ახალი ამბები

ბათუმის შოთა რუსთაველის სახელმწიფო უნივერსიტეტმა ოზურგეთის მუნიციპალიტეტში ღია კარის დღე გამართა. ბსუ-ს ასისტენტ პროფესორმა ხათუნა ჭიჭილეიშვილმა სტუდენტებთან ერთად, დაბა ურეკის საჯარო სკოლის მეთორმეტე კლასის მოსწავლეებს ის სიახლეები და შესაძლებლობები გააცნო, რომელსაც უნივერსიტეტი სთავაზობს მათ. აბიტურიენტებს დეტალური ინფორმაცია მიაწოდეს საგანმანათლებლო პროგრამების, სტიპენდიების, გაცვლითი პროგრამებისა და სტუდენტური ცხოვრების შესახებ. შეხვედრის დასასრულს უნივერსტიტეტის წარმომადგენლებმა მოსწავლეების შეკითხვებს უპასუხეს და სამახსოვრო საჩუქრები გადასცეს.

ბსუ-ს საჯარო მმართველობის საგანმანათლებლო პროგრამის მეორე კურსის სტუდენტების პროექტი „ადაპტირებული ბათუმი“ ბათუმის მერიის კონკურსის - „შენი იდეა ბათუმს“ გამარჯვებულია. კონკურსის ხმის მიცემის დასრულების შემდეგ, მონაწილეობითი ბიუჯეტის საბჭოს სხდომაზე პირველ ეტაპზე გამოვლენილი 6 იდეიდან გამარჯვებულად 2 პროექტი დასახელდა, რომლებიც ბათუმის მერიის 2023 წლის ბიუჯეტიდან დაფინანსდება. პროექტის ავტორია ბსუ-ს სტუდენტი დათა კობალაძე და თანაავტორი ბსუ-ს კურსდამთავრებული - შოთა გურგენიძე, ასევე პროექტის ჯგუფის წევრები არიან სტუდენტები: ანეტი ბერიძე, ანამარია ბოლქვაძე, ქრისტინა სურმანიძე და ხვიჩა ცენტერაძე. ბსუ სტუდენტებს ულოცავს გამარჯვებას და უსურვებს წარმატებებს.

ბსუ-ს რექტორმა მერაბ ხალვაშმა, ადმინისტრაციის ხელმძღვანელმა მერაბ დიასამიძემ, ფაკულტეტის დეკანებმა, სტუდენტებმა და პროფესორ-მასწავლებლებმა საბჭოთა რუსეთის მიერ საქართველოს ოკუპაციის დროს დაღუპულ მებრძოლთა ხსოვნას პატივი მიაგეს და გმირთა საძმო საფლავი ყვავილებით შეამკეს. 1921 წლის 25 თებერვალს, თბილისი მე-11 წითელმა არმიამ დაიკავა, საქართველომ დამოუკიდებლობა დაკარგა და რუსული საბჭოთა იმპერიის ნაწილად იქცა.

ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა, პროფესორებმა და სტუდენტებმა დისკუსია გამართეს თემაზე: „საქართველოს ოკუპაცია - 1921 წლის 25 თებერვალი“ და „უკრაინაში რუსეთის აგრესია - 2022 წლის 24 თებერვალი“. დისკუსიაზე მოხსენებები წარმოადგინეს ჰუმანიტარულ მეცნიერებათა ფაკულტეტის პროფესორებმა - ოთარ გოგოლიშვილმა და ჯემალ კარალიძემ.

ბათუმის შოთა რუსთველის სახელმწიფო უნივერსიტეტის ეკონომიკისა და ბიზნესის ფაკულტეტის მესამე კურსის სტუდენტმა გოჩა შაინიძემ შერეული საბრძოლო ხელოვნების ჩემპიონატზე, GFC 19-ზე (Georgian Fighting Championship) წარმატებით იბრძოლა და სრული დომინაციით ისრაელის წარმომადგენელი დაამარცხა. GFC 19-ი თბილისში, ახალ სპორტულ სასახლეში ჩატარდა, სადაც 6 ქვეყნის 9 წარმომადგენელი მონაწილეობდა. გოჩა შაინიძე საქართველოს ჩემპიონია შერეულ ორთაბრძოლებში და შავი ზღვის თასის მფლობელი კიკბოქსინგში. ბათუმის შოთა რუსთაველის სახელმწიფო უნივერსიტეტი გოჩა შაინიძეს ულოცავს გამარჯვებას და წარმატებებს უსურვებს.