ახალი ამბები

ევროკომისიის TEMPUS-ის პროგრამის ხელშეწყობით შოთა რუსთაველის სახელმწიფო უნივერსიტეტში საერთაშორისო კონფერენცია ჩატარდა თემაზე: „სოციალური სამუშაოს განათლებისა და პროფესიის განვითარება აღმოსავლეთ ევროპაში“. კონფერენციაში ქართველებთან ერთად ბრიტანელი, სლოვენიელი, ლიტველი, ლატვიელი და უკრაინელი წამყვანი სპეციალისტები მონაწილეობდნენ. მეორე წელია რსუ ჩართულია სოციალური მუშაობის აკადემიური განვითარების პროგრამაში, რომლის ფარგლებში უმაღლესი სასწავლებელის 8 პროფესორ-მასწავლებელმა გადამზადება გაიარა. შოთა რუსთაველის სახელმწიფო უნივერსიტეტში სოციალური სამუშაოს სამსემესტრიანი სერტიფიცირებული კურსები ხორციელდება, უახლოეს მომავალში კი სოციალური სამუშაოს საბაკალავრო პროგრამა ამოქმედდება.

გერმანელი სტუდენეტები ჰენდრიკ აიროში და იულია რიუდებუში სასწავლო პრაქტიკას შოთა რუსთაველის სახელმწიფო უნივერსიტეტში გაივლიან. გაცვლითი პროგრამა შოთა რუსთაველის სახელმწიფო უნივერსიტეტისა და ებერსვალდეს მდგრადი განვითარების სასწავლებელს შორის გაფორმებული მემორანდუმის ფარგლებში ხორციელდება. უცხოელი სტუდენტები პროფესორების ინგა დიასამიძისა და ზურაბ მანველიძის ხელმძღვანელობით მტირალას ეროვნულ პარკსა და სხვა დაცულ ტერიტორიებს შეისწავლიან. გერმანელ სტუდენტებსა და ბრანდენბურგ-საქართველოს საზოგადოების თავმჯდომარეს პავლე შპეტიშვილს რსუ-ს რექტორი, პროფესორი ალიოშა ბაკურიძე შეხვდა და სხვადასხვა სასწავლო-სამეცნიერო პროექტების განხორციელებაზე ესაუბრა.

2011-2012 სასწავლო წელი შოთა რუსთაველის სახელმწიფო უნივერსიტეტში საზეიმო ღონისძიებით დაიწყო. სტუდენტებსა და პროფესორ-მასწავლებლებს სასწავლო პროცესის განახლება უნივერსიტეტის რექტორმა, პროფესორმა ალიოშა ბაკურიძემ მიულოცა და ახალი სასწავლო წლის პრიორიტეტები და სიახლეები გააცნო. წლის ძირითადი პრიორიტეტი სწავლების ხარისხის, სამეცნიერო კვლევა-ძიების, სასწავლო პროცესის გაუმჯობესება, ხარისხის უზრუნველყოფის სისტემისა და მატერიალურ-ტექნიკური ბაზის სრულყოფა არის. განსაკუთრებული ყურადღება მიექცევა ტურიზმის დარგში მაღალკვალიფიციური სპეციალისტების მომზადებას, სტუდენტების, პროფესორ-მასწავლებლებისა და მკვლევრების საზღვარგარეთის უმაღლეს სასწავლებლებში სწავლასა და სტაჟირებას. ტურიზმის ფაკულტეტი 130 პირველკურსელთან ერთად პირველად შეხვდა ახალ სასწავლო წელს. ერთიანი ეროვნული გამოცდებით უმაღლეს სასწავლებელში სულ 1 260 სტუდენტი ჩაირიცხა

29 აგვისტოს გაიხსნა და ერთი კვირის განმავლობაში გაგრძელდება შოთა რუსთაველის სახელმწიფო უნივერსიტეტისა და ილიას სახელმწიფო უნივერსიტეტის ერთობლივი ,,განათლების ადმინისტრირების ბათუმის საზაფხულო სკოლა”. სწავლება რსუ-ში განათლების მართვის პროექტის (USAID) მხარდაჭერით მიმდინარეობს და მიზნად ისახავს განათლების ადმინისტრირების მაღალკვალიფიციური სპეციალისტების მომზადებას, ორ უნივერსიტეტს შორის ურთიერთთანამშრომლობას, განათლების ადმინისტრირების ერთობლივი სამაგისტრო საგანმანათლებლო პროგრამის განხორციელებასა და ერთობლივი დიპლომების გაცემას. საზაფხულო სკოლის ფარგლებში პარტნიორი უმაღლესი სასწავლებლების ხელმძღვანელებმა ხელი მოაწერეს თანამშრომლობის მემორანდუმს

შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ და კონსტიტუციონალიზმის კვლევისა და ხელშეწყობის რეგიონალური ცენტრის ხელმძღვანელმა ავთანდილ დემეტრაშვილმა თანამშრომლობის მემორანდუმს მოაწერეს ხელი. ხელშეკრულება ითვალისწინებს სამართლებრივი კვლევების პოპულარიზაციას, სტუდენტებისა და იურისტების პროფესიული განვითარების ხელშეწყობას და ერთობლივი პროგრამების განხორციელებას. დოკუმენტი ხელს შეუწყობს ურიდიულ მეცნიერებათა დეპარტამენტის სამაგისტრო პროგრამების ფარგლებში იურიდიული კლინიკის ჩამოყალიბებასა და ამოქმედებას. მხარეები ასევე სასწავლო, სამეცნიერო და მეთოდოლოგიური ლიტერატურის ურთიერთგაცვლაზე, ერთობლივი კონფერენციების, სემინარებისა და ვორქშოფების ჩატარებასა და ბიბლიოთეკის გამოყენებაზე შეთანხმდნენ.