ახალი ამბები

TEMPUS-ის ეროვნული ოფისის ხელმძღვანელმა ლიკა ღლონტმა შოთა რუსთაველის სახელმწიფო უნივერსიტეტის პროფესორ-მასწავლებლებს TEMPUS-ის პროგრამის ახალი საგრანტო კონკურსის პრიორიტეტები და ჩატარების პირობები გააცნო. პროგრამის მიზანია უმაღლესი განათლების რეფორმის ხელშეწყობა და თანამშრომლობის განვითარება ევროკავშირის პარტნიორ ქვეყნებში. პროექტი ითვალისწინებს უმაღლეს სასწავლებლებში ევროპული სტანდარტებისა და ახალი ინფორმაციული ტექნოლოგიების დანერგვას, თანამედროვე სასწავლო პროგრამების შემუშავებას, კვალიფიკაციის ამაღლებას, სტუდენტებისა და აკადემიური პერსონალის მობილობას, უნივერსიტეტების მენეჯმენტის გაუმჯობესებას და უახლესი სასწავლო ლიტერატურის მიწოდებას.

სან-ხოსეს სახელმწიფო უნივერსიტეტის პროფესორმა სიუზენ შილინგლოუმ საჯარო ლექცია წაიკითხა თემაზე: ,,ჯონ სტაინბეკი - დოკუმენტური ჟურნალისტიკა". სტუმარმა რსუ-ს სტუდენტებს ცნობილი ამერიკელი მწერლისა და ნობელის პრემიის ლაურეატის ცხოვრება, შემოქმედება, დოკუმენტური ჟურნალისტიკა და საბჭოთა კავშირსა და საქართველოში მოგზაურობის შთაბეჭდილებები გააცნო. საჯარო ლექციის დასრულების შემდეგ დოკუმენტალისტ ოლიკო ჟღენტის დოკუმენტური ფილმის „ჯონ სტაინბეკი და რუსული დღიური“ ჩვენება გაიმართა. ჯონ სტაინბეკი ფოტორეპორტიორ რობერტ კაპასთან ერთად 1947 წელს საბჭოთა კავშირში მოგზაურობისას აჭარასაც ეწვია.

მართლმადიდებლური ფილმების საერთაშორისო ფესტივალის „წმინდა ანდრიას ჯვარის“ ფარგლებში, შოთა რუსთაველის სახელმწიფო უნივერსიტეტში მრგვალი მაგიდა - ,,ეკლესია და კინემატოგრაფია“ გაიმართა. „წმინდა ანდრიას ჯვარის“ ორგანიზატორებმა, რეჟისორებმა, დრამატურგებმა, სცენარისტებმა და სასულიერო პირებმა ფესტივალზე წარმოდგენილი დოკუმენტური, მხატვრული, ანიმაციური, სტუდენტური ფილმები და ტელეგადაცემები შეაფასეს. მართლმადიდებლური ფილმების საერთაშორისო ფესტივალი საქართველოს კათოლიკოს–პატრიარქის, უწმინდესისა და უნეტარესის, ილია მეორის ლოცვა–კურთხევითა და პატრონაჟით ტარდება და მასში 5 ქვეყნის 35 ფილმი მონაწილეობს.

შოთა რუსთაველის დარბაზში აზერბაიჯანის რესპუბლიკის სახელმწიფოებრივი დამოუკიდებლობის ადღგენის 20 წლისადმი მიძღვნილი საიუბილეო შეხვედრა გაიმართა. აზერბაიჯანის რესპუბლიკის გენერალურმა კონსულმა ქალაქ ბათუმში, დოქტორმა ჰუსეინ ნაჯაფოვმა და აისელ ნაჯაფოვამ მთავრობის წევრებისათვის, დიპლომატიური კორპუსის წარმომადგენლებისათვის, სტუდენტებისა და პროფესორ-მასწავლებლებისათვის მოხსენებები წაიკითხეს ქვეყნის ისტორიაზე, დღევანდელობასა და მიღწევებზე. დიპლომატმა ხაზი გაუსვა საქართველოსთან არსებული კეთილმეზობლური ურთიერთობებისა და ერთობლივი ეკონომიკური, საგანმანათლებლო და კულტურული პროექტების განხორციელების მნიშვნელობას. დაიგეგმა შოთა რუსათველის სახელმწიფო უნივერსიტეტს, ბაქოს სახელმწიფო უნივერსიტეტსა და ბაქოს სამედიცინო უნივერსიტეტს შორის თანამშრომლობის მემორანდუმის გაფორმება. რსუ-ს საერთაშორისო ურთიერთობების სპეციალობის ხუთი სტუდენტი სტაჟირებას გაივლის აზერბაიჯანის რესპუბლიკის გენერალურ საკონსულოში ქალაქ ბათუმში.

ევროპის იურისტ სტუდენტთა ასოციაციის (ELSA) წარმომადგენლები შოთა რუსთაველის სახელმწიფო უნივერსიტეტის სოციალურ მეცნიერებათა, ბიზნესისა და სამართალმცოდნეობის ფაკულტეტის სტუდენტებს შეხვდნენ და ორგანიზაციის საქმიანობა და სამომავლო გეგმები გააცნეს. პრეზენტაციაზე რეგიონში ორგანიზაციის წარმომადგენლობის დაფუძნება და ერთობლივი პროექტების განხორციელება დაიგეგმა. 2012 წელს, ასოციაციის საერთაშორისო საბჭოს შეხვედრას ბათუმი უმასპინძლებს, რომელშიც ევროპის 42 ქვეყნის 400-მდე წარმომადგენელი მიიღებს მონაწილეობას. ELSA-ს მიზანია ხელი შეუწყოს მაღალკვალიფიციური განათლებისათვის საჭირო ევროპული სტანდარტების დანერგვასა და სასწავლო-სამეცნიერო პროგრამების ამოქმედებას.