ბათუმის შოთა რუსთაველის სახელმწიფო უნივერსიტეტს ბრიუსელში შექმნილი ორგანიზაციის „ევროპული ალიანსი საქართველოსთვის“ თანადამფუძნებელი რომან შტრასე ეწვია. ბსუ-ს რექტორთან, პროფესორ მერაბ ხალვაშთან გამართულ გაცნობითი ხასიათის შეხვედრაზე სტუმარმა ორგანიზაციის საქმიანობასა და სამომავლო თანამშრომლობის მიმართულებებზე ისაუბრა.
ბსუ-ში სოფლის მეურნეობის ექსტენციის პროექტის ფარგლებში, აშშ-ის სოფლის მეურნეობის დეპარტამენტის წარმომადგენელმა (USDA), პროექტის მენეჯერმა ბენჟამენ კარინმა, აშშ-ის განათლების საერთაშორისო სპეციალისტმა ლიზა ლოქსმენმა, აშშ-ის Central State University-ს წარმომადგენელმა, საერთაშორისო ექსპერტმა პროსპერ დუამეკპორმა და აშშ-ის Prairie View A&M University-ის წარმომადგენელმა საერთაშორისო ექსპერტმა სინტია ფერფაქსმა სტუდენტებისათვის, ბათუმის N1, N28 საჯარო სკოლის მოსწავლეებისა და ახალგაზრდა ფერმერებისათვის ტრენინგები ჩაატარეს. სწავლება მიზნად ისახავდა ახალგაზრდების სოფლის მეურნეობაში ჩართულობას და დარგის პოპულარიზაციას.
„ერაზმუს+“-ის პროექტის „კვლევის პასუხისმგებლიანად წარმართვა – კვლევის კეთილსინდისიერება და ეთიკა ქართულ უნივერსიტეტებში“ (Responsible Conduct of Research – Research Integrity and Ethics in Georgian Universities - ETHICS) ბსუ-ს გუნდის ორგანიზებით სამუშაო შეხვედრა გაიმართა. შეხვედრის მიზანს პროექტის ინსტიტუციური წარმომადგენლების მიერ ბსუ-დან გადაწყვეტილების მიმღებ პირებთან პროექტის შესახებ პრეზენტაციის წარდგენა იყო. სამუშაო შეხვედრის ფარგლებში პროექტში ჩართულმა პერსონალმა ბსუ-ს ადმინისტრაციას წარუდგინა ინფორმაცია პროექტის მიზნების, მოსალოდნელი შედეგების, სამუშაო პაკეტებით გათვალისწინებული აქტივობების და მათი განხორციელების ვადების, საჭიროების შემთხვევაში პროექტის სამუშაო ჯგუფებში სამომავლოდ რელევანტური პირების ჩართვის მექანიზმების, პროექტში ბსუ-ს როლისა და ვალდებულებების და პროექტის პირველ ეტაპზე განსახორციელებელი საქმიანობების შესახებ. შეხვედრას ბსუ-ს ადმინისტრაციის სხვადასხვა მმართველი რგოლის წარმომადგენლები ესწრებოდნენ.
ზედიზედ მეორედ, ბსუ-ს იურიდიული და სოციალურ მეცნიერებათა ფაკულტეტის ფსიქოლოგიის საბაკალავრო საგანმანათლებლო პროგრამის სტუდენტი დიეგო ჩხიკვაძე ევროპის ჩემპიონი გახდა. ქართველმა ფალავანმა ევროპის ბერძნულ-რომაული სტილით 23-წლამდელ მოჭიდავეთა ფინალში თურქი მუსტაფა ილდირიმი დაამარცხა. ბათუმის შოთა რუსთაველის სახელმწიფო უნივერსიტეტი ულოცავს დიეგო ჩხიკვაძეს დამსახურებულ გამარჯვებას და წარმატებებს უსურვებს!
„ჰორიზონტ ევროპის“ საინფორმაციო შეხვედრა გაიმართა ბათუმის შოთა რუსთაველის სახელმწიფო უნივერსიტეტში. პროფესორ-მასწავლებლებს, მკვლევრებს, დოქტორანტებსა და ადმინისტრაციის წარმომადგენლებს პროგრამის ეროვნულმა საკონტაქტო პირებმა (NCP) ისეთი მნიშვნელოვანი საკითხები გააცნეს, როგორებიცაა: მარია სკლადოვსკა კიურის აქციების ფარგლებში დაგეგმილი სამეცნიერო საგრანტო დაფინანსებების შესაძლებლობები, ჰორიზონტ ევროპის II სვეტის კლასტერები, კერძოდ, ჯანდაცვის, კულტურის, სამოქალაქო უსაფრთხოების, დიგიტალური ტექნოლოგიების, კლიმატის, სურსათის, სოფლის მეურნეობის და სხვა მიმართულებები.
