმანათლებლო დაწესებულების 6 საარჩევნო უბანზე 4 250-მდე სტუდენტს შეეძლო საკუთარი პოზიციის დაფიქსირება. ხმის მიცემის პროცედურას საარჩევნო სუბიექტებისა და არასამთავრობო ორგანიზაციების: „ახალგაზრდა იურისტთა ასოციაციისა“ და „საერთაშორისო გამჭვირვალობა - საქართველოს“ წარმომადგენლები აკვირდებოდნენ. სტუდენტური თვითმმართველობის არჩევნების შედეგებს ცენტრალური საარჩევნო კომისია უახლოეს მომავალში გამოაქვეყნებს.

ქართული ენის დღისადმი მიძღვნილი სამეცნიერო კონფერენცია გაიმართა ბათუმის შოთა რუსთაველის სახელმწიფო უნივერსიტეტში. პროფესორ-მასწავლებლებმა მოხსენებები წარმოადგინეს ქართული ენის სიწმინდეზე, მშობლიური ენის სწავლებისა და უფლებების დაცვის პრობლემეტიკაზე. ენათმეცნიერებმა ტრადიციულ სესიაზე ბოლო ერთი წლის განმავლობაში წარმოებული კვლევა-ძიების შედეგებთან ერთად ქართული ფილოლოგიის დეპარტამენტის პროფესორების ახალი წიგნები შეაფასეს და 1978 წლის 14 აპრილს განვითარებულ მოვლენებზე ისაუბრეს. 14 აპრილს დედაენის დღის აღსანიშნავად მსვლელობა უნივერსიტეტიდან დაიწყება და ილია ჭავჭავაძის ძეგლთან დასრულდება. სტუდენტები და პროფესორ-მასწავლებლები ძეგლს ყვავილებით შეამკობენ.

შოთა რუსთაველის დარბაზში ამერიკის შეერთებული შტატების ეროვნული გეოგრაფიული საზოგადოების (National Geographic Society) 125 წლის იუბილეს მიეძღვნა ჟურნალ „National Geographic“-ის პრეზენტაცია. ჟურნალის რედაქტორმა ლევან ბუთხუზმა სტუდენტებსა და პროფესორ-მასწავლებლებს მსოფლიოს ერთ-ერთი ყველაზე დიდი სამეცნიერო და საგანმანათლებლო ორგანიზაციის ოფიციალური გამოცემა წარუდგინა. „National Geographic“-ი 1888 წელს დაარსდა, ხოლო ქართულენოვანი ჟურნალის პირველი ნომერი მკითხველმა 2012 წლის ოქტომბერში მიიღო. პერიოდული გამოცემა 37 ენაზე იბეჭდება, მსოფლიოს 100-ზე მეტ ქვეყანაში ვრცელდება და 60 მილიონზე მეტი მკითხველი ჰყავს. 125 წლის განმავლობაში ამერიკული საზოგადოების დაფინანსებით არაერთი სამეცნიერო ექსპედიცია და პროექტი განხორციელდა. მის ინტერესებში შედის გეოგრაფიის, არქეოლოგიის, საბუნებისმეტყველო მეცნიერებების, მსოფლიო კულტურისა და ისტორიის შესწავლა. National Geographic Society-ის გრანტით გახდა შესაძლებელი საქართველოში დმანისის სამარხების საფუძვლიანი კვლევა და პირველი ევროპელების - ზეზვასა და მზიას აღმოჩენა

ნათია სირაბიძის საჯარო გამოსვლის პრაქტიკული სახელმძღვანელოს "წარმატების გასაღები" წარდგინება გაიმართა ბათუმის შოთა რუსთაველის სახელმწიფო უნივერსიტეტში. ავტორი საჯარო სიტყვის პრობლემებს იკვლევს თანამედროვეობასთან მიმართებაში. ნაშრომში მოცემულია ორატორული ხელოვნების ისტორია, ქართველ და უცხოელ ორატორთა გამოსვლების ნიმუშები. წიგნში თეორიულ მასალასთან ერთად წარმოდგენილია პრაქტიკული რეკომენდაციები. სახელმძღვანელოს წარდგინების შემდეგ ავტორმა სტუდენტებისათვის ღია ლექცია წაიკითხა დარწმუნების ტექნოლოგიებზე. შეხვედრა კითხვა-პასუხის რეჟიმში წარიმართა და წიგნის ავტორმა ახალგაზრდების შეკითხვებს უპასუხა.

ბათუმის შოთა რუსთაველის სახელმწიფო უნივერსიტეტის სტუდენტებმა და პროფესორ-მასწავლებლებმა 1989 წლის 9 აპრილს დაღუპული გმირების ხსოვნას პატივი მიაგეს. 24 წლის წინ განვითარებულ მოვლენებს მიეძღვნა სტუდენტთა მომსახურებისა და მხარდაჭერის სამსახურისა და სტუდენტთა სამეცნიერო ცენტრის ორგანიზებით გამართული სამეცნიერო სესია „1989 წლის 9 აპრილის მოვლენები და საქართველოს სახელმწიფოებრივი დამოუკიდებლობის აღდგენის აქტი". მომხსენებლებმა 1989 წლის 8-9 აპრილს მომხდარი ისტორიული ფაქტები შეაფასეს და მის მნიშვნელობაზე ისაუბრეს. 9 აპრილს დაღუპულთა მემორიალთან ასევე გაიმართა ტრაგიკული მოვლენების ამსახველი ფოტოქრონიკის ჩვენება, სტუდენტებმა და პროფესორ-მასწავლებლებმა კიდევ ერთხელ გაიხსენეს ტრაგიკულ ღამეს დაღუპული გმირები, სანთლები დაანთეს და მემორიალი ყვავილებით შეამკეს. ღონისძიების ფარგლებში მსვლელობა მოეწყო ეროვნული გმირის მერაბ კოსტავას ძეგლის მიმართულებით.