ახალი ამბები

აჭარის ავტონომიური რესპუბლიკის თავმჯდომარემ ლევან ვარშალომიძემ, ბათუმის საკრებულოს თავმჯდომარემ გიორგი კირთაძემ, ქალაქ ბათუმის მერმა რობერტ ჩხაიძემ და აჭარის განათლების, კულტურისა და სპორტის მინისტრმა გია აბულაძემ შოთა რუსთაველის სახელმწიფო უნივერსიტეტის სტუდენტებსა და პროფესორ-მასწავლებლებს ბათუმის 2012 წლის ბიუჯეტის პროექტი გააცნეს. ასევე განიხილეს მომავალი წლის ბიუჯეტის სტრატეგიები, მიმართულებები და პროექტით გათვალისწინებული სხვადასხვა სახის პროგრამები. ქალაქის მთავარი ფინანსური დოკუმენტის პროექტის წარდგენის შემდეგ შეხვედრა კითხვა-პასუხის რეჟიმში წარიმართა. აღმასრულებელი და საკანონმდებლო ხელისუფლების ხელმძღვანელებმა სტუდენტების შეკითხვებს უპასუხეს, რომლებიც გაცვლით პროგრამებს, სტაჟირებას, საგანმანათლებლო, შემეცნებითი და კულუტურული პროექტების განხორციელებას უკავშირდებოდა.

შოთა რუსთაველის სახელმწიფო უნივერსიტეტის 43-ე აუდიტორიას ცნობილი ქართველი ეთნოლოგის, საქართველოს მეცნიერებათა ეროვნული აკადემიის წევრ-კორესპონდენტის, ისტორიის მეცნიერებათა დოქტორის, რსუ-ს წარმომადგენლობითი საბჭოს სპიკერის, სრული პროფესორის ვახტანგ შამილაძის სახელი მიენიჭა. ღვაწლმოსილი პროფესორის ხსოვნისადმი მიძღვნილ შეხვედრაზე აჭარის უმაღლესი საბჭოს თავმჯდომარემ, პროფესორმა მიხეილ მახარაძემ, რსუ-ს რექტორის მოადგილემ ირაკლი ბარამიძემ, პროფესორ-მასწავლებლებმა, სტუდენტებმა და ოჯახის წევრებმა კიდევ ერთხელ გაიხსენეს ცნობილი მეცნიერის ღვაწლი, მიღწევები და განვლილი გზა.

სააქტო დარბაზში პროექტის „სამოქალაქო აქტიურობის ხელშეწყობის პროგრამის“ შემაჯამებელი კონფერენცია ჩატარდა. პროექტის მონაწილე რსუ-ს განათლებისა და მეცნიერების ფაკულტეტის სტუდენტებმა, მოსწავლეებმა და კოორდინატორებმა პროგრამის ეგიდით განხორციელებული აქტივობების შედეგები შეაფასეს, სპექტაკლი „საოცარი ექიმი“ და რამდენიმეწლიანი მუშაობის ამსახველი ვიდეორგოლი წარმოადგინეს. „სამოქალაქო აქტიურობის ხელშეწყობის პროგრამა“ საქართველოს განათლებისა და მეცნიერების სამინისტროს ორგანიზებით 2007 წლიდან ხორციელდება და მიზნად ისახავს სხვადასხვა სოციალური ფენისა და შესაძლებლობების მქონე მოზარდების დაახლოებას, საზოგადოებრივ საქმიანობაში ჩართვასა და ინტეგრაციას.

გაეროს მოსახლეობის ფონდის (UNPRA) მიერ დატრენინგებულმა შოთა რუსთაველის სახელმწიფო უნივერსიტეტის განათლებისა და მეცნიერებათა ფაკულტეტის ჯანდაცვის მიმართულების 25-მა სტუდენტმა ქალაქის ხალხმრავალ ადგილებში საინფორმაციო-საგანმანათლებლო აქციები გამართეს. ახალგაზრდებმა მოქალაქეებს შიდსის პრევენციის შესახებ საინფორმაციო ბუკლეტები დაურიგეს და სტიგმატიზმისა და დისკრიმინაციის დაგმობისაკენ მოუწოდეს. ღონისძიების ფარგლებში სტუდენტებმა საგანმანათლებლო დაწესებულებებში შიდსის თემატიკაზე ვიქტორინა ჩაატარეს და გამარჯვებულ მონაწილეებს სამახსოვრო საჩუქრები გადასცეს. აქცია სიმბოლურად უმაღლესი სასწავლებლის ეზოში ცის მანათობელი ფარნების გაშვებით დასრულდა.

ხელვაჩაურის რაიონულ სასამართლოში შოთა რუსთაველის სახელმწიფო უნივერსიტეტის სამართალმცოდნეობის სპეციალობის III და IV კურსის სტუდენტების მონაწილეობით იმიტირებული სასამართლო პროცესი გაიმართა. რაიონული სასამართლოს შვიდმა სტაჟიორმა სტუდენტმა მიწის საკითხთან დაკავშირებული ადმინისტრაციული წარმოების დავა მოსარჩლის სასარგებლოდ გადაწყვიტეს და ბათილად ცნეს ხელვაჩაურის საკუთრების უფლების აღიარების კომისიის მიერ გამოცემული ინდივიდუალური სამართლებრივი აქტი. ხელვაჩაურის რაიონული სასამართლოს თავმჯდომარემ დავით მამისეიშვილმა, რსუ-ს სოციალურ მეცნიერებათა, ბიზნესისა და სამართალმცონდეობის ფაკულტეტის დეკანმა, პროფესორმა ადამ მახარაძემ, პროფესორ-მასწავლებლებმა და მოსამართლეებმა იმიტირებული სასამართლო პროცესი დადებითად შეაფასეს და სამომავლო თანამშრომლობის მიმართულებებზე ისაუბრეს.