ახალი ამბები

ბათუმის, ხელვაჩაურის, ქობულეთის, ლანჩხუთის, ოზურგეთის, ჩოხატაურის, ფოთის, ზუგდიდის კერძო და საჯარო სკოლების მეთორმეტე კლასის მოსწავლეებისა და აბიტურიენტებისათვის შოთა რუსთაველის სახელმწიფო უნივერსიტეტის პროფესორ-მასწავლებლებმა და სტუდენტებმა ღია კარის დღე გამართეს. მომავალ სტუდენტებს უმაღლესი საგანმანათლებლო დაწესებულების სასწავლო პროგრამები, პრიორიტეტები, ისტორია, სწავლების პირობები, გაცვლითი პროგრამები, სტიპენდიები, სოციალური პროგრამები და სიახლეები წარუდგინეს. აბიტურიენტებს უმაღლესი სასწავლებლის შესახებ სრული ინფორმაციის მისაღებად ბუკლეტები დაურიგეს.

სოციალურად დაუცველი, ობოლი, დევნილი, მრავალშვილიანი ოჯახის წევრი სტუდენტების სწავლის დასაფინანსებლად სააქტო დარბაზში ტრადიციული საქველმოქმედო კონცერტი გაიმართა. საქველმოქმედო საღამო შოთა რუსთაველის სახელმწიფო უნივერსიტეტის კულტურის ცენტრის, პროფესორ-მასწავლებლებისა და სტუდენტების ხელშეწყობით ჩატარდა. ღონისძიებაში უმაღლეს სასწავლებელთან არსებული ქორეოგრაფიული ანსამბლი „ტბეთი“, მხიარულთა და საზრიანთა ნაკრები „კარიკატურა“, ვაჟთა ფოლკლორული და გოგონათა ვოკალური ანსამბლები მონაწილეობდნენ.

თანამშრომლობის მემორანდუმი გაფორმდა შოთა რუსთაველის სახელმწიფო უნივერსიტეტსა და აჭარის ა.რ სპორტისა და ახალგაზრდობის საქმეთა დეპარტამენტს შორის. მემორანდუმი ხელს შეუწყობს კულტურის, განათლებისა და სპორტის მიმართულებით ერთობლივი პროგრამებისა და სოციალურ-ეკონომიკური პროექტების განხორციელებას. ხელშეკრულების ფარგლებში სტუდენტებსა და პროფესორ-მასწავლებლებს შესაძლებლობათ ეძლევათ კინოთეტრ „აპოლოს“ ბილეთები 50 პროცენტიანი ფასდაკლებით შეიძინონ. საგანმანათლებლო დაწესებულებაში პარტნიორი ორგანიზაციებისათვის განთავსდება საინფორმაციო ელექტრონული სტენდი.

შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ და ილიას უნივერსიტეტის რექტორმა, პროფესორმა გიგი თევზაძემ თანამშრომლობის მემორანდუმს მოაწერეს ხელი. ხელშეკრულება ითვალისწინებს ერთობლივი სადოქტორო პროგრამების განხორციელებას მეცნიერების სხვადასხვა მიმართულებით. უმაღლესი საგანმანათლებლო პროგრამები აკრედიტაციის გავლის შემდეგ ამოქმედდება და კურსდამთავრებულებს აკადემიური დოქტორის ორმაგი ხარისხი მიენიჭებათ. მემორადნუმის ფარგლებში დაიგეგმა ერთობლივი პროექტების განხორციელება, სამეცნიერო კონფერენციების ჩატარება და სამეცნიერო კვლევა-ძიების წარმოება.

ძვირფასო ქალბატონებო, შოთა რუსთაველის სახელმწიფო უნივერსიტეტის რექტორატი, ადმინისტრაცია, პროფესორ-მასწავლებლები და სტუდენტები გილოცავთ 3 მარტს - დედის დღესა და 8 მარტს - ქალთა საერთაშორისო დღეს. გისურვებთ ჯანმრთელობას, ბედნიერებას, სიკეთეს და წარმატებებს პედაგოგიურ, სამეცნიერო და შემოქმედებით საქმიანობაში.