ახალი ამბები

ბათუმის შოთა რუსთაველის სახელმწიფო უნივერსიტეტში IV საერთაშორისო კვირეულის ეგიდით, განათლების საერთაშორისო დღე გაიმართა. ღონისძიება მიზნად ისახავდა ევროპული ღირებულებების პოპულარიზაციასა და ახალგაზრდებში ცნობიერების ამაღლებას. საერთაშორისო დღის ფარგლებში მოწყობილ გამოფენაში საკუთარი ქვეყნები წარმოადგინეს „ერაზმუს+“-ის გაცვლითი პროგრამის აკადემიურმა და ადმინისტრაციულმა პერსონალმა მიკოლას რომერის უნივერსიტეტიდან, ვიტაუტას მაგნუსის უნივერსიტეტიდან, დაუგავპლის უნივერსიტეტიდან, ვროცლავის უნივერსიტეტიდან, კოიმბრას პოლიტექნიკური ინსტიტუტიდან და გაცვლით პროგრამებში მონაწილე ბსუ-ს სტუდენტებმა. გამოფენაზე ასევე წარმოდგენილი იყო ნატოსა და ევროკავშირის შესახებ საინფორმაციო ცენტრის, პროგრამა „ჰორიზონტ ევროპისა“ და საერთაშორისო განათლების ფონდის კუთხეები.

საქართველოს საკონსტიტუციო სასამართლოს თავმჯდომარე მერაბ ტურავა, USAID-ის „სამართლის უზენაესობის პროგრამის" მიერ მოწვეულ ექსპერტი, ჯორჯიის შტატის მოსამართლე პეგი უოკერი ბათუმის შოთა რუსთაველის სახელმწიფო უნივერსიტეტსის იურიდიული და სოციალურ მეცნიერებათა ფაკულტეტის სამართალმცოდნეობის საბაკალავრო პროგრამის სტუდენტებს შეხვდნენ და საჯარო ლექცია წაიკითხეს თემაზე: „სამოსამართლო სამართალი და მისი როლი ქართულ და ამერიკული სამართლის პრაქტიკაში“. ლექცია ინტერაქციულ ხასიათს ატარებდა და სტუდენტებს საშუალება მიეცათ, მიეღოთ პასუხები მათთვის საინტერესო კითხვებზე, როგორც ამერიკელი სტუმრისგან, ასევე საკონსტიტუციო სასამართლოს თავმჯდომარისგან. მოსამართლის დღისადმი მიძღვნილი კვირეულის ეგიდით ბსუ-ს იურიდიული და სოციალურ მეცნიერებათა ფაკულტეტის, ევროპის იურისტთა ასოციიაცია (ელსა) ბათუმისა და USAID-ის სამართლის უზენაესობის პროგრამის თანამშრომლობის ფარგლებში გაიმართა.

ბსუ-ში „ერაზმუს+“-ის IV საერთაშორისო კვირეული გრძელდება. სტრატეგიული განვითარებისა და საგარეო ურთიერთობათა დეპარტამენტის წარმომადგენლებმა კვირეულის მონაწილეებს ბსუ-ს მატერიალურ-ტექნიკური ბაზა და ლაბორატორიები დაათვალიერებინეს, საგანმანათლებლო პროგრამები გააცნეს და ქართული კულტურისა და ენის შემეცნებით-გასართობი პრეზენტაცია წარუდგინეს. უცხოელმა პროფესორებმა ჰუმანიტარულ მეცნიერებათა, საბუნებისმეტყველო მეცნიერებათა და ჯანდაცვის, ეკონომიკისა და ბიზნესის ფაკულტეტების სტუდენტებისათვის ლექციები წაიკითხეს, ხოლო ადმინისტრაციულმა პერსონალმა პრეზენტაციები გამართა თავიანთი უნივერსიტეტებისა და ქვეყნების შესახებ.

სტუდენტური დღეების ფარგლებში, ბსუ-ში მათემატიკის დეპარტამენტის ასოცირებულ პროფესორ ზებურ ავალიანის ხსოვნისადმი მიძღვნილი ღია საჭადრაკო ტურნირი „ზებურ ავალიანის თასი - 2023“ ჩატარდა. ტურნირი 9 ტურად, შვეიცარული სისტემით გაიმართა და მასში 80-მდე სტუდენტი, პროფესორ-მასწავლებელი, ჭადრაკის მოყვარული და ნორჩი მოჭადრაკე ასპარეზობდა. პირველობა ბიზნესის ადმინისტრირების საბაკალავრო პროგრამის სტუდენტმა თედო ბოლქვაძემ მოიპოვა, მეორე ადგილზე გავიდა ეკონომიკის საბაკალავრო პროგრამის სტუდენტი თენგიზ დიდმანიძე, მესამე ადგილზე - ბსუ-ს კურსდამთავრებული თინათინ ბერიძე, ხოლო ნომინაციაში - „საუკეთესო მოჭადრაკე ბავშვი“ შოთა დოლიძემ გაიმარჯვა. ნომინაციის „საუკეთესო საჭადრაკო პარტიის გამარჯვებულს“, ეკონომიკის პროგრამის სტუდენტ რეზო გოგიტიძეს ბსუ-ს წარმატებული და სოციალურად დაუცველი სტუდენტების მხარდაჭერის ფონდმა სწავლა დაუფინანსა 375 ლარით.

ბათუმის შოთა რუსთაველის სახელმწიფო უნივერსიტეტში ევროკავშირის პროექტის „ევროდიალოგის“ ფარგლებში, გერმანიის არქეოლოგიის ინსტიტუტის ევრაზიის განყოფილებისა და გოეთეს ინსტიტუტის ორგანიზებით არქეოლოგიური ვორქშოფი გაიმართა. არქეოლოგიური ვორქშოფი მიზნად ისახავდა ადრე ბრინჯაოს ხანის ძეგლების წარდგენასა და მათთვის საჯარო რეესტრის შექმნის შესაძლებლობების განხილვას. პროექტში ქართველ მეცნიერებთან ერთად გერმანელი, მოლდოველი, აზერბაიჯანელი და სომეხი მკლევრები მონაწილეობდნენ.