ახალი ამბები

ბათუმის შოთა რუსთაველის სახელმწიფო უნივერსიტეტში ევროკავშირის „ერაზმუს+“-ის პროექტის DITECH-ის საერთაშორისო სამეცნიერო-პრაქტიკული კონფერენცია „ციფრული ტექნოლოგიები განათლებაში“ და DITECH-ის კონსორციუმის შეხვედრა ტარდება. კონფერენცია სამეცნიერო-პრაქტიკული ხასიათისაა და ეხება ციფრული ტექნოლოგიების სწავლების, დანერგვისა და მდგრადი განვითარების პერსპექტივებს უმაღლეს საგანმანათლებლო დაწესებულებებსა და ზოგად საგანმანათლებლო სისტემაში.

ბსუ-ს ჰუმანიტარულ მეცნიერებათა ფაკულტეტმა „ავსტრიულ ლიტერატურულ შაბათ-კვირას ბათუმში“ უმასპინძლა. პროექტი მეორე წელია საქართველოში ავსტრიის საელჩოს ორგანიზებით იმართება და მისი მიზანია საქართველოში ავსტრიული კულტურის, ხელოვნებისა და ლიტერატურის პოპულარიზაცია. ბათუმში გამართულ ღონისძიებაზე ავსტრიის სრულუფლებიანმა და საგანგებო ელჩმა საქართველოში თომას მიულმანმა ახალი სამენოვანი სასწავლო პლატფორმა - www.berta-von-suttner.net წარადგინა, რომელიც მშვიდობის დარგში პირველი ნობელიანტი ქალის, ბერტა ფონ ზუტნერის ცხოვრებასა და მოღვაწეობას, ზუტნერების ოჯახის საქართველოში გატარებულ წლებს ასახავს და მრავალფეროვან მულტიმედია რესურსს სთავაზობს მომხმარებელს.

ბათუმის შოთა რუსთაველის სახელმწიფო უნივერსიტეტს გაეროს ბავშვთა ფონდის ახლად დანიშნული წარმომადგენელი საქართველოში იასპერ მოლერი ეწვია. ბსუ-ს რექტორთან მერაბ ხალვაშთან გამართულ გაცნობითი ხასიათის შეხვედრაზე იასპერ მოლერმა ბსუ-ს ბავშვთა უფლებების ცოდნის ცენტრის მიღწევებსა და სამომავლო გეგმებზე ისაუბრა. ვიზიტის ფარგლებში ასევე შედგა შეხვედრა ბსუ-ს ზუსტ მეცნიერებათა და განათლების ფაკულტეტის პროფესორ-მასწავლებლებთან და სტუდენტებთან. გაეროს ბავშვთა ფონდის (UNICEF) მხარდაჭერით, ბსუ-ში შეიქმნა ბავშვთა უფლებების ცოდნის ცენტრი. Unicef-ის, მხარდაჭერით, ბსუ-ში განხორციელდა 3 პროექტი: „ბავშვთა უფლებების ცოდნის ცენტრად დაფუძნება ინკლუზიური და ბავშვთა უფლებებზე ორიენტირებული ცოდნის დამოკიდებულებებისა და პრაქტიკის დასანერგად“, „კვლევა ფსიქიკური ჯანმრთელობის ხარისხიანი სერვისებზე ახალგაზრდების ხელმისაწვდომობის შესახებ“ და „უნივერსიტეტის შესაძლებლობების გაძლიერება ინკლუზიური სკოლამდელი და ზოგადი განათლების მხარდასაჭერად“.

ბათუმის შოთა რუსთაველის სახელმწიფო უნივერსიტეტში სამეცნიერო პიკნიკი „საზღვაო ქვეყნის ლურჯი პოლიტიკა“ გაიმართა. ღონისძიებაზე, ბსუ-თან ერთად სხვადასხვა უმაღლესი საგანმანათლებლო დაწესებულება, სამეცნიერო-კვლევითი ცენტრი და ორგანიზაცია მონაწილებდა. ღია ცის ქვეშ, 30-მდე კარავში წარმოდგენილი იყო შავი ზღვისა და რეგიონის კვლევების ამსახველი სხვადასხვა სახის სამეცნიერო პროექტის შედეგები, მოსწავლეებისათვის საინტერესო ექსპერიმენტები, სახალისო აქტივობები, ინტერაქციული გამოფენები და ვიქტორინები. „საზღვაო ქვეყნის ლურჯი პოლიტიკა“ მიზნად ისახავდა სამეცნიერო კვლევებისა და ინოვაციების პოპულარიზაციასა და მკვლევართა მიღწევების გაცნობას ფართო საზოგადოებისათვის.

ბათუმის შოთა რუსთაველის სახელმწიფო უნივერსიტეტში სამეცნიერო პიკნიკის „საზღვაო ქვეყნის ლურჯი პოლიტიკა“ ფარგლებში, სამეცნიერო კონფერენცია „შავიზღვისპირეთი ცივილიზაციათა გზაჯვარედინზე II” გაიხსნა. ორდღიანი კონფერენცია გახსნეს და მონაწილეებს მიესალმნენ ბსუ-ს რექტორი მერაბ ხალვაში, აჭარის ა.რ. განათლების, კულტურისა და სპორტის მინისტრი მაია ხაჯიშვილი, საქართველოს განათლებისა და მეცნიერების სამინისტროს მეცნიერების განვითარების დეპარტამენტის უფროსი ქეთევან ქოქრაშვილი, ქალაქ ბათუმის მერი არჩილ ჩიქოვანი, საქართველოს განათლებისა და მეცნიერების სამინისტროს მეცნიერების განვითარების დეპარტამენტის უფროსის მოადგილე ზაზა მარუაშვილი, ვარშავის უნივერსიტეტის (პოლონეთი) პროფესორი დავით ყოლბაია და ოსტრავას უნივერსიტეტის (ჩეხეთი) პროფესორი ვინცენტ კოპეჩაკი.