ახალი ამბები

18-22 მაისს თბილისში გამართულ ახალგაზრდულ ფესტივალში – ,,სტუდენტური დღეები 2011" შოთა რუსთაველის სახელწიფო უნივერსიტეტმა მიიღო მონაწილეობა. სტუდენტებმა საკუთარი შესაძლებლობები შემოქმედებით, კულტურულ და სპორტულ შეჯიბრებებში წარმოაჩინეს. ჭადრაკის ტურნირში ვაჟთა შორის ოქროს მედლის მფლობელი შოთა რუსთაველის სახელმწიფო უნივერსიტეტის განათლებისა და მეცნიერებათა ფაკულტეტის III კურსის სტუდენტი გაიოზ ნიგალიძე გახდა. საესტრადო სიმღერების ნომინაციაში ჟიურის სიმპათია ამავე ფაკულტეტის IV კურსის სტუდენტმა თეონა ჩიტიშვილმა დაიმსახურა. ახალგაზრდულ ფესტივალში ქვეყნის 28 უმაღლესი სასწავლებლის 800-მდე სტუდენტი მონაწილეობდა. ვულოცავთ სტუდენტებს გამარჯვებას და წარმატებებს ვუსურვებთ.

„ევროპის იურისტ სტუდენტთა ასოციაციამ“ (elsa) იმიტირებული სასამართლო პროცესების ჩემპიონატის - ნაფიცი მსაჯული 3 მონაწილეთა შერჩევა დაიწყო. ჩემპიონატში მონაწილეობა უმაღლესი სასაწავლებლების იურიდიული ფაკულტეტის სტუდენტებსა და ახალგაზრდა იურისტებს შეუძლიათ. პროექტის ორგანიზატორები რსუ-ს სოციალურ მეცნიერებათა, ბიზნესისა და სამართალმცოდნეობის ფაკულტეტის სასამართლო საიმიტაციო დარბაზში კონკურსანტებს შეხვდნენ და გასაუბრების წესით ბათუმის გუნდი დააკომპლექტეს, რომლის შემადგენლობაში არიან რსუ-ს სამართალმცოდნეობის სპეციალობის სტუდენტები: მაია მიქელაძე, ნინო ფუტკარაძე და მარიამ ნაკაშიძე

ცნობილ მეცნიერს, პედაგოგიკურ და ფილოლოგიურ მეცნიერებათა დოქტორს, საზოგადო მოღვაწესა და კრიტიკოსს იური ბიბილეიშვილს 75 წელი შეუსრულდა. საკონფერენციო დარბაზში გამართულ საიუბილეო სხდომაზე ღვაწლმოსილ პედაგოგს ღისშესანიშნავი თარიღი უნივერსიტეტის რექტორმა, პროფესორმა ალიოშა ბაკურიძემ, აჭარის უმაღლესი საბჭოს თავმჯდომარემ მიხეილ მახარაძემ, პროფესორ-მასწავლებლებმა, სტუდენტებმა, პოეტებმა და საზოგადოების წარმომადგენლებმა მიულოცეს. მათ კიდევ ერთხელ შეაფასეს მეცნიერის სასწავლო-სამეცნიერო მიღწევები და საზოგადოებრივი საქმიანობა და სამახსოვრო საჩუქრები გადასცეს. მკვლევარს პედაგოგიკაში გამოქვეყნებული აქვს 200-ზე მეტი ნაშრომი რამდენიმე ენაზე, მათ შორის 10 მონოგრაფია და 2 სახელმძღვანელო. მან ახლებურად დაამუშავა სწავლების ფუნქციები, ინტელექტუალური განვითარების პედაგოგიური კონცეფცია და სრული განათლების თეორია

შოთა რუსთაველის სახელმწიფო უნივერსიტეტის ეზოში ,,ვეფხისტყაოსნის“ საჯარო კითხვა მოეწყო. რსუ-ს განათლებისა და მეცნიერებათა ფაკულტეტის დაწყებითი განათლების სპეციალობის II კურსის სტუდენტები უკვდავ პოემას ერთი საათის განმავლობაში ზეპირად კითხულობდნენ. მათგან „ვეფხისტყაოსნის“ საუკეთესოდ შესწავლისთვის მაგდა რუხაძეს, ქეთევან დათუნაშვილსა და სოფიკო ღლონტს უნივერსიტეტის რექტორმა, პროფესორმა ალიოშა ბაკურიძემ სამახსოვრო საჩუქრები გადასცა. საგანმანათლებლო აქცია, რომელიც უნივერსიტეტის სრული პროფესორის იური ბიბილეიშვილის ორგანიზებით ჩატარდა, ტრადიციულ სახეს მიიღებს და ყოველ წელს გაიმართება.

უნივერსიტეტის სტუდენტები და პროფესორ-მასწავლებლები ბათუმის ღვთისმშობლის შობის საკათედრო ტაძრის ეზოში ცნობილი პოეტის, რუსთაველის პრემიის ლაურეატის ფრიდონ ხალვაშის საფლავთან შეიკრიბნენ და ფრიდონობა აღნიშნეს. ახალგაზრდებმა მწერლებთან, საზოგადოების წარმომადგენლებთან, პოეტის მეგობრებთან და ნათესავებთან ერთად შემოქმედი გაიხსენეს, ლექსები წაიკითხეს და საფლავი ყვავილებით შეამკეს. ცნობილ პოეტს დღეს 86 წელი შეუსრულდებოდა. მხცოვანი მწერალი 2010 წლის 8 ივლისს მძიმე ავადმყოფობის შედეგად გარდაიცვალა.