ახალი ამბები

29 აგვისტოს გაიხსნა და ერთი კვირის განმავლობაში გაგრძელდება შოთა რუსთაველის სახელმწიფო უნივერსიტეტისა და ილიას სახელმწიფო უნივერსიტეტის ერთობლივი ,,განათლების ადმინისტრირების ბათუმის საზაფხულო სკოლა”. სწავლება რსუ-ში განათლების მართვის პროექტის (USAID) მხარდაჭერით მიმდინარეობს და მიზნად ისახავს განათლების ადმინისტრირების მაღალკვალიფიციური სპეციალისტების მომზადებას, ორ უნივერსიტეტს შორის ურთიერთთანამშრომლობას, განათლების ადმინისტრირების ერთობლივი სამაგისტრო საგანმანათლებლო პროგრამის განხორციელებასა და ერთობლივი დიპლომების გაცემას. საზაფხულო სკოლის ფარგლებში პარტნიორი უმაღლესი სასწავლებლების ხელმძღვანელებმა ხელი მოაწერეს თანამშრომლობის მემორანდუმს

შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ და კონსტიტუციონალიზმის კვლევისა და ხელშეწყობის რეგიონალური ცენტრის ხელმძღვანელმა ავთანდილ დემეტრაშვილმა თანამშრომლობის მემორანდუმს მოაწერეს ხელი. ხელშეკრულება ითვალისწინებს სამართლებრივი კვლევების პოპულარიზაციას, სტუდენტებისა და იურისტების პროფესიული განვითარების ხელშეწყობას და ერთობლივი პროგრამების განხორციელებას. დოკუმენტი ხელს შეუწყობს ურიდიულ მეცნიერებათა დეპარტამენტის სამაგისტრო პროგრამების ფარგლებში იურიდიული კლინიკის ჩამოყალიბებასა და ამოქმედებას. მხარეები ასევე სასწავლო, სამეცნიერო და მეთოდოლოგიური ლიტერატურის ურთიერთგაცვლაზე, ერთობლივი კონფერენციების, სემინარებისა და ვორქშოფების ჩატარებასა და ბიბლიოთეკის გამოყენებაზე შეთანხმდნენ.

აჭარის დამსახურებული მხატვრის, მემედ აბაშიძის პრემიის ლაურეატის და ღირსების ორდენის კავალერის ზურაბ ხაბაძის გამოფენას შოთა რუსთაველის სახელმწიფო უნივერსიტეტმა უმასპინძლა. პერსონალური გამოფენა მხატვრის 66 წლის იუბილეს მიეძღვნა. უნივერსიტეტის ფოიეში ფერმწერისა და გრაფიკოსის 100-მდე ნამუშევარი გამოიფინა. ზურაბ ხაბაძეს შექმნილი აქვს 200-მდე ფერწერული ტილო და გრაფიკული ნამუშევარი. მისი ცნობილი ტილოებია: "აღაზა ქისტებთან", "ფრიდონი", "ნესტან-დარეჯანი", "ტარიელი", "ვაჟა-ფშაველას პორტრეტი", "ბახტრიონი". მხატვარს გაფორმებული აქვს მრავალი წიგნი. მის მიერ არის შესრულებული ბათუმის ილია ჭავჭავაძის სახელობის სახელმწიფო დრამატული თეატრის ფარდა "მედეა". გამოფენა ა.რ. განათლების, კულტურისა და სპორტის სამინისტროს მხარდაჭერით გაიმართა.

გონიო–აფსაროსის მუზეუმ–ნაკრძალის ისტორიული მნიშვნელობიდან გამომდინარე, აჭარის ავტონომიური რესპუბლიკის მთავრობის გადაწყვეტილებით, განათლების, კულტურისა და სპორტის სამინისტრომ შოთა რუსთაველის სახელმწიფო უნივერსიტეტს მიზნობრივად, მუზეუმ–ნაკრძალში ჩასატარებელი არქეოლოგიური სამუშაოებისათვის 30 000 ლარი გამოუყო. პროექტი ითვალისწინებს საველე, კამერალურ და საგამომცემლო სამუშაოებს. მასში ჩართულია რსუ–ს პროფესორ–მასწავლებლები, დარგის სპეციალისტები და ისტორიის სპეციალობის საბაკალავრო და სამაგისტრო პროგრამების სტუდენტები. პროექტის მიზანი სტუდენტებისათვის სასწავლო პროგრამით მიღებული თეორიული ცოდნის პრაქტიკით განმტკიცება, ახალაღმოჩენილი მასალების საფუძველზე კვლევითი ხასიათის ნაშრომების შექნა, სამეცნიერი კონფერენციებზე წარდგენა და სტუდენტ-არქეოლოგთა შრომების კრებულის გამოცემაა

უნივერსიტეტის ბიბლიოთეკაში პროექტის: „ინტერდისციპლინარული კვლევები ენის კორპუსის გამოყენებით“ პრეზენტაცია გაიმართა. პროექტი მიზნად ისახავს შოთა რუსთაველის სახელმწიფო უნივერსიტეტის ლინგვოკულტურული და ინტერდისციპლინარული კვლევების მიმართულებით საერთაშორისო სამეცნიერო სივრცეში ინტეგრაციას, ქართველ და უხოელ მეცნიერთა თანამშრომლობასა და ქართული ენისა და კულტურის პოპულარიზაციას. პროექტის საინიციატივო ჯგუფის წევრებმა, რომელიც ფრანკფურტის გოეთეს უნივერსიტეტის, აშშ-ს კოლუმბიის უნივერსიტეტის და შოთა რუსთაველის სახელმწიფო უნივერსიტეტის მეცნიერებისა და ადმინისტრაციის წარმომადგენლებისაგან შედგება ქართულენოვანი სამეცნიერო ლიტერატურის კორპუსის შექმნაზე იმსჯელეს. დაიგეგმა “ვეფხისტყაოსნის” ქართულ და უცხო ენებზე თარგმნილი კორპუსის დიგიტალიზაცია და ორიგინალისა და თარგმანების პარალელური ტექსტის სამეცნიერო დამუშავება - საძიებო სისტემით აღჭურვა პარალელური ბმულების გამოყენებით.