ახალი ამბები

ქართული ენის დღის აღსანიშნავად შოთა რუსთაველის დარბაზში რსუ-ს პროფესორ-მასწავლებლები, სტუდენტები და მწერლები შეიკრიბნენ. უნივერსიტეტელებმა და საზოგადოების წარმომადგენლებმა 1978 წლის 14 აპრილსა და 26 მაისს განვითარებული მოვლენები გაიხსენეს და მშობლიური ენის სიწმინდის დაცვის აუცილებლობაზე ისაუბრეს. 33 წლის წინ ქართველმა ერმა არ დაუშვა საბჭოთა კონსტიტუციის 78-ე მუხლში იმ ცვლილების შეტანა, რომლის მიხედვითაც ქართული ენა სახელმწიფო ენის სტატუსს კარგავდა. ღონისძიება აჭარის განათლების, კულტურისა და სპორტის სამინისტროს, ორგანიზაცია ,,კავკასიონისა“ და შოთა რუსთაველის სახელმწიფო უნივერსიტეტის ხელშეწყობით გაიმართა. შეხვედრის დასრულების შემდეგ პროფესორ-მასწავლებლებმა და სტუდენტებმა ილია ჭავჭავაძის ძეგლი ყვავილებით შეამკეს.

ეკო და აგრო ტურიზმის განვითარების ხელშეწყობის მიზნით შოთა რუსთაველის სახელმწიფო უნივერსიტეტს ნორვეგიის ტელემარკის უნივერსიტეტის კოლეჯის დელაგაცია ეწვია. დელეგაციის წევრები ხუთი დღის განმავლობაში რეგიონის ტურისტულ პოტენციალს გაეცნობიან. ნორვეგიის სამთავრობო პროექტის ეგიდით უმაღლეს სასწავლებლებს შორის დაიგეგმა ერთობლივი საგანმანათლებლო და სამეცნიერო-კვლევითი პროგრამების განხორციელება, ინოვაციებისა და სამეწარმეო სწავლების სფეროში კურიკულუმის შემუშავება და ტურიზმის ფაკულტეტის სტუდენტების სტაჟირება. ნორვეგიის ტელემარკის უნივერსიტეტი რსუ-ს სტუდენტებს ასევე სთავაზობს ბიზნესადმინისტრირების საბაკალავრო პროგრამას, რომლის განხორციელებაც მომავალი სასწავლო წლიდან დაიწყება.

შოთა რუსთაველის სახელმწიფო უნივერსიტეტის პროფეროს-მასწავლებლებმა და სტუდენტებმა პატივი მიაგეს 1989 წლის 9 აპრილს მთავრობის სასახლესთან საქართველოს დამოუკიდებლობისათვის დაღუპულ გმირებს. 9 აპრილის მოვლენების ამსახველი ფოტოქრონიკის ჩვენების შემდეგ საპროტესტო აქციის უშუალო მონაწილეებმა ამ დღის მნიშვნელობა და შედეგები შეაფასეს. უნივერსიტეტელებმა ზღვისპირა პარკში მემორიალი ყვავილებით შეამკეს და სანთლები დაანთეს. 22 წლის წინ ქვეყნის თავისუფლებას 21 ადამიანის სიცოცხლე შეეწირა. 1991 წლის 9 აპრილს მაშინდელმა უზენაესმა საბჭომ ეს თარიღი საქართველოს დამოუკიდებლობის აღდგენის დღედ გამოაცხადა.

სოციალურ მეცნიერებათა, ბიზნესისა და სამართალმცოდნეობის ფაკულტეტის იურიდიულ მეცნიერებათა დეპარატმენტის აკადემიური პერსონალი სამართლის სპეციალობის კურსდამთავრებულებს შეხვდა. ღონისძიების მიზანი იყო სამართლის სპეციალობის კურსდამთავრებულთა ჩართვა საგანმანათლებლო პროგრამების განვითარებისა და განახლების პროცესში. შეხვედრაზე მხარეები კურსდამთავრებულთა ასოციაციის დაფუძნებასა და ონლაინრეჟიმში თანამშრომლობაზე შეთანხმდნენ. მათ საშუალება მიეცემათ წარმოადგინონ მოსაზრებები საგანმანათლებლო პროგრამებთან მიმართებაში, რაც მომავალში სასწავლო პროცესზე აისახება.

განათლებისა და მეცნიერებათა ფაკულტეტის ორგანიზებით რსუ-ს პროფესორ-მასწავლებლები, სტუდენტები, მწერლები და საზოგადოების წარმომადგენლები ბათუმის ღვთისმშობლის შობის ტაძრის ეზოში პოეტ ზურაბ გორგილაძის საფლავთან შეიკრიბნენ. პოეტის ხსოვნის უკვდავსაყოფად სტუდენტებმა შემოქმედის გარდაცვალების დღეს პოეზიის საათი მიუძღვნეს. ახალგაზრდებმა პოეტის ცხოვრებასა და შემოქმედებაზე ისაუბრეს, ლექსები წაიკითხეს და საფლავი ყვავილებით შეამკეს. პოეზიის საათი ტრადიციულ სახეს მიიღებს და ყოველ წელს გაიმართება.