ახალი ამბები

28-29 მაისს, შოთა რუსთაველის სახელმწიფო უნივერსიტეტმა აბრეშუმის გზის მე-6 საერთაშორისო კონფერენციას ,,გლობალიზაცია და უსაფრთხოება შავი და კასპიის ზღვების რეგიონებში“ უმასპინძლა. საერთაშორისო კონფერენციიის მიზანი იყო საზოგადოებისთვის შავი და კასპიის ზღვების რეგიონებში გლობალიზაციის, განათლების, ეკონომიკის, ჯანდაცვის, კულტურული თვითმყოფადობის, ტურიზმის განვითარებისა და უსაფრთხოების საკითხებზე წარმოებული კვლევის შედეგების გაცნობა. ,,გლობალიზაცია და უსაფრთხოება შავი და კასპიის ზღვების რეგიონებში“ შავი ზღვის საერთაშორისო უნივერსიტეტის, საქართველოს ეროვნული უშიშროების საბჭოსა და შინაგან საქმეთა სამინისტროს ორგანიზებით გაიმართა. კონფერენციაში ქართველებთან ერთად ფრანგი, თურქი, ამერიკელი, უკრაინელი, ბულგარელი, აზერბაიჯანელი, პოლონელი, რუმინელი, სომეხი, რუსი და სხვა უცხოელი მეცნიერები მონაწილეობდნენ.

საქართველოს ეროვნული დღესასწაული შოთა რუსთაველის სახელმწიფო უნივერსიტეტში რამდენიმე ღონისძიებით აღინიშნა. ქვეყნის დამოუკიდებლობის დღეს მიეძღვნა პროფესორ-მასწავლებელთა და სტუდენტთა სამეცნიერო სესია. მომხსენებლებმა სახელმწიფოებრიობის აღდგენის ისტორიაზე, ტრაპიზონის კონფერენციაზე, ამ დროს ბათუმში განვითარებულ მოვლენებსა და საქართველოს მართლმადიდებლური ეკლესიის როლზე ისაუბრეს. აგრარული ტექნოლოგიებისა და ეკოლოგიის ფაკულტეტმა ღირსშესანიშნავ თარიღს ორდღიანი, სტუდენტთა V სამეცნიერო კონფერენცია მიუძღვნა. ღონისძიებები სტუდენტური თვითმმართველობის მიერ ორგანიზებული ფოტოგამოფენით დასრულდა.

24-25 მაისს, ართვინის ჭოროხის უნივერსიტეტში გამართულ ართვინის გაზაფხულის ფოლკლორის მეორე საერთაშორისო ფესტივალში მონაწილეობა მიიღო შოთა რუსთაველის სახელმწიფო უნივერსიტეტის ქორეოგრაფიულმა ანსამბლმა „ტბეთმა“. სტუდენტებმა ანსამბლის ხელმძღვანელის, ქორეოგრაფ ზურაბ სვანაძის მიერ დადგმული ფოლკლორული ცეკვები: “მთიულური“, „ქალთა ხორუმი“, „ქალ-ვაჟთა“ და „თუშური“ შეასრულეს. დელეგაციას რსუ-ს ასოცირებული პროფესორი ემზარ მაკარაძე ხელმძღვანელობდა. ართვინის გუბერნატორმა მუსტაფა იემლი ჰალიოღლუმ და ართვინის ჭოროხის უნივერსიტეტის რექტორმა მეჰმედ დუმანიმ „ტბეთს“ სამახსოვრო საჩუქრები გადასცეს და გაზაფხულის ფოლკლორის მესამე საერთაშორისო ფესტივალზე მიიწვიეს.

შოთა რუსთაველის სახელმწიფო უნივერსიტეტის რექტორატი, ადმინისტრაცია, პროფესორ-მასწავლებლები და სტუდენტები გილოცავთ 26 მაისს - ქვეყნის დამოუკიდებლობის დღეს. ღვთის წყალობა და მფარველობა არ მოკლებოდეს სრულიად საქართველოს.

ყარსის კავკასიის უნივერსიტეტის დელეგაცია საქმიანი ვიზიტით შოთა რუსთაველის სახელმწიფო უნივერსიტეტს ეწვია. დელეგაციის წევრები უნივერსიტეტის რექტორს, პროფესორ ალიოშა ბაკურიძესა და საბუნებისმეტყველო და ჰუმანიტარულ მეცნიერებათა დეპარტამენტების ხელმძღვანელებს შეხვდნენ. ვიზიტისას დაიგეგმა ერთობლივი სასწავლო და სამეცნიერო პროექტების განხორციელება, კონფერენციების, სიმპოზიუმებისა და სხვადასხვა კულტურულ-საგანმანათლებლო ღონისძიებების ჩატარება. მხარეებს შორის თანამშრომლობის მემორანდუმს ხელი უახლოეს მომავალში მოეწერება.