ახალი ამბები

შოთა რუსთაველის სახელმწიფო უნივერსიტეტში საბჭოთა ოკუპაციის 90 წლისადმი მიძღვნილი კვირეული ესეების კონკურსით დაიწყო. შინაგან საქმეთა სამინისტროს საინფორმაციო-ანალიტიკური დეპარტამენტის საარქივო სამმართველოს ორგანიზებით უშიშროების არქივში არსებული საბჭოთა ოკუპაციისა და ტერორის ამსახველი გრიფით საიდუმლო ფოტობანერების გამოფენა მოეწყო სახელწოდებით ,,წითელი ისტორია და აჭარა’’, გაიმართა ამავე უწყების მიერ გამოცემული ჟურნალ ,,საარქივო მოამბის’’ სპეციალური ნომრის პრეზენტაცია, თბილისის ივანე ჯავახიშვილის სახელობის სახელმწიფო უნივერსიტეტის ერთ-ერთი დამაარსებლის, შალვა ნუცუბიძის დაპატიმრების ისტორიის ამსახველი დოკუმენტური ფილმის „დატყვევებული გონი(ერი)“ ჩვენება და სტუდენტთა სამეცნიერო კონფერენცია.

დავით აღმაშენებლის ხსენების დღეს მიეძღვნა ინტელექტუალური თამაში "რა? სად? როდის?", რომელშიც სტუდენტებთან ერთად აჭარის საჯარო სკოლის მოსწავლეები მონაწილეობდნენ. მოასპარეზე ოც გუნდს შორის პირველი ადგილი ურეხის საჯარო სკოლის გუნდმა "ბახტრიონმა" დაიკავა, მეორე კი - სკოლა ,,ევრო 2000“-ის გუნდმა ,,ედელვაისმა“. ღონისძიების ფარგლებში შედგა მანუჩარ ლორიას დოკუმენტური ფილმის ,,დავით აღმაშენებლის“ ჩვენება. ინტელექტუალური თამაში რსუ-ს სტუდენტთა მომსახურებისა და მხარდაჭერის სამსახურის, სტუდენტური თვიმმართველობის, სტუდენტთა სამცნიერო ცენტრის, აჭარის სპორტისა და ახალგაზრდობის საქმეთა დეპარტამენტისა და ბათუმის მერიის ახალგაზრდულ საქმეთა განყოფილების ხელშეწყობით გაიმართა. ორგანიზატორებმა გამარჯვებულ გუნდებს სიგელები და სამახსოვრო საჩუქრები გადასცეს.

23-27 იანვარს შოთა რუსთაველის სახელმწიფო უნივერსიტეტის რექტორი, პროფესორი ალიოშა ბაკურიძე, საინჟინრო-ტექნოლოგიური ფაკულტეტის დეკანი გაიოზ ფარცხალაძე, ევროპეისტიკის დეპარტამენტის ასისტენტ პროფესორი ნელი ახვლედიანი, აჭარის ჯანმრთელობისა და სოციალური დაცვის მინისტრის მოადგილე ჯამბულ სურმანიძე, აჭარის უმაღლესი საბჭოს ჯანმრთელობის დაცვისა და სოციალურ საკითხთა კომისიის თავმჯდომარე მიხეილ მჟავანაძე და უმაღლესი საბჭოს საკონსულტაციო საბჭოს თავმჯდომარე მერაბ ქიძინიძე საქმიანი ვიზიტით გერმანიის ფედერაციულ რესპუბლიკაში იმყოფებოდნენ. დელეგაციის წევრები ქვეყნის ოფიციალურ პირებსა და უმაღლესი სასწავლებლის ხელმძღვანელებს შეხვდნენ. ვიზიტი მიზნად ისახავდა ორ ქვეყანას შორის ურთიერთთანამშრომლობის გაღრმავებასა და ერთობლივი პროექტების განხორციელებას

შოთა რუსთაველის სახელმწიფო უნივერსიტეტის სტუდენტებმა მედია-პროექტ ,,ეტალონში“ მიიღეს მონაწილეობა. პირველობა განათლებისა და მეცნიერებათა ფაკულტეტის მაგისტრანტმა კახაბერ ქამადაძემ მოიპოვა, მეორე ადგილზე სოციალურ მეცნიერებათა, ბიზნესისა და სამართალმცოდნეობის III კურსის სტუდენტი ჯაბა ლომაძე გავიდა, მესამე ადგილზე - განათლებისა და მეცნიერებათა ფაკულტეტის II კურსის სტუდენტი მარიამ ბოლქვაძე. ეროვნულმა მედია-პროექტმა ,,ეტალონმა“ შოთა რუსთაველის სახელმწიფო უნივერსიტეტს აჭარის რეგიონში საგანმანათლებლო ინოვაციებისა და სწორი მენეჯმენტისათვის 2010 წლის ,,ეტალონი რეგიონული სახელმწიფო უნივერსიტეტის“ ტიტული მიანიჭა.

ხულოს რაიონის ღია პირველობა მკლავჭიდში შოთა რუსთაველის სახელმწიფო უნივერსიტეტის გუნდის გამარჯვებით დასრულდა. ჩემპიონატი ხუთ წონით კატეგორიაში ჩატარდა და მასში 103 სპორტსმენი მონაწილეობდა. ჩემპიონი აბსოლიტურ წონით კატეგორიაში პირველ ადგილზე გასული რუსლან ქავთარაძე გახდა, მეორე საპრიზო ადგილი მირზა აბუსერიძემ დაიკავა